Algun dia atras a tuma nota riba varios medio local y di Reino cu a cuminsa circula e noticia cu e buskeda di e yate Energy y e 4 piscador abordo a keda oficialmente clausura, despues di 15 dia cu a pasa e buskeda oficialmente na man di Colombia.
Desaparicion
Recordando algun di e detayenan di e caso, ta trata di e desaparicion cu a reporta dia 12 di juli, unda e yate yama “Energy” a perde den lama. Durante e dianan cu a sigui despues di esaki, e buskeda di Wardacosta di Aruba y partnernan internacional a tuma lugar, y minister di Husticia mr. drs. Arthur Dowers a duna un declaracion na prensa unda a sigura e comunidad cu tabata haciendo tur esfuerso posible pa yega na e piscadonan.
E tempo aya gobierno a publica un comunicado unda a informa cu Kustwatch tabata haciendo tur su esfuerso y a haci uso di modelonan computarisa maritimo manera coriente di lama, direccion y forsa di biento pa haci calculacion di mas o menos den cual area e boto por tabata, sinembargo e esfuersonan aki tabata en vano. Mientras tanto, no por a descarta cu e yate a sali for di e awanan teritorial di Aruba, pa cual a tuma contacto cu autoridadnan Colombiano pa brinda sosten den e buskeda.
Premier Mike Eman tabata duna actualisacion frecuente na prensa local tocante e caso, unda entre otro for di Mariniers Kazerne el a informa prensa local cu tabatin reunionnan “basta largo” cu tanto miembronan di Kustwacht y famia di e desaparecidonan, unda Kustwacht tabata duna un resumen di tur e investigacion cu tabata andando. Segun Eman a declara e tempo aya, tur e aparatonan di Kustwacht tabata bao uso, y tabata haciendo buskeda pa varios ora cu avion y helicopter entre otro.
Hefe Kustwacht, Capitan Mark Solognier, a bisa tambe e tempo aya cu tabata buscando den un area “basta leu” cu e avion. “Nos no ta give up. Nos ta sigui busca te unda cu por,” e capitan a declara. El a agrega tambe cu tabatin “un bon contacto cu Venezuela y Colombia tambe” den e parti di Search and Rescue. Un noticia cu a hala hopi atencion na Aruba e tempo aya tabata di canal 10 di Nicaragua, unda a reporta cu un barco “tipo panga cu cuatro tripulante a naufraga diamars ultimo” den Caribe Sur. E nabegantenan a keda rescata pa otro barco y transporta pa tera firme. Soldadnan di Distrito Naval Caribe a recupera e barco pero a perde e motor. Segun e noticiero, a nota cu e identidad di e tripulantenan y nan destino na e momento di e naufragio no tabata conoci, cual a lanta speransa den comunidad local cu por a trata di e piscadornan di Aruba. Sinembargo, e noticia aki na final no a keda vincula na e desaparicion di e cuatro piscador Arubiano.
E buskeda a sigui y te hasta expande internacionalmente, pero lamentablemente esaki no a duna resultado. Den un di su actualisacionnan prome minister Eman a informa cu te hasta avion di Kustwacht tabata bulando riba area hopi grandi na e costa di Colombia y a informa cu contacto tabata andando cu Kustwacht tocante e siguiente pasonan cu lo tuma. Den e pasonan aki a papia tocante e posibilidad cu Colombia lo hunga un rol “hopi mas intensivo” den caso cu e buskeda no duna resultado.
Mirando cu esaki tabata e caso, Kustwacht a reuni hunto cu famia di e cuatro piscado cu a perde riba lama y a informa cu lo pasa e caso over na Wardacosta Colombiano, mirando cu e area di e buskeda a drenta completamente den nan area di responsabilidad. Segun Kustwacht a informa, wardacosta di Caribe Hulandes a pasa e caso over na Wardacosta Colombiano, mirando cu e area di buskeda a drenta completamente den nan area di responsabilidad, aunke a enfatisa cu lo sigui cu un bista skerpi durante di nan patruyahe.
Den un conferencia di prensa cu a tuma lugar, prome minister Mike Eman a bisa cu durante un reunion virtual cu e operacion di wardacosta y Forsa Arma di Colombia, a papia tocante e traspaso aki. Consul di Colombia, Gustavo Serrano Amaya, a bisa cu for di prome momento cu premier Eman a inform’e di e suceso, el a tuma contacto cu Armada di Colombia, particularmente cu Centro di Operacion di Cartagena y Bogota, pa por yuda den coordinacion di buskeda.
Alrededor di 15 dia despues di e traspaso aki, tanto medionan local como internacional a cuminsa reporta cu a oficialmente clausura e buskeda di e yate aki, sinembargo esaki a genera confusion y tabatin indicacion cu esaki no ta e caso. E confusion aki surgi posiblemente pa motibo cu a informa cu e buskeda a ser para localmente na Aruba, sinembargo esaki no ta representa e situacion pa e buskeda cu ta andando internacionalmente te ainda, esta den man di Colombia. Usuarionan riba rednan social a expresa confusion y a comenta cu esaki no ta cuadra cu e realidad y cu e buskeda di parti di autoridadnan internacional te ainda ta andando, cu familiar di e piscadornan involucra tambe confirmando esaki, bisando cu te ainda no a stop cu e buskeda.
A raiz di tur e confusion cu ta surgiendo, Bon Dia Aruba a acerca Kustwacht directamente pa haci pregunta tocante e caso aki y asina trece claridad for di fuente oficial. Nos a tuma contacto cu e vocero di Kustwacht Sr. Miguel Gonzalez Perret-Gentil, y el a confirma cu “te ainda Colombia ta buscando. Wardacosta di Colombia ta bezig cu e buskeda” y a informa cu te ainda no tin informacion concreto tocante con e buskeda na Colombia ta bayendo.
