E Board of Hipgnosis Songs Fund Limited, un compania di inversion basa na Reino Uni, a adkiri 100% di e derechonan di publicacion di musica di e super-strea ganado di Grammy, Shakira.
Hipgnosis a haci e anuncio ayera. E catalog di Shakira ta inclui 145 cantica, incluyendo ‘Hips don’t lie’, ‘Whenever, Wherever’, ‘La Tortura’, ‘She Wolf’ y ‘Waka Waka (This Time for Africa)’.
Shakira, kende a lansa su album debut na 1991 cu 13 aña di edad, a haya fama internacional cu su tercer album, ‘Pies Descalzos’ na 1995. E talentoso cantante-compositor-instrumentalista a sorprende industria pop na Merca ora el a haci su debut den idioma Ingles, ‘Laundry Service’ na 2001. El a gana tres premio Grammy, 12 Grammy Latino, cuatro MTV Video Music Award, shete Billboard Music Award, y 39 Billboard Latin Music Award. Den total, Shakira a bende 80 miyon album.
“Ta compositor ta un logro cu mi ta considera igual of hasta mas grandi cu ta un cantante y un artista. Cu ocho aña di edad – hopi prome cu mi a canta – mi a skirbi pa duna mundo un sentido. Cada cantica ta un reflexion di e persona cu mi tabata e tempo cu mi a skirbie, pero unabes un cantica ta den mundo, e ta pertenece no solamente na ami sino na tur cu ta aprecie tambe”, Shakira a bisa den un declaracion. “Mi ta sinti humilde cu composicion a duna mi e privilegio di comunica cu otronan, di ta parti di algo mas grandi cu mi mes.”
E anuncio di Hipgnosis adkiriendo catalog di Sharkira a bin un siman despues cu e compania a cumpra un accion di 50% di musica di Neil Young. Luna pasa, Bob Dylan a bisa cu a bende su derechonan di publicacion di mas di 600 cantica na Universal Music Publishing Group.
