(AP) – Senado Mericano dialuna a yega mas cerca di caba e shut down Gubernamental na Merca despues cu un grupo chikito di Democratanan den Senado y uno independiente a kibra e 40 dia cu a keda stanca diadomingo atardi y a vota cu Republicanonan pa sigui dilanti cu e reapertura di e gobierno, un decision cu a causa disgusto.
E pakete di legislacion cu aparentemente ta na caminda pa caba e shutdown gubernamental mas largo den historia di Merac ta laga afo cualkier resolucion di Affordable Care Act, cual a haci e seguronan di salud priva menos costoso pa miyones di Mericano.
No ta cla ainda ki dia e Senado lo tin e voto final tocante e legislacion, sinembargo lider di mayoria den Senado John Thune a bisa cu e tin speransa cu esaki lo bay bon. “E pueblo Mericano a sufri suficientemente largo caba. No ban alarga e proposicion aki sin motibo,” el a bisa mientras e Senado tabata habriendo dialuna mainta.
E legislacion toch mester pasa door di e Cas prome cu gobierno por bolbe habri. Vocero Mike Johnson a urgi e legisladornan pa cuminsa bolbe Washington “aworaki” mirando e atraso den biahe, sinembargo a bisa cu e lo duna un notificacion oficial pa e Cas su regreso na momento cu Senado aproba e legislacion.
“Nos mester haci esaki lo mas pronto posible,” Johnson a bisa na un conferencia di prensa. El a mantene e Cas fuera di sesion dede mita di september, ora cu e Cas a aproba e proposicion pa sigui financiamento gubernamental.
Despues di simannan di negociacion, e democratanan modera den Senado a acepta bolbe habri e gobierno sin un extension garantisa di e subsidionan di cuido di salud, cual a causa rabia den varios cu a exigi pa e Republicanonan negocia cu nan tocante e Affordable Care Act cu ta caduca dia 1 di januari.
John Thune, R-S.D., a priminti un voto pa mita di december tocante e subsidionan, sinembargo no tin un garantia di exito. E voto final tabata di 60-40. Lider Democratico den Senado Chuck Schumer di New York a vota den contra di sigui cu e pakete, conhuntamente cu mayoria di su coleganan Democratico. “Nos no ta bay rindi,” Schumer a bisa, agregando cu e democratanan awo a “bati alarma” tocante cuido di salud.
Mientrastanto, e shutdown a causa miles di cancelacion di vuelo y atraso mientras controladornan di trafico – ken no a ser paga pa casi henter un luna – a stop di presenta na trabao, citando e stress agrega y necesidad di busca otro trabao.
President Donald Trump su administracion a regresa Corte Supremo dialuna pidiendo pago completo den e programa di sosten pa cuminda federal SNAP cu ta congela mientras e gobierno ta cera, te hasta mientras algun famia Mericano ta lucha pa pone cuminda riba mesa sin e asistencia federal aki.
Toch, un fin por ta dianan leu si cualkier di e Senadornan voto den contra.
