Manera ya caba a ser publica, recientemente prome minister Mike Eman a reuni cu directiva di Camara di Comercio (KvK). Durante e reunion, e punto cu a bin dilanti tabata e necesidad pa logra un contribucion mas husto di e sector hotelero na desaroyo di pais Aruba. Reaccionando riba esaki, CEO di AHATA Tisa LaSorte a remarca cu combersacionnan tocante contribucion mas husto di e sector hotelero mester tuma luga cu esnan cu conoce e sector bon.
Segun e noticiero local Noticia Cla a reporta, e reaccion di e CEO di Aruba Hotel and Tourism Association (AHATA) a bin despues cu KvK a reuni cu prome minister Eman y a indica cu e topico di necesidad pa logra contribucion mas husto di e sector hotelero na desaroyo di Aruba tabata un punto importante di dialogo.
Gobierno di su banda, segun e mandatario, no lo impone nada, pero mas bien ta propone un dialogo constructivo pa yega na un acuerdo unda e sector por contribui un tiki mas den forma di pago di salario di nan empleadonan, pero tambe locual e sector ta aporta na caha di gobierno.
CEO di Aruba Hotel & Tourism Association (AHATA) a indica na e portal di noticia local cu e combersacion tocante e topico aki “mester tuma luga cu representante di hotel cu conoce e realidad di e sector, e inversionistanan cu a acepta e invitacion pa crea trabou na Aruba y sostene e economia, y pa basa e combersacion riba datos real y no sentimento y rumor.”
Anteriormente tambe a ser publica cu gremionan comercial, esta AHATA, CUA y ATIA, a manda un carta pa Camara di Comercio (KvK) y Gobierno di Aruba rectificando cu e organisacion di registracion no ta representante oficial di e sector priva ni ta un organisacion oficial di dunador di trabou.
Segun definicion di ILO (International Labour Organization), solamente gremio na cual companianan priva ta scoge di ta miembro, ta considera un gremio di dunador di trabou.
Aunke Camara di Comercio ta un Sui Generis, e ta un organisacion cu ta cay den sector publico y tin un responsabilidad oficial como consehero di gobierno y registracion di compania na Aruba pa gobierno.
Como tal, e gremionan comercial ta clarifica cu Gobierno ni comunidad por considera Camara di Comercio como un instancia cu tin derecho pa ta voz di dunador di trabou den e sector priva.
