CBA

E habilidad di Aruba pa prospera den un era di interupcion mundial cu ta acelera lo depende di su boluntad pa lidera cu prevision, resiliencia y, riba tur cos, equidad. Esaki ta e mensahe central di e recien publica tercer volumen di e rapport di Banco Central di Aruba (CBA) titula “Governing from the future, leading with equity: Policies, prospects, and pathways for Aruba 2040.” Den e rapport aki ta urgi esunnan cu ta traha politica pa cambia decisivamente pa strategianan centra riba hende cu ta fortalece seguridad social y economico na tur nivel di sociedad.

E rapport aki ta construi riba añanan di investigacion di CBA cu e meta pa prepara Aruba pa un ambiente global volatil y insigur. E rapport ta emiti un recordatorio fuerte: estadonan insular chikito den desaroyo manera Aruba ta enfrenta un combinacion unico y compleho di presionnan demografico, economico, ambiental y geopolitico. Nabega den e paisahe aki ta rekeri mas cu solucionnan tecnico of contesta na crisis di termino cortico—e ta rekeri un modelo di gobernacion capaz pa anticipa retonan den futuro y forma politicanan cu ta salvaguardia e bienestar di tanto generacionnan actual como futuro.

E serie di Governing from the Future a ser diseña como un plataforma nacional pa dialogo basa riba evidencia, dirigi riba vulnerabilidadnan structural mientras ta ilumina oportunidadnan a largo plaso. Cada edicion a amplia e alcance di analisis, pasando di identifica riesgonan, pa promove solucionnan inclusivo, pa awor enfoca riba e individuonan mas afecta pa decisionnan di politica.

E prome volumen, Liderando cu Impacto (2022), a introduci e concepto di “Gray Rhinos”—menasanan grandi y visibel cu ta evoluciona den transcurso di tempo y ta ser ignora mucho biaha te ora nan yega na proporcionnan di crisis. Esakinan ta inclui e retonan demografico di Aruba, vulnerabilidad di clima y energia, fragilidad fiscal, y e sostenibilidad di e sistema di seguridad social. E rapport a enfatisa cu decisionnan di politica tuma awe lo forma e trayectoria di desaroyo di Aruba pa decadas. E la urgi lidernan pa actua como si fuera e futuro ta importa di berdad, compromete na reforma basa riba evidencia y administracion a largo plaso.

E di dos volumen, Liderando cu Inclusion (2024), a avansa e combersacion door di inclui resiliencia no solamente pa fortalece sistemanan, pero pa garantisa husticia den ken ta beneficia di e sistemanan ey. E rapport a enfoca riba e evolucion di economia di Aruba, transformacion digital, e rol di un florin digital di benta, vivienda pagabel, y e necesidad pa un transicion di energia equitativo. Su resultadonan a enfatisa cu sostenibilidad ta un mandato social y tambe uno economico y ambiental.

E di tres volumen cu a caba di sali ta representa un punto di cambio significante. Mientras cu e volumennan anterior a describi ki menasanan Aruba ta enfrenta y con cuadronan inclusivo por guia reforma, e edicion aki ta enfoca riba ken ta ser mas afecta—y con nan realidadnan di bida mester forma e agenda di politica di e isla. Aruba, e rapport ta subraya, no por yega na resiliencia sin atende prome cu e inseguridadnan cu hogar y trahadornan ta encontra diariamente.

E rapport ta organisa den tres dominio grandi: realidadnan economico y igualdad social; elementonan fundamental di seguridad humano; y retonan relaciona cu clima cu ta remodela economia y forsa laboral. Dentro di e temanan aki, siete estudio ta analisa dimensionnan critico di desigualdad y vulnerabilidad, ofreciendo analisisnan basa riba dato y recomendacionnan accionabel cu e intencion di guia esnan cu ta traha politica pa intervencionnan practico.

Den e area di realidadnan economico y igualdad social, e rapport ta subraya tres asunto urgente: desigualdad di genero, presion impulsa pa inflacion riba e clase media, y e posicion precario di trahadornan hoben.

Un estudio ta revela cu aunke Aruba a haci progreso considerabel den reduccion di desigualdad di genero durante decadanan, e progreso aki no a traduci den ganashi economico corespondiente. Un tasa di participacion stagna den forsa laboral bou di hende muhe y un diferencia di salario di genero persistente ta sigui limita crecemento potencial. E estudio ta pidi pa auditoria obligatorio di pago di genero, areglonan di trabou mas flexibel, y mehoracion di datonan specifico pa genero pa informa e politica miho.

