Sea cu Merca ta preparando pa drenta Venezuela of no, en todo caso, e accionnan riba Lago di Maracaibo ultimo dianan tabata mustra un forma di despista autoridadnan Venezolano, pa asina por a saca Maria Corina Machado for di e pais. Asina un ex-diplomatico, cu pa motibo di seguridad a ilustra na Bon Dia Aruba, den forma anonimo (red. nomber ta conoci pa Bon Dia Aruba).
E accion di militarnan Mericano di a saca Machado for di Venezuela ta uno di pelicula. E indicacion ta cu e ganador di e Premio Nobel di Paz y lider di oposicion na Venezuela tabata scondi den Embahada Mericano na Caracas. Henter e luga tabata rondona pa agentenan secreto. “E mester tabata un proceso largo pa studia unda por haya un buraco y transporta Machado pa costa. Por a hib’e na e costa pa Trinidad, pero e distancia entre Caracas pa e area ey ta mucho largo. Otro opcion lo por tabata Colombia, pero no tin confianza den Presidente Petro. A keda Aruba cu ta mas cerca, pero Corsou tin un contingencia di avionnan militar Mericano cu ta di FOL.” Ta avionnan cu regularmente ta bula den e asina yama ‘flight information region.’ Sinembargo, ta vuelonan cu Venezuela ta custumbra cu nan caba. Locual a nota den e dianan prome cu a saca Machado di Venezuela, ta un cantidad di vuelo di avion militar Mericano riba e Golfo di Maracaibo. “Tur e maniobranan ey inicialmente tabata pa provoca e Venezolanonan y tambe pa test e sistema Venezolano, pa mira con e lo funciona si tin un accion.” Pero hecho ta cu Maria Corina Machado for di algun tempo caba tabata bisa cu “mi ta bay Oslo pa busca mi premio,” y segun e analista, e ta kere cu for di e tempo ey caba ta trahando riba e plan pa sak’e di e pais. Como tal, e vuelonan riba Golfo di Maracaibo por tabata un forma pa despista autoridadnan di e pais bisiña.
E disfraz, e vehiculo, ademas cu probablemente placa pa paga ciudadanonan pa yuda, a permiti pa Machado por a subi un boto di piscado y bay pa Corsou. “Minister President di Corsou a bisa cu e no tabata sa di e accion, y mi por compronde esey tambe. E tabata un mision secreto. Pero mi ta supone cu servicio secreto si tabata sa pasobra e avion tabata warda Machado. Por ta e ora cu Machado a yega por a informa Minister President, pero no tabata necesario.” E pensamento ta cu Machado no a yega Corsou cu e boto di piscado, sino cu memey di lama, un helicopter a busk’e y a hib’e directamente pa Hato.
Es mas, Gobierno Mericano lo a ofrece pa staciona helicopter tanto na Aruba como Corsou pa yuda den ‘search and rescue.’ Na Aruba, autoridadnan a bay de acuerdo, cu excepcion di Ministerio di Defensa di Hulanda cu a mustra cu ya caba Wardacosta tin su helicopternan pa yuda den buskeda. E helicopter lo a bin dia 4 di December, pero door cu Defensa Hulandes a bisa no, e proceso no a sigui. “E tabata mustra cu tabata kier a tene tur cos entre ekiponan Mericanonan, sin intervencion di ni Defensa Hulandes.”
Diplomacia
Si Merca a ehecuta tur e proceso pa saca Machado di Venezuela sin envolve Reino Hulandes, sin informa autoridadnan na Corsou ora di crusa su espacio pa un mision special, tecnicamente e ta un violacion diplomatico. Pero segun e ex-diplomatico na Bon Dia Aruba, e momento ey, locual ta pisa mas ta e seguridad di Machado. “Mi no sa realmente cuanto Minister President di Corsou tabata sa. Si e contesta ‘Mi no tabata sa,’ e discusion a caba.” E probabilidad grandi ta cu a informa autoridadnan na Corsou na ultimo momento, mescos cu ta e caso cu autoridadnan Hulandes.
Segun e ex-diplomatico, mester ta cla pa tur hende cu Gobierno di Maduro ta bay cay. Y como tal, e simpatia pa Maria Corina Machado awor ta importante pa relacionnan di nos paisnan cu Venezuela. Esey ta motibo tambe pakico diferente lider di paisnan Sur Americano a presencia e otorgamento di e Premio Nobel di Paz na Oslo. “Ningun di nos lidernan a desea Maria Corina Machado pabien. No mester bisa algo politico.”
Horcan
E ex-diplomatico sinembargo ta mas preocupa cu e silencio di lidernan na Aruba cu no ta prepara comunidad pa cualkier eventualidad. “Ora cu tin posibilidad di un horcan, ta avisa tur hende con pa prepara, si coriente of awa bay. Pero awor ta actua comosifuera e posibel conflicto Merca-Venezuela no ta mishi cu nos. Ora awa ta yobe na bisiña, e ta pinga na bo cas.” Realidad ta cu tin instalacion militar Venezolano hopi cerca di Aruba y cualkier avion Mericano bula den espacio Venezolano por trece un reaccion cu por afecta Aruba directamente. Segun e ex-diplomatico, no ta cuestion di spanta comunidad, pero si prepara tur hende pa ta alerta y prepara pa cualkier eventualidad.
Machado lo por bolbe solamente como lider
E pregunta awor ta con Maria Corina Machado lo bolbe Venezuela. E prome fase tabata pa sak’e di Venezuela, y awor pa e bolbe su pais. Segun e ex-diplomatico, tin dos opcion. Bolbe drenta e lider di oposicion den forma scondi, via Aruba of Corsou of hasta Trinidad. Pero e probabilidad aki extremadamente chikito. “Pa e señora bolbe Venezuela, mester percura cu Diosdado Cabello y Nicolas Maduro no ta na poder mas, sin presencia di e seguridad Cubano. Pasobra di otro banda, nan lo mata Machado. E unico manera pa Corina Machado bolbe ta cu avion na Maiquetia, hunto cu Edmundo González Urrutia kende segun opositornan di Maduro ta e real ganador di e ultimo eleccion presidencial na Venezuela. Manera ta conoci, González Urrutia a huy for di e pais y a haya asilo na Spaña. “Tin un vacuum actual na Venezuela. Tur e lidernan di esnan cu ta opone Maduro ta pafo di e pais. Como tal, e momento ta awor pa e lidernan manera Maria Corina Machado bolbe. Esaki ta e momento.”
Mester bisa cu den fin di siman, e actividad militar Mericano cu avionnan di Marina Mericano a continua cerca y den espacio aereo di Venezuela.
