Segun Sharline Koolman di DVG: Dr. Choudhry lo ehecuta transfusion cu plasma pa pashent cu Covid-19

Otro siman e prome pashentnan lo haya transfusion di plasma for di otro pashentnan cu a recupera di coronavirus/Covid-19.

E posibilidad aki ta producto di un investigacion di hospital lidera pa Dr. Zaheeb Choudhry kende ta Internista-Nefrologo. E investigacion aki ta pone Aruba na vanguardia di e prome pais den region riba investigacion y uso di plama contra Covid-19.

Dialuna anochi, Sharline Koolman di departamento di Salubridad Publico (DVG) a duna un actualisacion relaciona cu e desaroyo y uso di e investigacion aki. El a bisa cu DVG a haya sa for di Dr. Choudhry cu nan haya tres persona e siman aki como candidato of donante pa saca e plama. Ademas e otro siman esaki lo wordo usa.

Ya caba otro paisnan manera Hulanda, Suiza y Merca ta bin haciendo uso di e plasma pa salba bida di esnan cu ta hopi malo cu e virus aki. Dr. Choudhry a yega di splica cu nan ta saca plama for di un pashent cu a recupera di e coronavirus. E pashent aki den su curpa el a produci anti curpa. E ta un forma pa yuda otro pashent malo den su recuperacion.

Manera ta conoci, Aruba ta e prome pais pa investiga uso di plasma pa Covid-19 den region di Centro y Sur America. Dr. Choudhry a trece confiansa riba e uso di e plasma aki, y el a bisa cu e tratamento aki ta uno confiabel. Ya caba nos a yega di trata cu plasma mas cu 50 aña caba pa medio di bloedbank. E ta haya cu nos por haya mas chens di haya un accidente den trafico na Aruba, cu un persona por haya un reaccion alergico pa motibo do transfusion di plasma.

Durante un conferencia di prensa, Dr. Choudhry a referi na e control of purificacion cu lo wordo haci prome cu e transfusion di plasma ta sosode. Esaki pa zorg cu e pashent no lo haya e malesa transferibel cu e plasma; of anticurpa contra su grupo di sanger. El a contesta Bon Dia Aruba bisando cu nan tin un protocol pa basta aña den bloedbank ora cu tin un donado di sanger. Den e protocol ora un persona ta duna plasma nan tin proceso y manera implementa pa hopi aña caba pa asina evita e posibilidad di un infeccion of grupo di sanger no compatibel.

Igualmente el a laga sa cu nan tin test pa check e cantidad di anticurpa. Y solamente ora cu e anticurpa ta halto, nan sa cu tin e suficiente cantidad di anticurpa pa mata e virus directamente, y nan ta us’e.