(NLTimes) – Servicio di salud GGD te ainda tin problema lidiando cu e seguridad di datonan di hende, De Gelderlander a reporta basa riba nan mesun investigacion.

Ex-empleadonan di GGD te ainda tin acceso na e centronan di dato di e servicio di salud – cual tin datonan di casi tur residente Hulandes – for di cas, casi un luna despues cu nan a kita for di trabao. Y den por lo menos 1 klas di training, e dato di un persona real a ser usa pa duna les na empleadonan nobo di GGD, segun e corant.

Esaki despues cu GGD a mehora e manera cu nan ta maneha nan datonan manera a ser ordena pa Autoridad Hulandes di Proteccion di Data (AP). Den januari di aña pasa, setnan di dato di GGD cu tabatin miyones di residente Hulandes su adres, number di telefon y numbernan di registro civil a ser bendi online. Empleadonan tabatin acceso facil riba e datonan aki y e exporta nan desde e sistema di GGd.

E incidente, cual tabata involucra un persona real su detayenan manera adres, number di registro civil, e-mail y te hasta recordnan medico unda ta detaya ki remedi nan ta usa, a tuma luga na GGD Geldernald-Midden den december di aña pasa, un freelancer cu tabata na e training a conta. Un vocero pa e organisacion GGD GHOR Nederland a conta Gelderlander cu esaki tabata un incidente cu a tuma luga un solo biaha. “Esaki no ta nos manera usual di maneha tur cos. Cada training ta duna den un ambiente di training cu tin hendenan ficticio y datonan ficticio tambe.”

Un empleado anterior di GGD a conta e corant cu te ainda nan tin acceso na e sistema di coronavirus di GGD por lo menos un luna y mey despues cu nan a sali for di e servicio. Nan por mira cualkier detaye cu nan kier desde nan laptop na cas. “Manera e number di e ciudadano su registro civil y nan adres, cual ta un combinacion hopi peligroso si bo kier haci daño.”

AP a conta De Glederlander cu ta hopi preocupante cu ahusta y kita acceso na e sistemanan di GGD “no semper ta sali bon.” E vigilante tambe ta preocupa cu e empleadonan tin acceso na e sistema di GGD desde nan cas, cu computernan cu no ta protegi di mesun manera cu e computernan di e servicio di salud.

LEAVE A REPLY

Please enter your comment!
Please enter your name here