Un sector cu gobierno ta considera relevante pa diversifica nos economia ta agricultura. Pero e problema ta sinta pa basta aña riba suministro di awa na prijs rasonabel.

Sr. Filomeno (Boey) Marchena a yega di declara na Bon Dia Aruba cu tin diferente sistema cu nos por desaroya na Aruba pa abastece nos sector primario di agricultura di awa. Segun Marchena nan ta sistema sostenibel. Ademas UNESCO ta hopi na fabor di esey.

Sr. Marchena tin un trayectoria profesional largo na servicio di WEB N.V. Ademas el a bin cu e catedra di Sustainable Water Technology and Management den e facultad di Ingenieria na University Of Curaçao cu ta conta cu e respaldo di UNESCO.

Segun Marchena ta existi sistemanan beneficioso y mas barata pa abastece e sector di agricultura di awa. Pero esun cu e ta haya mas factibel ta si nos por logra traha damnan den e rooinan pa acumula e awa di yobida cu awor ta bay perdi pa lama. E sistema aki lo por recoge e awanan ey. Te hasta laga e awa bay abou pa subi e nivel di awa bao tera. Sigur esaki ta produci hopi awa pa agricultura. “E sistema ey nos mester desaroya,” el a bisa.

UNESCO ta hopi pro di e idea aki. Na december 2012, UNESCO a tene su conferencia regional na Aruba. Ora cu el a yega di presenta e idea aki, nan a yega di informa cu na Mexico nan tin e sistema aki implementa caba. Nan ta ‘gaviones’ cu ta e dam cu piedranan cu net poni. E ta haya factibel cu nos por bin cu un planta piloto pa hacie cu un di nos rooinan. Pero pa bin cu algo asina mester di boluntad politico. Un gobierno cu por para atras di e iniciativa aki.

Tin otro sistemanan, por ehempel esun di desalinisa awa cu solo. El a purba desaroya e sistema aki cu ta produci mas awa. Mas of menos bo ta haya cuater liter pa meter cuadra di e superficie di e glas pa desalinisa awa pa medio solar. E ta realisa cu e sistema aki por ta pa agricultura grandi ta resulta un poco costoso. Pero e ta keda un alternativa sostenibel cu ta pas cu nos condicion, ya cu Aruba ta gosa di hopi solo. Mientras cu awa bao tera ta brak y bo por desalinisa pa medio di e sistema aki.

Tambe tin e sistema di acuaponia, caminda bo por uza e baki di pisca, cuminda di pisca, y tambe e sushi di pisca pa bira un fertilisante, ora bo ta pas’e dor di un micro filter. E ta haya cu bo por purba haci e sistema aki mas factibel.

E ta bisa cu mata ta crece bon den awa so, pero si e ta planta den tera y e ta crece mucho mas miho. Un investigacion cu Marchena ta pensando bin cune ta pa bin cu e mesun sistema di acuaponia, y tambe e mesun sistema pa e microfiltracion, pa kibra e elementonan cu no ta bon pa e mata, y produci manera nitrato cu ta mas beneficioso pa e matanan, pero planta mata den tera cu e sistema di daknan berde, cu hasta riba dak nan por pone e matanan. E sistema mes ta haya e awa y e ta filter. Kiermen bo ta catch e awa ey y purifik’e.

Marchena a yega di traha un concepto huridico relaciona cu tur e ciclo di produccion di awa. Tur e ordenansa nan gubernamental pa full e ciclo di awa cu a wordo traha cu diferente hende. E ta spera cu gobierno lo por tum’e bek pa wak si nan por yega na e ley. E spirito di e concepto huridico aki ta busca salvaguardia y protege full e ciclo di awa.