Autoridadnan occidental ta hayando dificil pa evita efectivamente exportacion di petroleo di Rusia y Iran. Mediante un “flota scondi” di tanker, ambos pais ta evadiendo sancionnan internacional – hopi biaha literalmente door di nabega bao bandera falso. Un investigacion di Follow the Money ta revela cu Hulanda ta para na banda sin por haci nada mientras alrededor di 90 tanker ta bula falsamente e bandera di Aruba, Corsou of Sint Marten – paisnan parti di Reino Hulandes, pero sin nan propio registro oficial di barco.

Maske Sint Maarten, Aruba y Corsou no por emiti registro legal di barco, al menos nobenta tanker di petroleo y gas actualmente ta bula bao nan bandera. Esaki ta registracionnan falso, yudando fuel un red masivo y ilegal di contrabanda. Aproximadamente tres cuarta parti (73 di e 92 barco identifica) ta transportando petroleo di Iran of Rusia. Casi mita (39) ya ta riba lista di sancion Occidental.

Cada cargamento ta bal decenas di miyones di dollar, y segun Departamento di Tesoro Mericano, e placa hopi biaha ta yega gruponan manera Hezbollah, e Guardia Revolucionario Irani, e rebeldenan Houthi na Yemen, y hasta e mashin di guera Ruso.

Pasobra e islanan di Caribe en cuestion ta parti di Reino Hulandes, e operacion aki cu bandera falso ta mancha e reputacion internacional di Hulanda, a pesar cu e gobiernonan no tin control riba e barconan aki.

Barconan sin registro valido y sin bandera reconoci ta efectivamente sin estado. Esaki ta nifica cu no por sigura nan, nan ta opera sin supervision maritimo, no ta suheto na inspeccion di seguridad, y ta presenta un riesgo ambiental y di seguridad.

En efecto, esakinan ta bom flotante. Desde 2012 (Iran) y 2022 (Rusia), mientras sancionnan a bira mas fuerte, contrabandistanan a cuminsa usa “bandera di conveniencia” emiti pa estadonan cu aplicacion maritimo debil – manera Gabon, Palau y Togo. Mientras cu e paisnan aki ta rekeri pa check cumplimento, aplicacion ta poco exigente. Loke ta nobo y alarmante ta e cambio na pais of teritorio manera Sint Maarten, cu absolutamente no tin registro di barco. Toch tanker ta nabega cu documento bisando cu nan ta registra eynan.

Inspector di Sint Maarten: “Cos a bira hopi malo”
 “Prome, estafadornan a falsifica certificado di marinero,” segun Paul Ellinger di e inspectorado di barco na Sint Maarten. “Awo nan ta registrando barconan completo: tanker di petroleo, barco di carga”, tur tipo di barco.

Ellinger ta enfrentando cada bes mas pregunta di autoridadnan internacional. Su oficina ta ricibi reportahenan tocante tankernan supuestamente registra na Sint Maarten, mientras su isla no tin manera pa emiti documentonan asina.

Un mercado pa registro falso
 E aumento skerpi den barco cu bandera falso ta en parti un resultado no intencional di aplicacion occidental. Mientras Union Europeo y Merca ta pusha paisnan pa no registra barconan sanciona, paisnan cu antes tabata permiti barco pa registra bao di su bandera, manera Panama, a deslista mas cu 100 barco. Pero esaki simplemente a pusha doñonan di barco den mercado di fraude.

Segun Organisacion Maritimo Internacional (IMO) di ONU, e cantidad di barco bao bandera falso a aumenta na 222 den apenas dos aña.

“Nos a sanciona di mas,” segun consultant di seguridad maritimo, Ian Ralby. “Nos a crea un mercado paralel. Door di castiga Rusia, Iran y otronan fuera di estadonan bandera regula, nos a pusha nan den sombra.” Un “estado bandera” ta e pais bao cual su ley un barco ta registra, bulando su bandera oficialmente. Basicamente, e ta e nacionalidad oficial di un barco.

MSTA: Fabrica di fraude
 Den centro di e fraude tin un compania yama MSTA (Maritime Safety & Technical Administration). E ta bisa di ta basa na Beverly Hills, California – pero registro y comunicacion ta sugeri cu e operacion ta opera for di India.

