E ta e prome biaha cu a keda cla den cuater dia y mey pa duna partidonan cu no tin asiento den Parlamento, e sosten di firma necesario pa participa na eleccion 2021. Asina Hefe di Registro Civil y Censo, Sharine Luidens a declara ayera.

“E sistema a funciona hopi bon. E prome dia, Censo a atende 2337 hende pa firma lista,” Luidens a comenta. E hecho cu aki tabata trata di ocho partido, e ta nifica cu a logra atende cu 4696 hende cu a bin firma pa e listanan aki oficialmente ta participa den eleccion di Juni 25, 2021. Y e motibo pakico el a logra, ta pasobra a organisa e proceso na un forma hopi bon, Sharine Luidens a bisa.

“E sistema a bay eficiente y nos ta hopi satisfecho. Tur cos a cana bon.” Un di e factornan cu a yuda hopi ta e ayudo di e dos MFA, na Savaneta y Noord, cu a pone un loket pa hende por bin firma y sostene e listanan. Aunke e MFAnan no ta cay bao maneho di Censo, e ultimo aki ta maneha nan sistema automatico cu a permiti un colaboracion. “Tabatin mas eficiencia, ya cu a habri mas localidad y danki na e procedura di sosten, tur cos a bay bon.”

E cifra di 587 ta basa riba e 1 porciento di votonan valido di 2017, cu ta exigencia di e kiesverordening na Aruba. Na Corsou, e sistema ta totalmente diferente, unda ta habri e urna electoral pa dos dia pa hendenan por bin vota pa e listanan cu ta participa na eleccion.

Sosten di otro pa partido nobo

Presidente di Conseho Electoral dr. Glenn Thode tambe ta contento cu e proceso di firma pa sosten di lista a bay bon. Pa hopi e no ta un sorpresa cu tur 12 partido a haya e firmanan, pasobra e sistema di reparticion di voto y asiento ta cumbini partidonan grandi, si e votonan keda reparti den mas partido. Mas voto un partido, mas e sistema di calculacion ta cumbini esun cu ricibi mas voto y logra.

Sinembargo, tabatin ehempel den pasado recien con partidonan no a logra nan sosten di firma, por ehempel e partido Aruba su Bienestar Organisacion (ABO) y SummumBonum. Pero, Dr. Thode ta reconoce cu e cantidad di partidonan ta beneficia partidonan cu por conta cu nan ta haya asiento y ta un secreto publico cu miembronan di e partidonan aki, tur aña ta sostene e listanan di partidonan cu nunca nan lo duna nan voto. Esaki ta pa motibo di e restzetel. Na 2017, tabatin cuater restzetel cu a cumbini AVP, MEP y POR.

Kiesdeler

Segun e kiesverordening di Aruba, na fin di dia di eleccion, ta conta e votonan y ta determina cuanto voto a invalido cu no ta conta, pa determina resultado. Basa riba cantidad di voto valido ta saca e cifra pa determina cuanto asiento cada partido a haya. E cantidad di voto valido ta dividi pa 21 asiento y asina ta yega na e kiesdeler. E partido cu haya e kiesdeler aki, ta haya un asiento y mas voto, mas asiento. Pero, den e sistema di Aruba, votonan cu a bay pa partidonan cu no a logra un asiento, nan unico influencia ta pa determina e kiesdeler. Si e partido no a bay Parlamento, e votonan ey tambe a bay perdi. Y e partido cu haya mas voto cu locual ta necesario pa un, dos of mas asiento y resta voto, ta bin na remarca pa e restzetel. Por ehempel un partido cu haya 10 mil voto, y e kiesdeler ta 2700, e partido ta haya 3 asiento y ta resta 1900 voto. Si e 1900 voto, segun un porcentahe ta mas cerca di e kiesdeler, e partido ey ta haya e rest zetel. Si mester tin mas restzetel, ta bolbe haci e ehercicio y cada biaha e partido cu ta keda cu un porcentahe di voto cu ta mas cerca di un asiento, e partido ey lo haya e otro restzetel. E kiesdeler tawata 2792 eleccion pasa. E cantidad di voto di tur partido cu no a yega e kiesdeler esaki a suma 3518 voto, esta Raiz, Curpa, PPA y UPP. Pero e asiento ey a bay pa un partido cu si a logra pasa e kiesdeler.

Na Hulanda y Boneiro, e ley no ta exclui partidonan cu yega cerca di e kiesdeler. Un partido cu no logra e kiesdeler, pero si a yega riba 75 porciento di e cifra aki, ta participa den e calculacion pa e restzetel. Na Corsou, a reparti 9 restzetels despues di eleccion ultimo.

