Recientemente Secretario di Estado pa Digitalisacion y Relacionnan di Reino, Zsolt Szabó a contesta preguntanan cu el a ricibi for di miembro di Tweede di Kamer, Raoul White tocante e parto temporal di financiamento di Merca pa organisacionnan humanitario na islanan CAS.
Primeramente parlamentario White (GroenLinks/PvdA) a puntra kico ta e impacto di e paro temporal di financiamento di parti di Merca na Corsou, Aruba y Sint Maarten (e islanan CAS) den general y specificamente pa organisacionnan humanitario, riba sector di salud y educacion, y tambe riba asistencia legal y educacion legal pa persona indocumenta, migrante y hendenan cu ta busca proteccion.
Contestando e pregunta Secretario di Estado Szabó a splica cu pa motibo cu e fondo di United States Agency for International Development (USAID) a baha, tin menos financiamento disponibel pa proyectonan di desaroyo mundial. Esaki, el a indica, tin efecto tambe riba e organisacionnan internacional y social cu ta traha na Aruba, Corsou y Sint Maarten ya cu e organisacionnan aki ta activo den diferente area y e impacto ta varia segun e organisacion y segun si nan a ricibi financiamento directo of indirecto di parti di Merca.
El a remarca cu no ta un responsabilidad di gabinete Hulandes pa duna claridad riba e fondo aki of pa haci investigacion riba e posible impacto di e paro aki, y cu ta e gobiernonan di e paisnan autonomo tin e responsabilidad principal pa compensa e falta di e fondo di parti di Merca.
Parlamentario White a pidi e Secretario di Estado pa indica kico ta e consecuencianan concreto si e financiamento keda para. Secretario di Estado Szabó a splica cu gabinete Hulandes no por indica e consecuencianan concreto si e financiamento di USAID keda para definitivamente.
El a remarca cu e responsabilidad principal ta riba e gobiernonan di e paisnan autonomo pa compensa parcialmente e falta di fondo. El a splica como ehempel, cu e autoridadnan di Corsou a duna un donacion unico na algun organisacion, incluyendo Fundacion Salud pa Tur, pa nan por sigui ofrece cuido primario pa hende indocumenta na Corsou. El a agrega cu Hulanda tambe a contribui cu un aporte modesto den 2024 na Salud pa Tur.
E parlamentario a puntra tambe si tin consecuencia concreto riba Boneiro, Sint Eustatius y Saba (e islanan BES), specialmente Boneiro, awor cu proyectonan importante na Aruba y Corsou no ta ricibi financiamento (temporalmente). E Secretario di Estado a contesta cu no tin indicacion cu lo tin consecuencia concreto pa e islanan BES.
Parlamentario White a puntra e Secretario di Estado si e ta mira e importancia di e proyectonan cu tabata ser realisa cu es financiamento den general y specificamente pa e sector social. Contestando e pregunta Secretario di Estado Szabó a splica cu e ta reconoce e importancia di e proyectonan aki.
El a sigui splica cu Aruba, Corsou y Sint Maarten tin un sector social cu hopi organisacion activo cu ta traha pa bienestar di nan pueblo. El a indica cu e proyectonan cu e parlamentario ta referi na dje ta regularmente financia parcialmente pa USAID, hunto cu otro fuente di fondo. El a reitera cu ta den man di e gobiernonan local mes pa traha hunto cu sector social pa mira kico por ser haci si e fondo no ta yega mas pa realisa dicho proyectonan.
E parlamentario tambe a puntra con e Secretario di Estado ta mira e situacion desaroya despues di e paro di tres luna cu a ser indica di parti di Merca, na cual e Secretario di Estado a splica cu dia 10 di maart, minister di Asuntonan di Exterior di Merca a duna un indicacion di e grado di e recorte structural cu lo sigui e paro.
El a splica cu informacion adicional a sali recientemente via medio Americano cual ta indica cu e idea ta pa para gran mayoria di actividadnan di USAID, como tambe un gran parti di e programanan di ayudo di Departamento di Estado. El a indica cu e decision final ainda no a ser tuma, pero e consecuencianan mundial por ta considerabel. Cu 27% di e gasto mundial di ayudo, Merca ta e donador individual mas grandi.
