(CiberCuba) – Administracion di Claudia Sheinbaum a triplica e envio di petroleo subsidia y derivadonan pa Cuba den apenas cuater luna, segun un investigacion publica pa website Mexicans Against Corruption and Impunity (MCCI).

E investigacion di co-autor Veronica Ayala, ta detaya cu entre mei y augustus 2025, Mexico a manda 58 cargamento di hidrocarburo pa Cuba cu un balor total di $3.002 biyon, ekivalente na casi 60 biyon peso.

E volumen manda durante e periodo ey ta tres biaha mas grandi cu esun informa pa Petroleos Mexicanos (Pemex) durante e ultimo dos aña di administracion di Andrés Manuel López Obrador, ora cu exportacion di combustibel pa Cuba a alcansa alrededor di $1 biyon entre juli 2023 y september 2024.

Segun MCCI, tur envio a ser haci pa Gasolinas Bienestar, S.A. de C.V., un subsidiario crea pa Pemex na 2022 pa suministra hidrocarburo na Cuba bao di terminonan preferencial, prueba di e financiamento di Mexico di e regimen Cubano.

E compania a raporta perdidanan di 5.836 biyon peso den su prome aña di operacion debi na e combustibel regala na e isla, loke a empeora e debe total di e compania estatal di petroleo Mexicano.

Monitoreo maritimo realisa pa MCCI a identifica cu e barco Cubano Sandino, sanciona desde 2019 pa Departamento di Tesoro di Merca y inclui riba e lista preto di OFAC, a ser usa pa transporta un parti di e combustibel aki.

Dia 20 di augustus e Sandino a sali for di e terminal maritimo di Pemex na Laguna de Pajaritos, na Coatzacoalcos, Veracruz, y a yega siete dia despues na e refineria Camilo Cienfuegos den e parti zuid-central di e isla.

E uso di un embarcacion sanciona pa Washington por encera riesgonan diplomatico y sancionnan financiero pa gobierno Mexicano, ya cu ley Mericano ta prohibi transaccionnan cu entidadnan inclui riba e lista di Oficina di Control di Activonan Stranhero (OFAC).

A pesar di esaki, e Sandino a mantene su ruta regular entre La Habana y e wafnan di Golfo di Mexico, segun rastreo di satelite revisa pa MCCI.

Durante e di dos kwartaal di aña, e envionan di combustibel a alcansa nivelnan sin precedente. Na mei, un envio balora na $24.6 miyon a keda registra; na juni, 38 envio a suma $826 miyon; na juli, 11 envio a suma $1.425 biyon; y na augustus, ocho envio balora na $726.7 miyon, treciendo e total pa e periodo na $3.002 biyon.

Analistanan di MCCI ta señala cu e suma manda pa Cuba ta ekivalente na henter e presupuesto federal di e Ministerio di Seguridad y Proteccion di Ciudadano, lidera pa Omar García Harfuch, y ta cuatro biaha e suma aloca pa e Oficina di Procurador General (FGR) pa e persecucion di delitonan federal.

E ta surpasa tambe hopi e recursonan di e Fondo di Contribucionnan Multiple (FAM) pa infrastructura educativo basico, cu tin entre $13 y $15 biyon peso.

E balor di e hidrocarburonan manda di Mexico pa e isla ta surpasa 3 biyon dollar, un cifra cu, segun e informe, ta “extraordinario” pa un compania manera Pemex, cu ta enfrentando un di e crisisnan financiero di mas severo den su historia, cu un debe cu ta surpasa 100 biyon dollar y dificultadnan pa mantene e produccion domestico.

Ademas di e Sandino, e Ocean Mariner, un barco cu bandera di Liberia, a ser identifica como un otro portador grandi di hidrocarburo entre Mexico y Cuba.

E productonan manda ta inclui azeta crudo, combustibel di avion, azeta diesel, diesel y gasolin, destina principalmente pa e refinerianan Cubano “Ñico López” y “Camilo Cienfuegos,” tur dos bao di maneho estatal.

Expertonan ta kere cu e politica di Sheinbaum ta consolida e aliansa energetico y politico entre Mexico y e regimen Cubano, a pesar di e advertencianan di Merca tocante e potencial repercusionnan financiero di colaboracion cu entidadnan sanciona pa OFAC.

Mientras tanto, subsidio di combustibel manda pa e isla ta aumentando e presion riba finanzas publico Mexicano, y varios sector di oposicion a cuestiona e uso di recursonan nacional pa sostene gobiernonan stranhero enbes di aloca nan na programanan social domestico.