,Segun Dr. Glenn Thode na Bon Dia Aruba, hopi ta puntra cua sistema ta representa miho e deseo di e votado. Un sistema di 75 porciento di e asiento lo por representa e deseo di e votado berdad, pero ta conduci si na un situacion manera na Hulanda unda tin un cantidad di partido di un solo asiento den Tweede Kamer. Pero, tanten cu no cambia e ley di eleccion na Aruba, lo sigui traha cu e sistema di restzetel pa partidonan cu logra un of mas asiento den Parlamento.

Scan voto

Prome Minister Evelyn Wever Croes a anuncia diaranson ultimo cu Gobierno a dicidi pa no usa e sistema di scanning pa tabula e votonan. E anuncio aki tabata pa a trankilisa esnan cu tabata duda riba un sistema electronico. Di otro banda, ya tabata conoci cu si tin 12 partido haya sosten pa participa na eleccion 2021, lo no por usa e sistema electronico di tabulacion. E maximo tabata 11.

Pero esey no ta kita e sentimento di frustracion di parti di Director di Registro Civil y Censo Sharine Luidens. Pasobra locual ta inaceptabel p’e, ta e insinuacionnan cu e sistema di tabulacion electronico por nifica manipulacion di voto.

“Tabata dia 8 di Februari cu e Crisis Team a yama pa puntra kico pa haci pa eleccion 2021,” Luidens a bisa ayera. Motibo ta e preocupacion pa locual a pasa na Corsou, unda e casonan di contagio cu COVID-19 a explota despues di e campaña electoral. “E team di Censo a presenta ideanan. Esakinan a inclui e proposicion pa entrega di lista pa medio virtual, proposicion pa orario di vota pa evita aglomeracion,” Luidens a splica, agregando cu e control pa e registro di votado ta un sosten enorme y lo a bin un sistema aparte pa scan e stembiljet pa agilisa e proceso di conteo y asina baha e orario cu trahadonan ta pasa den un urna electoral. Crisis Team a bay de acuerdo cu e ideanan aki y ta di e forma aki Censo a cuminza haci su trabaonan pa realisa e proposicionnan aki. “Haci nada no tabata un opcion.”

Insulto

Director di Censo a bisa di ta orguyoso con su team na Censo a traha riba realisacion di e plannan aki, cu a haya sosten tambe di Conseho Electoral. E momento ey, a bay busca forma con pa logra haya e sosten electronico pa percura cu eleccion por cana mas sigur y mas eficiente posibel.

E critica y sugerencia cu e sistema cu a scoge lo por fomenta manipulacion ta un insulto pa henter Censo, segun Luidens. Y ta daña nomber di Aruba y su institucionnan. Particularmente pasobra esnan cu mester a brinda servicio ta profesionalnan y companianan internacional respeta. “No ta ami a ofende, sino e servicio publico di Aruba y institucionnan serio,” Luidens a remarca, agregando cu e sugerencia di fraude ta un ofensa pa tur hende. El a considera cu e atake tabata brutal, sin tene na cuenta cu ta Crisis Team tabata kier e ideanan aki pa yuda baha e risiconan di contagio cu COVID-19.

Sharine Luidens ta sinti cu e rechaso pa e sistema di tabulacion electronico ta un oportunidad perdi. Particularmente mirando e bon nomber cu Censo di Aruba tin na Hulanda y den otro paisnan den Reino. A inverti hopi den mehoracion di sistemanan danki na inversionnan di Fondo Desaroyo Aruba cu a yuda e Registro Civil y Censo bira un servicio cu ta hopi eficiente y efectivo. “Nos a logra hopi bon proyecto, na beneficio di nos comunidad. Nos (di Censo Aruba) ta pionero den hopi area di asunto di ciudadano (burgerzaken).”

Censo no ta partidario

Ningun momento mester a hinca Censo den e debate politico, Luidens a sigui bisa. “E sistema di conteo ta yuda. Nos ta profesional cu no mester ta memey di debate politico. Nos mester keda leu di area politico, y ami ta para duro pa cualkier metemento politico den mi trabaonan pa Pais Aruba. Mi no ta hiba campaña pa ningun hende,” Luidens a subraya. E hefe di Censo a nenga cu Prome Minister Wever Croes a mete den e organisacion di eleccion. Mescos ta conta pa Conseho Electoral, bisando cu e conocemento pa organisa un eleccion ta na Censo. En todo caso, no tin gasto awor cu no ta bay usa e scanner, pasobra Censo no a cumpra esakinan, sino tabatin intencion di lease nan bao condicion stricto.

Pero, manera a menciona caba, un di e stipulacionnan cu mester a tene cuenta cune ta e cantidad di partido cu ta participa den eleccion. E stembiljet cu por scan ta carga maximo 11 partido, y dia 25 di Juni, pueblo tin oportunidad pa vota pa 12 partido.

LEAVE A REPLY

Please enter your comment!
Please enter your name here