Shanon Croes (41) a lanta ta explora e bario unda el a lanta. For di e mangelnan te Rooi Lamoenchi. Pos Chikito ta unda el a lanta hunto cu su famia, y ainda e ta biba Pos Chikito, pero desde 2016 e ta activo pa mas hende conoce e rikesanan natural di e area unda el a lanta.

“For di chikito mi tabata cana den mondi, hunto cu mi tata y mi welo. Tempo cu mi tabata chikito, casi no tabatin cas banda di Rooi Lamoenchi y mas bien tabata mondi. Y ta pafo nos tabata hunga mas tanto.” Pa e motibo ey, cascabel, bushi, dadel tur ta elementonan di mondi cu tabata forma parti di su bida.

E custumber di busca refugio di mondi a continua henter su bida, pero tabata na 2016 a drenta e idea pa Shanon a dicidi pa haci’e un actividad comercial, unda e ta hiba hende conoce areanan natural bunita di Aruba. Asina el a lanta ‘The Shack,’ cu ta nifica un choza, un casita di piscado. Un nomber pa refleha e simplicidad di respeta e bunitesa di e naturalesa di Aruba. “Un ‘shack’ ta un casita simpel, e por ta di piscado of den mondi, sin nada di luho.”

“Mi a cuminza kayak como hobby na 2016, den e lama banda di Santo Largo pa Mangel Halto y e ora ma bin riba e idea pa crea tour y hiba hende den kayak. E ta algo leuk, bo ta riba lama, ta pafo. Y no ta mondi so.” Shanon a bende e pida tereno cu e tabatin pa a inverti den su kayaknan y na 2018 por a lanta un VBA, un compania formalmente, cu tur su rekisitonan incluso pago di belasting, seguro di responsabilidad (Liability Insurance) y The Shack a haya su fundeshi firme.

“Mi a cuminza na Januari 2018 cu Kayak y despues ma expand’e cu canamento den mondi. Tempo cu mi tabata chikito, mi tata tabata hiba nos den famia pa Rooi Lamoenchi te Boca Prins. E ta e prome ruta distancia largo cu ma cana cu mi tata y esey tabata e prome ruta cu The Shack a usa tambe.”

Unabes activo, Shanon a cuminza explora mas ruta y conoce mas skina di e mondi Arubiano. Y no a duro hopi pa The Shack a cuminza haya clientenan dispuesto pa lanta trempan y conoce e mondi di Aruba, of pasa oranan ta kayak den e mangelnan na Pos Chikito.

Pos Chikito

Shanon ta orguyoso di su bario, Pos Chikito. Un bario cu en general na Aruba, hende no tabata pone mucho atencion na dje. Pero e Pos Chikito di infancia di Shanon tabata uno di un bario unda famianan tabata biba y cu e paisahe tabata mas domina pa mondi cu locual ta e caso awor, yena cu cas. “Si bay den historia por haya sa con e bario a haya su nomber. Hendenan tabata coba pos pa haya awa. Mi sa cu hendenan di otro bario tabatin pa busca awa na Pos Chikito. Ami tin pensa di purba busca tur e posnan.

Tras di mi wela su cas tin un pos, asina tin mas. Kizas mester haci nan limpi, y percura cu nan ta bira monumento di Aruba, pa di forma cu ta proteha nan. Pasobra awa ta bida, y esey tabata hopi importante pa Aruba. E parti historico ey tabata asina importante.” E lasonan familiar na Pos Chikito ta bay hopi atras den tempo, particularmente pasobra Savaneta tabata e prome capital di Aruba y e bario chikito di piscado, mas tanto, tabata forma parti di e districto. “Pues aki nos ta papia di famianan hopi bieu di Aruba cu tin cas na Pos Chikito.”

Cliente Arubiano

The Shack ta traha cu cliente local y internacional. Pero ta e localnan a crece e compania y pa Shanon, clientenan local ta nifica Arubianonan cu ta aprecia e naturalesa di Aruba. “Mi por bisa personalmente, mi ta gusta traha cu hende local. Y asina nan mes ta bin cu turista. Mi ta haya turista tambe, particularmente pa kayak.”

Locual e ta gusta di clientenan local ta cu e habilidad di combersa habri y relaha riba diferente tema. “Localnan ta un poco menos exigente compara cu turista, nan ta mas flexible. Pero, realidad ta cu mester percura cu e tournan ta cumpli cu tur siguridad.”

Mision

Kizas e motibo pakico Shanon ta gusta cliente local ta pasobra e ta cumpli cu e vision y mision di su compania, esta pa crea mas aprecio pa naturalesa y asina logra cu mas hende ta proteha e recursonan valioso aki di Aruba, esta tanto e mondi como e area marino, cu ta inclui e mangelnan.

“Asina cu ta drenta ta mondi, hende por haya mas aprecio. Tin hopi hende cu ta cera den oficina y despues na cas, y kizas ta bay beach na hotel. Pero nunca nan a bay e area natural di Isla di Oro. Y unabes nan experiencia e bunitesa natural di Isla di Oro, nan por compronde pakico mester proteha e tiki naturalesa di Aruba, ya cu hopi a bay den man di companianan internacional. Esey ta e efecto.”

E reaccionnan semper ta similar, esta cu nunca nan a realisa cuanto bunitesa naturalesa di Aruba ta brinda. Asina Shanon Croes a nota cuanto hende ta bira mas pasiona pa duna nan parti pa proteha naturalesa di Aruba. “Con cu bay bin riba nos tournan nos ta duna hopi informacion riba naturalesa, di nos mangelnan.”

Banda di esey, sea ta kayak of cana den mondi, hende ta den movecion cu tambe ta un aspecto importante pa salud en general.

Sostenibilidad

Un aspecto esencial di e tournan di Shanon ta cu nan ta sostenibel. E caminatanan tur ta riba rutanan cu ta existi pa decenas di aña, sea traha pa e Arubiano di antes of pa e cabritonan, mientras cu e tour di kayak ta evita pa haci cualkier daño na mangelnan of e caynan mes. Tur hende ta haya un bista cla di e fragilidad di e area y informacion kico por haci pa yuda proteha. Pa Shanon Croes, esaki ta esencial p’e, esta cu hende por goza di Aruba sin cu ta haci daño.

The Shack awor tin tres aña activo. Shanon a haya un fluho grandi di hende pa su tournan particularmente durante e lockdown y un boca a sigui bisa otro, y consecuentemente, The Shack ta draai continuamente. Mirando cu Shanon mes ta traha na Serlimar, e ta traha cu 10 guia cu tambe ta hendenan entusiasma cu naturalesa. Si e no por bay, e tin otro hende cu tambe tin pasion pa naturalesa pa sea e caminatanan of pa kayak.

Asina Shanon a combina un pasion pa naturalesa cu un negoshi cu e unico impacto cu e tin, ta cu e ta crea trabou y ta stimula un amor cerca hopi pa preserva e rikesa natural-historico di Aruba.