Desde formacion di Gabinete AVP-Futuro, tin hopi interes den e Ley di Screening y kico esaki ta encera y ki ta e impacto di e ley aki riba e formacion di gobierno. Den e articulo aki, Bon Dia Aruba ta duna un splicacion kico precies tin para den e Ley di Screening.
Loke ta conoci comunmente como Ley di Screening ta en realidad e Ordenansa Nacional riba Integridad di Minister (AB 2021 no. 203). E ley aki a drenta na vigor dia 1 di januari 2022.
E prome capitulo di e Ordenansa Nacional ta dedica na definicionnan di e terminonan usa.
E di dos capitulo ta trata e screening pre-nombramento. Esaki ta e parti mas relevante actualmente, aunke e ley ta inclui un parti tocante kico ta sucede si cosnan cambia despues cu e candidato a bira minister caba.
Pero pa loke ta e screening prome cu nombramento, segun e texto di e ley, prome cu nominacion di un minister ta haci cierto chekeo, cu permiso por escrito. Esakinan ta e siguiente investigacion: hudicial, di seguridad estatal, di impuesto, chekeo di transaccionnan inusual, examinacion medico (salud mental y fisico, incluyendo uso di droga), un investigacion di e formador basa riba e informacion cu a dun’e, manera referi den Articulo 10, como tambe otro datonan determina den decreto nacional conteniendo medidanan general.
E formador ta haci e solicitud pa e investigacionnan aki, y e resultado di e investigacion ta ser comunica na formador y na Gobernador di Aruba.
Prome cu designa un persona pa funcion di formador, Raad van Advies ta haci un solicitud pa investigacion hudicial y di seguridad nacional. Ta comunica e resultado di e investigacion aki na presidente di Raad van Advies y na Gobernador.
Investigacion hudicial
E investigacion hudicial ta den man di Procurador General, kende ta provee e datonan hudicial, segun cu tin. Y mediante hefe di polis, ta presenta tur dato disponible di fuentenan publico y priva cu Cuerpo Policial di Aruba tin na su disposicion relaciona cu e candidato concerni. Procurador General tambe ta duna e persona autorisa pa ricibi e hallazgo di e investigacion – esta e formador – un declaracion indicando si e candidato ta of tabata un sospechoso den un investigacion criminal andando of completa, relaciona cu un ofensa criminal, a menos cu esaki no ta posible den interes di e investigacion.
Investigacion di Seguridad Nacional
Hefe di Servicio di Seguridad di Aruba ta a cargo di e investigacion di seguridad nacional. E hefe ta revisa tur dato relevante di e dossiernan cu e servicio tin disponible relaciona cu e candidato, y cu a keda colecta den implementacion di Articulo 2, prome paragraf y Articulo 3, prome y di dos paragraf, di e Ordenansa Nacional riba Servicio di Seguridad di Aruba (AB 2002 no. 115), a menos cu esaki bay contra e interes di seguridad nacional.
Den caso di un candidato pa minister, e formador ta solicita e hefe di Servicio di Seguridad pa haci mas investigacion riba e candidato solamente si tin un sospecha serio cu e proteccion di interes expresa den e Ordenansa Nacional riba Servicio di Seguridad di Aruba ta den riesgo.
Investigacion di impuesto
Inspector di Belasting (DIMP) ta a cargo di e investigacion aki. E ta duna un opinion general riba e comportamento di impuesto durante ultimo cinco aña, di e candidato en cuestion, y ta reporta cualkier circunstancia cu por ta relevante na e integridad di e cargo oficial cu e candidato kier ocupa. Esaki tambe ta inclui un declaracion di entrada y te unda cu ta conoci, e activonan – propiedad, negoshi, etc. – di e candidato. Si esaki ta na balor di menos di 20mil florin, un declaracion no ta necesario.
Den caso cu e candidato tabata un dunado di trabao prome cu su candidatura, director di Banco di Seguro Social (Svb) tambe ta haci un investigacion. E ta duna un opinion general riba e comportamento di prima durante ultimo cinco aña y ta reporta cualkier circunstancia cu por ta relevante pa e integridad di e cargo publico cu kier ocupa.
