Aruba mester sa di nabega un ambiente volatil, insigur, compleho y ambiguo y e forma pa haci esaki ta pa e pais ta dirigi cu un vision riba futuro y gobernacion resiliente y husto. Esaki ta mas necesario cu nunca den un era defini pa cambio rapido y diferente crisis mundial.
Banco Central di Aruba kier a contribui na un maneho pa confronta e realidad y reto global pa medio di su serie ‘Goberna for di Futuro,’ unda ehecutivonan di e institucion a enfoca y elabora riba temanan cu no solamente ta responsabilidad di un Gobierno, pero sigur ta importante pa ciudadanonan ta mas consciente y pro activo pa ta prepara pa futuro.
Pa Aruba por no solamente sobrevivi pero ta exitoso den un periodo compleho mester mas cu soluciona problemanan den forma reactivo. Mester di capacidad institucional cu ta conduci na pasonan cu ta anticipatorio basa riba strategianan progresivo.
E di tres edicion di e serie, ‘Guia cu Equidad’ cu ademas a keda presenta durante sesionnan di Centro di Estudio pa Bida Largo di Universidad di Aruba, esta Center for Lifelong Learning ta pa sirbi interes publico, fomenta bienestar economico y contribui di un forma significativo na un transicion husto y necesario pa un Aruba resiliente y inclusivo.
E edicion mas recien di e serie Goberna for di Futuro, ta basa riba un fundeshi intelectual fuerte, unda a sigui un jornada di investigacion cu a inicia cu identificacion di risiconan sistemico y a desaroya den para pa solucionnan inclusivo. Obhetivo ta pa traduci structuranan existente den rutanan tangible y maneho cu ta enfoca riba hende, di forma cu por atende e vulnerabilidad y siguridad diario di comunidad di Aruba.
E serie a keda concipia for di dialogonan cu ta basa riba datonan concreto dirigi na haci e enfoke di gobernantenan y actornan relevante mas skerpi pa asina logra resultadonan mas responsabel y impactante pa generacion actual y esun di futuro.
E prome edicion, lansa na 2022 cu e titulo ‘Guia cu Impacto’ a establece e filosofia principal di e serie. Asina a introduci e concepto critico di ‘Gray Rhinos’ cu ta menasanan grandi, obvio pero hopi biaha neglisha cu ta desaroya cu tempo y ta forma risico grandi pa desaroyo sostenibel. E retonan aki, for di cambionan demografico y sostenibilidad financiero, ten a cambio di clima y maneho di recurso ta rekeri un modelo di gobernacion proactivo. A delinea tres scenario diferente pa Aruba na 2040, cu tabata: un scenario usual, un scenario di cu un maneho reforma y un scenario di cambio di maneho. E investigacion ‘Guia cu Impacto’ a analisa areanan critico manera cambio demografico, desaroyo economico, e futuro di siguridad social, siguridad climatico y di energia, inclusion financiero y innovacion di sector publico. Ademas, a pone e base pa un dialogo nobo y progresivo pa maneho di Aruba, y tabata un yamada pa dirigi economia unda realmente ta considera futuro importante, y como tal, ta haci escogencianan responsabel pa sigura oportunidadnan pa futuro generacion.
E di dos serie tabata ‘Guia cu Inclusion’ a keda publica na 2024 unda a argumenta cu pa cualkier maneho tin un impacto sostenibel, e mester ta inclusivo. Aki a enfatisa e importancia di structuranan husto. E tema central di e di dos serie tabata e concepto di resiliencia inclusivo, manera e habilidad di un comunidad pa absorba, adapta y transforma den periodonan di shock, di un forma cu ta empodera tur miembro di comunidad, sin laga uno atras. Den e sentido aki, e dialogo mester bay mas leu cu sostenibilidad y ta dirigi riba regeneracion, unda e sistema economico y financiero di Aruba mester ta no solamente resiliente, sino restorativo. E investigacion di ‘Guia cu Inclusion’ a analisa e lazonan entre desaroyo humano y crecemento economico, e papel di un florin digital pa fomenta resiliencia inclusivo, e potencial transformativo di futuro di labor y transformacion digital, e necesidad critico di un transicion energetico inclusivo, y e importancia fundamental di vivienda pagabel. Den otro palabra, resiliencia no ta unicamente un reto economico, tecnico, sino uno social.
Guia cu Equidad
Mientras cu e dos prome volumennan di e publico Goberna for di Futuro ta dirigi riba e kico y con, e di tres edicion ta enfoca riba e individuo. Esta individuonan, famia y comunidadnan cu ta afecta diariamente pa decisionnan di maneho. Asina a studia e formanan detaya den cua forsanan economico, presionnan ambiental y structuranan social ta impacta e siguridad fundamental di ciudadanonan. E trabou colectivo a scrutina e base di un sociedad stabiel, e habilidad di por gana un salario husto, e posibilidad di por cubri necesidadnan basico, traha riba conocemento financiero, biba saludabel y traha den un ambiente sigur. Tur e estudionan ta mara na otro cu un liña comun, esta cu tin un necesidad urgente pa traha riba un Aruba resiliente for di e base, unda ta sigura cu cada individuo tin e hermentnan, oportunidad y proteccion necesario pa ta exitoso.
E investigacion a cubri tres area critico, cu ta e realidad economico y husticia social; siguridad fundamental pa hende por florece; y adaptacion na cambio di clima. Cada capitulo ta duna un analisis rigoroso di un reto specifico y ta ofrece recomendacionnan concreto pa maneho cu ta diseña pa fomenta un futuro mas husto, sigur y resiliente pa Aruba.
Bon Dia Aruba lo amplia riba cada un di e analisisnan aki den proximo edicionnan.
