Secretario General di SEPPA, Magaly Brito a entrega un manifiesto na Minister Presidente, Evelyn Wever-Croes na nomber di e werksternan trahando bao SKOA y dirigi na conseho di minister.

E werksternan trahando bao SKOA ta sinti cu desde aña pasa na december 2019, nan ta bibando den un “incertidumbre.” Esaki desde cu un carta di Minister di Enseñanza a wordo manda pa SKOA, caminda e mandatario ta expresa su intencion di kier cambia tur cos bek y mustra cu e werksternan aki mester wordo paga diferente. Entre gobierno di Aruba tin un discusion andando si e werksternan mester cay bao exploitatiekosten of personeelskosten si of no.

SEPPA a yega di señala cu e problema aki cu tin entre e bay bin entre Minister y SKOA, esnan cu ta sali perhudica ta e werksternan aki. Trahadonan humilde cu no tin nada di haci cu decisionnan di gobierno, of cu pa falta di regla cosnan na un manera corecto ta wordo perhudica. Brito a laga sa cu e problema aki mester wordo discusion y soluciona na mesa. Den e discusion aki nan representante sindical mester por forma parti di dje pa sigura e cupo di trabao di e werksternan, nan entradanan y tambe bienestar di nan famia.

SEPPA a yega di expresa cu si e fayo ta cu mester cambia nos reglanan of leynan vigente y esaki no a sosode, mester haci esaki. Pero uzando e argumento aki, pa baha gasto ta un acto baho.

Pa colmo SEPPA ta mirando mas maniobranan. Mirando cu e situacion financiero di SKOA no ta mucho bon, nan ta poniendo SKOA bao presion pa debolbe e placa paga aki na werksternan. Ora cu ta gobierno mes a duna aprobacion di esaki. Nan ta haya cu e actitud aki ta mustra den direccion di persecucion. SKOA ta un di e fundacionnan aki na Aruba cu ta maneha e mayor cantidad di scolnan na Aruba.

SEPPA ta haya cu a pesar cu nos ta den un crisis, awor ta pone e tipo di presionnan aki pa SKOA di su banda bira kita e hende muhenan aki humilde for di trabao. Mientras cu awe mas cu nunca, nos scolnan mester di e trahadonan aki, ya cu nan ta esencial y indispensabel den e protocol pa mantene luganan di trabao limpi y higienico. SEPPA ta afirma cu nos scolnan mester di e werksternan y ta exigi pa enbes di mas problema, traha na solucion, caminda e werksternan no resulta perhudica.

Trocemento di informacion

Un punto cu SEPPA a trece dilanti riba e manifiesto cu a entrega na gobierno na nomber di nan miembronan di sector publico ta, cu e sindicato ta rechasa e tipo di ‘trocemento di informacion.’ Nan ta cualifica como ‘indignante’ e forma cu den e mesa di discusion a wordo informa cu medidanan ta bay drenta entrante 1 di mei 2020 te cu december 2020. Pero ta parce awor cu gobierno sin acuerdo cu e trahadonan, a cambia esaki te cu ordo indefini.

Tin mas puntonan para den nan manifiesto: Nan ta rechasa cambio unilateral den enseñansa. Nan ta haya cu intencion di minister di Enseñansa di hinca scol publico den un stichting ta sigui.

E sindicato ta rechasa rotundamente flexibilisacion laboral. SEPPA ta sostene cu solamente pa medio di dialogo y negociacion na mesa nan por yega na un acuerdo y no impone unilateralmente riba medidanan.

 

 

LEAVE A REPLY

Please enter your comment!
Please enter your name here