Un otro analisis ta enfoca riba desigualdad di inflacion, hayando cu e casnan di entrada mediano di Aruba a soporta e aumentonan mas fuerte den gastonan di bida—particularmente for di gastonan di transporte. Como cu un clase media fuerte ta e fundeshi di crecemento inclusivo, e rapport ta adverti cu presion inflacionario continuo ta core riesgo di amplia e divisionnan socioeconomico a menos cu proteccionnan dirigi ser poni na nan luga.

Un di tres estudio ta analisa e retonan cu hubentud di Aruba ta confronta, cu ta sigui experiencia cifranan di desempleo desproporcionalmente halto den e economia despues di pandemia. Door di amplia e lens di desempleo so pa un concepto mas holistico di “seguridad laboral,” e investigacion ta mustra cu hobennan no solamente mester di trabou pero tambe proteccion di entrada, representacion, y trayectonan pa careranan significante y stabiel.

E di dos area tematico—seguridad fundamental pa prosperidad humano—ta bira condicionnan esencial di stabilidad diario: cuminda y preparacion financiero.

Un evaluacion integral di seguridad di cuminda ta haya cu aunke Aruba ta perform mihor cu hopi isla Caribense den prevencion di inseguridad di cuminda severo, buraconan grandi ta keda. E dependencia pisa di e isla riba importacion y su vulnerabilidad pa interupcionnan di cadena di suministro mundial ta pone casnan na peliger, particularmente esnan cu buffernan financiero limita. Ta urgi esnan cu ta traha politica pa fortalece sistemanan di cuminda local, amplia rednan di seguridad, y inverti den strategianan cu ta mehora e stabilidad di e suministro di cuminda.

Otro estudio ta evalua alfabetisacion financiero bou di studiantenan den e sistema di enseñansa superior di Aruba usando un cuadro desaroya pa OECD. E resultadonan ta revela cu mientras cu studiantenan generalmente ta demostra actitudnan positivo y comportacion financiero diario cuidadoso, hopi ta falta strategianan financiero mas amplio cu ta construi resiliencia a largo plaso. E rapport ta boga pa incorpora educacion financiero practico den tur curriculum y fomenta asociacionnan entre institutonan educativo, publico y priva.

E seccion final di e rapport, adaptando na un clima cu ta cambia, ta analisa tanto menasanan sistematico como inmediato cu ta surgi for di cambio ambiental.

Un capitulo ta evalua e riesgonan emergente envolvi den e transicion di Aruba pa energia renobabel. Mientras cu e cambio ta esencial pa sostenibilidad a largo plaso, e ta introduci tambe vulnerabilidadnan nobo—incluso riesgonan cibernetico pa sistemanan di energia digitalisa, tensionnan geopolitico rond di mineralnan critico, y exposicion na eventonan di clima extremo. E estudio ta enfatisa cu resiliencia di energia lo rekeri maneho cu ta pensa pa futuro y mitigacion di riesgo amplio den cada etapa di e transicion.

E capitulo di clausura ta enfoca riba e costo humano di calor extremo—un impacto di clima cu ya ta afecta e forsa laboral intensivo na Aruba, specialmente den e sector di turismo. Temperaturanan cu ta aumenta ta disminuyendo productividad y ta pone bienestar di trahador na peliger. E investigacion ta propone un cuadro di gobernacion nacional di calor, proteccionnan di calor ocupacional mas fuerte, y practicanan di planificacion urbano—manera infrastructura basa riba naturalesa—cu ta reduci exposicion na calor den areanan densamente pobla.

E rapport nobo di politica di Centrale Bank van Aruba (CBA) ta pinta un potret convincente di un nacion na un momento critico. Aruba ta enfrenta un convergencia di presionnan economico, social, y ambiental cu no por ser soluciona den isolacion. Toch, dentro di e retonan aki tin oportunidadnan pa diseña un futuro cu ta mas inclusivo, mas resiliente y mas husto.

E rapport ta conclui cu un yamada pa accion: esunnan cu ta traha politica, negoshi y lidernan di comunidad mester compromete nan mes na strategianan basa riba evidencia, anticipa riesgonan a largo plaso, y hancra cada decision di politica den e bienestar di e hendenan mas afecta. Sea e asunto ta desigualdad di salario, aumento di gastonan di bida, riesgonan di clima, of e vulnerabilidadnan di hubentud, e solucionnan ta rekeri responsabilidad colectivo y vision strategico.

Cu e ultimo edicion aki di Governing from the future, e mensahe ta cla: igualdad no ta un tema—e ta un necesidad, y goberna for di futuro ta nifica sigura cu cada Arubiano tin e seguridad, oportunidad, y resiliencia pa prospera den e decadanan cu ta bin.