Diaranson a tuma luga e conferencia di prensa durante cual Fundacion Anti Droga Aruba (FADA) hunto cu Piso Tres y Aruba Bank a anuncia e segundo edicion di e conferencia dedica na salud mental “Mind Matters”. E aña aki e tema oficial ta bira “Note to Self: We Need to Talk” y lo enfoca riba con un persona por tene un combersacion cu su mes.

Zilha Wever di Piso Tres a splica cu en conexion cu luna di mei nan ta organisa e segundo edicion di e conferencia di “Mind Matters” cu tin como meta enfoca riba prevencion di salud mental.

Aña pasa a organisa e prome edicion y tabata tambe e prome conferencia di salud mental na Aruba, cual tabata exitoso y completamente soldout.

Cu e di dos edicion, Wever a remarca, e meta ta pa duna un conferencia impactante pa comunidad di Aruba y tambe un conferencia durante cual lo trece hopi informacion y lo brinda hopi herment pa tur cu participa.

Rubiella Toppenberg trahado preventivo na FADA a splica cu pa 40 aña FADA ta conoci pa haci trabou di prevencion den e area di salud mental y tambe adiccion, unda comunidad di Aruba ta pone su confiansa den FADA pa ricibi informacion corecto, cual ta parti di FADA su compromiso cu comunidad.

El a sigui splica cu aña pasa durante e prome conferencia enfoke tabata pa brinda hopi informacion y e aña aki e meta ta pa siña e personanan con pa yuda nan mes, con pa balansa cosnan cu ta for di balansa, e emocionnan cu talbes nan no tin bon control di dje, of sucedidonan cu tin ora nan no sa con pa sali for di nan.

El a remarca cu den Mind Matters 2025 e enfoke ta pa e persona siña combersa cu su mes, un aspecto super importante pasobra na momento cu e persona por acepta cu algo no ta okay of ta okay, ta e momento cu e persona sa si e tin cu busca ayudo of papia cu un hende.

Representante di Aruba Bank, Edselin Leer, a indica cu pa nan ta un honor di por duna sosten na un iniciativa cu nan ta kere den dje.

“Pa Aruba Bank nos ta kere den importancia di salud mental y tambe salud emocional. Nos ta kere cu esaki ta mesun importante tambe cu stabilidad financiero y esey tambe ta e motibo pakico nos ta apoya e conferencia aki. E conferencia nos sa cu ta un necesidad y e tin un impacto den nos comunidad. Y nos ta kere tambe cu e tema di e aña aki ta algo hopi fuerte cu ta laga nos recorda cu e salud mental no ta un luho, sinembargo e ta un necesidad. P’esey tambe nos sosten y colaboracion cu e conferencia e aña aki un biaha mas,” el a subraya.

Pa loke ta e oradornan di e conferencia, Wever a splica cu e host di e anochi ta bay ta Gilliany Oduber, un persona basta conoci den comunidad, un dama profesional cu a gana varios premio den su trabou hotelero, un mama y un dama cu actualmente ta batayando cancer, algo cu no a strobele pa tuma e desafio y bira host di e conferencia aki.

Un di e oradornan ta bay ta Jonathan Goitia, tambe un persona conoci den comunidad y cu un storia hopi impactante. Wever a splica cu Goitia a perde su esposa algun aña pasa y ta bay conta pa prome biaha full su storia.

E ultimo orador, ta Mingli Chung, ken tabata e host aña di e prome conferencia di Mind Matters, y e aña aki e t’ey back como orador. Chung ta un trauma informed leadership and business coach, un dama profesional cu ta yuda compania y personanan individual pa sigui avansa den nan bida personal y profesional.

Durante e conferencia por spera cu lo siña tocante diferente topico manera entre otro con pa reconoce, acepta y regula emocionnan propio, y tambe con pa yuda otro regula nan emocionnan. Con pa tene un combersacion cu bo mes, con pa ta mas comprensivo cu bo mes, con pa crea un luga sigur y con pa cambia pensamento lihe di negativo pa positivo.