Segun un encuesta, mayoria Hulandes ta sostene prohibicion nacional di klapchi

(NLTimes) – Mayoria di ciudadano na Hulanda ta sostene un prohibicion di klapchi nacional cu ta bay drenta na vigor na 2026, pero ta bisa cu e lo ta efectivo solamente si e aplicacion bira mas severo, segun un encuesta di Ipsos I&O encarga pa Binnenlands Bestuur.

E investigacion ta mustra cu 62% di e encuestadonan ta mira e prohibicion nacional di klapchi positivamente of hopi positivo. Na mesun momento, skepticismo tocante aplicacion ta generalisa, cu 83% ta bisa cu e prohibicion lo tin sentido solamente si autoridadnan reprimi mas estrictamente.

Oposicion ta keda substancial. Un di cada cinco encuestado, of 20%, ta mira e prohibicion negativamente of hopi negativo, mientras cu 15% ta bisa cu nan no ta ni positivo ni negativo.

A pesar di duda, mayoria hende ta bisa cu nan tin intencion di cumpli unabes cu e prohibicion drenta na vigor. Segun e encuesta, 83% ta bisa cu nan lo sigui e reglanan na 2026. Mas o menos 10% ta bisa cu nan lo ignora e prohibicion y sigui cende klapchi, mientras cu 7% ta bisa cu nan no sa ainda kico nan lo haci.

E sosten pa e prohibicion ta varia hopi pa preferencia politico. Votadornan di GroenLinks-PvdA ta e patrocinadornan mas fuerte, cu 75% ta bisa cu nan ta mira e prohibicion hopi positivo y otro 16% positivo. Mayoria di votadornan di D66 y CDA tambe ta sostene e prohibicion. Entre e votadornan di VVD, 54% a bisa cu e ta positivo of hopi positivo, aunke e incertidumbre ta mas halto den e grupo aki, cu alrededor di un di cada cinco cu no ta sostene ni ta opone e medida. E sosten bou di e votadornan di JA21 ta para na 49%.

Resistencia ta mas fuerte bou di votadornan di PVV y Forum voor Democratie. Simpatisantenan di PVV ta dividi, cu 39% cu abisa cu e prohibicion ta positivo of hopi positivo y 40% negativo. Oposicion ta mas pronuncia bou di votadornan di Forum voor Democratie, caminda 45% ta husga e prohibicion negativamente of hopi negativo, compara cu 32% cu ta mir’e positivamente of hopi positivo.

Esnan cu ta sostene e prohibicion ta cita seguridad como un motibo clave. “Hopi hende ta enfatisa cu e prohibicion di klapchi lo contribui na seguridad general rond di aña nobo, pa tanto hende como bestia,” investigador di Ipsos I&O Dionne van Lint a bisa.

Asina mes, e confiansa den aplicacion ta abou. Un mayoria di e encuestadonan, 58%, ta kere cu un prohibicion di klapchi nacional no por ser imponi efectivamente, subrayando e preocupacionnan cu e politica por cay cortico sin supervision y accion mas fuerte di parti di autoridadnan.