E prome biaha cu un seleccion femenino di Aruba a participa den categoria U17 na CONCACAF no a resulta exitoso den resultado: nan a perde tur 3 wega. Sinembargo e tabata exitoso si pa nan haya experiencia den competencia internacional.
Diasabra e team a hunga nan ultimo wega contra Bermuda cual tabata un derota grandi cu 1-13 den gol, pero nan tabata contento cu unico gol. Esaki pasobra pa e team di Bermuda e tabata e unico gol cu nan a haya contra den e tres wega hunga. E team di Bermuda tabata hopi mas fuerte cu esun di Aruba pero tambe compara cu e otro teamnan den poule C, esta Antigua & Barbuda y St. Lucia.
E team di Bermuda tambe a mustra cu nan ta un team deportivo di berdad como cu nan a manda un carta di sosten despues e wega desastroso entre Aruba y St. Lucia. Manera conoci e team di Aruba a bandona e veld pa 15 minuut pa motibo di e wega bruto di St. Lucia. Finalmente dos hungado mester a pasa un anochi den hospital. Aruba a entrega un keho na CONCACAF. Segun un di e hungadonan nan no kier a bay bek hunga despues cu nan a bandona e veld. Sinembargo pa motibo di boet cu e bond di Aruba ABV por haya, nan a dicidi di sigui e wega. Pero nan a perde nan motivacion, segun e hungado.
Ayera por a mira e resultado ainda di e wega bruto: cuater hungado a yega Aruba den rolstoel.