Entre mei 2024 y juni 2025, MSTA a emiti registracion pa 76 tanker, di cual 40 porciento ya tabata sanciona na momento di e registracion.

MSTA tambe a bende certificado di competencia falso na al menos 60 marinier di India, Azerbaijan y Turkia, dunando nan permiso pa traha den barco nabegando bao bandera di Sint Maarten.

Un victima, capitan Kypros Kolios di Cyprus, a bisa cu el a paga $2,750 pa documento, pero no a ricibi nada.

Barconan notorio den e flota scondi ta inclui James II, un barco 20 aña bieu cu anteriormente tabatin bandera di Tanzania. Desde mei 2024, e tin bandera di Sint Maarten y ta transporta petroleo entre Iran y China.
Canis Power, bendi pa un compania Griego pa $21 miyon na 2023, despues a drif sin coriente cerca di awanan Danes, transportando petroleo Ruso. El a pasa den dos cambio di nomber y cuatro cambio di bandera, terminando su bida como “Dhezi” na Alang, India.
Legacy 2: Registra na juni 2025, recientemente a bay den un ruta clasico di contrabanda: a piki petroleo Irani na Estrecho di Hormuz, y a entreg’e na refinerianan Chines conoci pa ignora sancion.

Algun barco, manera e Metagas Everest y Pioneer, ta propiedad di compania Ruso, Arctic LNG 2 y ta sanciona pa Union Europeo y Reino Uni.

E berdadero doño di hopi di e barconan ta scondi tras di decenas di compania falso den Emirato Arabe Uni, Hong Kong y Malaysia. Varios ta vincula na Sepehr Energy, un compania estatal Irani sanciona na november 2023 pa facilita transport ilegal di petroleo.

Algun barco mara na MSTA ta conecta na Sa’id al-Jamal, un comerciante naci na Yemen, awo basa na Iran.

Segun autoridadnan Mericano, e ta usa un red compleho pa manda azeta Irani na Asia y Africa, canalisando e ganashi na Hezbollah, e Guardia Revolucionario Irani, y e rebeldenan Houthi.

MSTA tambe ta parce di ta tras di registronan falso pa Matthew Island (un isla den Pacifico perteneciendo na Francia), East Timor y Laos (un pais sin acceso na lama). E supuesto websitenan di registro di barco pa e “paisnan” aki tur ta redirigi na e website di MSTA, “Registro di barco di Sint Maarten” – atrobe listando un adres na Beverly Hills.

Respuesta debil di gobierno Hulandes
 Na april 2024, Hulanda a adverti IMO tocante certificadonan fraudulento cu ta bisa di bin for di Sint Maarten. Na januari 2025, explicitamente a nombra MSTA. Pero e advertencia a yega mucho laat: ya pa e tempo ey, MSTA a expande den registro di tanker.

Ministerio di Infrastructura Hulandes ta admiti cu nan no sa cuanto documento falso ta existi, y nan no tabata na altura cu mayoria di e tanker involucra ta pertenece na e flota scondi cu ta evadiendo sancion.

“Tur teritorio di Reino ta cada bes mas plaga pa certificado falso,” segun un vocero di e ministerio.

Di su banda, IMO ta bisa cu e paisnan mes mester tuma accion. Pero experto Ian Ralby ta critica IMO pa no tin blacklist of whitelist, cu ta hacie mas dificil pa detecta fraude.

Paul Ellinger di Sint Maarten ta bisa cu decenas di marinier estafa pa MSTA a acerca nan pa ayudo. “Esaki ta dañando e nomber di nos pais. Y ya cu nos ta parti di Reino Hulandes, ta mancha henter e Reino.”

Experto di ley maritimo, Frank Stevens di Universidad Erasmus ta di acuerdo. “Esaki por bira un problema mayor pa gobierno Hulandes. Estadonan bandera legitimo no kier estafadornan bendiendo nan bandera.”

Pero e ministerion Hulandes ta keda relativamente sin preocupacion. “E hecho cu nos ta reportando fraude activamente ta mehora nos reputacion den e sector aki.”

Nan tambe ta insisti cu e responsabilidad di cumplimento ta cay riba Sint Maarten mes – un posicion reta pa e isla, cu ta bisa cu no tin capacidad pa investiga crimen fuera di su fronteranan.

Potret di ilustracion.