E investigacion di impuesto tambe ta inclui un investigacion di Ontvanger. E ta duna un opinion general riba e comportamento di pago relaciona cu impuesto y prima durante ultimo cinco aña y ta reporta cualkier circunstancia cu por ta relevante na e integridad di e cargo publico.
E investigacion aki por conduci na medida cu ta rekeri aprobacion di Inspector di DIMP, director di Svb of Ontvanger.
Ta duna e opinionnan general exclusivamente na formador y Gobernador.
E investigacion riba transaccion inusual ta den man di hefe di Unidad di Inteligencia Financiero. Si tin dato y informacion disponible tocante e candidato, ta duna e informacion relevante na e cabesante di Servicio di Seguridad, kende lo inclui e informacion relevante den e investigacion di seguridad nacional.
Examinacion medico
Pa loke ta condicion fisico, e examinacion medico ta den man di un dokter profesional, y den termino di condicion mental, pa un psicologo, ambos designa pa e formador.
Si e candidato no ta di acuerdo cu e resultado di e examinacion medico, ta posible pa solicita un segundo opinion di otro dokter of psicologo aproba pa formador.
Ki ora no ta aproba un nombramento, y kico formador mester haci?
Articulo 8 di e Ley di Screening ta bisa den ki situacion e formador no mester promove e nominacion di nombramento di un candidato. Esaki ta ora e nominacion ta incompatible cu e resultado di cualkier di e investigacionnan menciona. Tampoco si e formador no ta di acuerdo cu e areglonan referi den Articulo 12, of si interes comercial, posicion of actividad di famia di e candidato por afecta e toma di decision imparcial y obhetivo, den opinion di e formador, of por conduci na un mescla indesea di interes na e oficina di e minister. Tampoco si e candidato a keda condena di un ofensa criminal durante e periodo di ocho aña inmediatamente prome cu e nominacion, si e candidato ta sospechoso den un investigacion criminal andando, si no haci (na tempo) un acuerdo pa desinverti den su interesnan general of su posicion of actividad; si no a haci areglo pa pago di impuesto of prima of no a cumpli cu e acuerdo aki.
E ley ta enfatisa cu si no ta bay nomina e candidato pa un posicion como minister, e formador mester informa nan por escrito lo antes posible, indicando e motibo pa esaki.
Tambe e ley ta bisa duidelijk cu e resultado di e investigacionnan y e contenido di combersacion y corespondencia entre e formador y e candidato ta confidencial. Cu excepcion di Gobernador, no ta revela ningun informacion di nan contenido. Esaki tambe ta aplica na combersacion y corespondencia entre e formador cu tambe ta candidato pa minister y Raad van Avies.
Despues di e investigacionnan, formador ta manda Gobernador un resumen di e manera den cual a aplica y cumpli Articulo 11. E articulo aki ta splica cu ta rekeri e candidato pa desinverti su interesnan comercial y renuncia di su posicionnan. Si den opinion di e formador tin conflicto di interes indeseable den ehercicio di su tarea como minister pa motibo di interes comercial of posicion, e formador ta informa e candidato y su famia di esaki – pero prome mester busca conseho di Raad van Advies, cu mester yega den menos di un siman despues di ricibi e solicitud di formador. Tambe ta manda un copia di e conseho na Gobernador.
Den caso cu e formador tambe ta un candidato pa minister, e mester obtene e conseho aki tocante su mes for di presidente di Raad van Advies, y ta manda un copia di esaki na Gobernador.
E nominacion di candidato na Parlamento ta compaña pa un resumen di e resultadonan di screening.
Claramente e ley ta splica kico tur ta inclui den e screening di cada minister, y kico ta e consecuencia si e resultado di un di e investigacionnan resulta negativo. Pa mas informacion, por lesa e ley den su texto original na Hulandes riba website gobierno.aw.