Contestando e pregunta di e parlamentario si e ta den dialogo cu e islanan CAS tocante e consecuencianan di e paro di financiamento di USAID, Secretario di Estado Szabó a splica cu durante e reunionnan di gobierno recien cu el a tene cu e paisnan den Caribe, nan a toca e tema aki y e posibel consecuencianan di esaki.
Parlamentario White a puntra Secretario di Estado Szabó si e ta reconoce cu e desaparicion di e proyectonan ta un responsabilidad pa Reino, door di e relacion estatal special cu e islanan CAS, na cual e Secretario di Estado a contesta cu e no ta reconoce esaki. El a splica cu e relacion estatal special no ta nifica cu Reino tin e responsabilidad pa compensa pa e desaparicion di e financiamento externo y a remarca cu e ta un responsabilidad principal di e paisnan den Caribe.
E parlamentario a puntra tambe si Hulanda ta dispuesto pa pensa hunto riba otro fuente di financiamento, manera fondo humanitario internacional of subsidio Europeo, y tene un rol facilitante.
Secretario di Estado a splica den su contesta cu organisacionnan social tin e libertad pa tuma contacto cu fondonan humanitario y ta den nan propio man pa haci solicitudnan nobo. El a indica cu Hulanda ta dispuesto pa tene un rol facilitante.
El a sigui splica cu tin diferente fondo Europeo cu por ser usa. Pa Boneiro, Sint Eustatius y Saba, e “speciaal gezant” ta yuda cu e solicitudnan. Aruba, Corsou y Sint Maarten por pidi mesun tipo di yudansa di Hulanda si nan kier, pero te awor, esey no a tuma luga.
El a agrega cu e paisnan CAS tambe por usa e servicio di e “National Contact Points” (NCP) di RVO cu ta yuda e proceso di solicitudnan y ta organisa training y reunionnan informativo. PA esaki tambe Hulanda por tin un rol facilitante, si nan ta pidi pa esaki.
Parlamentario White a puntra si Hulanda y e islanan CAS ta reconoce e trabou esencial cu organisacionnan local y internacional ta haci pa persona cu ta busca proteccion. Contestando e pregunta Secretario di Estado Szabó a splica cu Hulanda ta reconoce e rol importante cu e organisacionnan local y internacional por tin den e cadena migratorio pa proteccion y promocion di derecho humano.
El a indica cu e parti di experiencia y bon practica por sirbi como instrumento valioso pa e autoridadnan y sector social. Organisacion internacional manera UNHCR ta ser usa pa duna conseho riba implementacion di politica di migracion.
Relaciona cu e situacion actual na Venezuela, e parlamentario a puntra si Hulanda ta considera cu algun Venezolano na islanan CAS mester di proteccion specifico, na cual Secretario di Estado Szabó a contesta cu politica di entrada ta un asunto di cada pais y ta cay bou responsabilidad di e minister di Husticia di e paisnan den Caribe. Tur pais den Caribe mester respeta e tratado Europeo di Derecho di Hende (EVRM).
El a indica cu Venezolanonan por apela riba articulo 3 di EVRM si nan ta enfrenta riesgo real na maltrato. E persona mes mester proba es riesgo. E autoridadnan mester evalua cada caso separa, y si e riesgo ta real, e persona no por ser deporta.
El a remarca cu pa Hulanda, e situacion na Venezuela no ta ser considera excepcional. Esaki ta nifica cu un persona cu mester bolbe no ta automaticamente considera un victima di persecucion y mescos ta conta pa e paisnan den Caribe.
Por ultimo, parlamentario White a puntra si Hulanda, como e pais mas grandi den Reino, ta sinti responsabilidad pa e impacto di e decision riba derecho humano di hende na e islanan CAS, incluyendo hende indocumenta, migrante y personanan cu ta busca proteccion.
Secretario di Estado Szabó a splica cu den Reino Hulandes, migracion—incluyendo entrada, asilo, y derechonan humano—ta un asunto di cada pais. Aruba, Corsou y Sint Maarten tin e responsabilidad pa cu esaki. E cooperacion ta basa riba igualdad, consenso y bon relacion.
El a remarca cu gabinete Hulandes ta kere cu derechonan humano mester ser respeta globalmente y cooperacion cu e islanan CAS ta enfoca riba optimalisa e sistema migratorio segun e deseo y necesidadnan di cada pais.
