Cancer di cuero ta e tipo di cancer mas diagnostica y cu ta prevalece na Aruba. Tin un promedio di 109 caso nobo di cancer di cuero diagnostica tur aña.

Dokter di cas, Sharlin Vis a bin cu recomendacion pa protege nos mes di e tipo di cancer aki y con pa preveni na tempo e tipo di cancer aki. E cancer di cuero cu ta maligno ta categorisa den dos grupo: E cancernan cu no ta melanoma y cancernan cu nan ta yama melanoma.

Cancer cu no ta melanoma
E cancernan di  no melanoma ta e di dos sorto di cancer di cuero. Un ta e basalioma nan of vasocelular carsinoma y espino celular carsinoma (squamous cel y basal cel skin cancers).  Tur dos ta un tipo di cancer di cuero cu e factor di riesgo ta e rayonan ultra violenta di e solo.

Considerando cu nos ta biba den un area tropical di solo, unda e rayonan di solo ta cay directo riba superficie y riba nos cuero, mester tene cuenta e siguiente recomendacionnan. Dr. Vis ta recomenda pa proteha nos cuero contra e rayonan ultra violeta, specialmente si ta un tipo di cuero cu no tin mucho pigment, kiermen hendenan cu ta color di cuero mas cla, nan ta mas na riesgo. E hendenan di color mas scur y cu mas pigment di cuero ta un tiki mas protegi. E dokter a splica cu e pigment den nos cuero ta traha manera un parasol cu ta protege nos contra e rayonan di solo.

Ta importante pa evita solo den e oranan pik entre 10or di mainta te cu 4or di atardi. Den caso pa ehempel cu bo ta bay lama, specialmente cu muchanan cu nan cuero ainda ta mas sensibel, ta bon pa tene cuenta cu e oranan ey. Igualmente ta bon pa uza un sunblock cu un factor di proteccion ariba 30 SPF. Si bo ta bay disfruta di nos beach den oranan pik di solo y bo ta protege bo mes bou un parasol of palapa,sin embargo mester ta protegi cu sunblock, ya cu e santo blanco ta refleha e solo. Tambe ta bon pa bisti flanel di manga largo pa protege di e solo. Tin parti di nos cuerponan cu mester protege hopi bon di e rayonan di solo, nan ta: mannan, horeanan y nanishi.

Cancernan basal
Encuanto e cancer basalion of basale e ta un tipo di cancer di cuero cu bo ta wak hopi biaha ariba e nanishi y mannan, unda e curpa ta ricibi mas e rayonan di solo. E ta un tumor cu ta cuminsa manera un mancha y despues e ta haya manera un buraco meymey, pues e parti di afo ta manera un krater of boca di un volcan.

Ora cu bo ta wak algo straño asina riba bo cuero, dokter Vis ta recomenda pa no keda warda un desaroyo asina riba bo cuero. E cancer aki no ta uno cu ta plama, pero e ta crece paden. Si pa ehempel e ta crece riba nanishi of riba e rand ariba di bo horea, como cu e ta crece di paden e ta destrui e weso of structura di e parti aki di bo cara. Pa atende cu e tumor aki ta mas dificil, locual ta ocasiona algun problema cosmetico. Si ta trata di bo nanishi pa ehempel, hopi biaha e no ta keda nechi.

P’esey ta importante pa atende e asunto aki na tempo. E por wordo opera y te hasta tin biaha mester di bestraling. Despues mester keda monitor pa cinco aña pa wak si e no ta bin bek. E ta un cancer cu no ta plama, pero si e por bin na mas luga.

E espino celular carsinoma ta un cancer prominente mas tanto den hende grandi, pero esaki no ta descarta cu hende jong tambe por hay’e. Nan ta hende grandi cu a wordo exponi hopi na solo y nan ta haya cu tipo di cuero manera cu cayo, seco y duro, etc.. Tambe e ta conseha pa no tarda mucho cu esaki. Aunke no ta plama lihe, pero si e por plama y bay afecta otro partinan di curpa.

No tur daño di solo ta bira maligno, e ta alrededor di un 10%. Pero ta importante pa wak si tin cambio den bo cuero manera si e ta crece, bira cora, hincha, bira un tiki duro, etc., nan ta cambionan cu bo mester tuma accion y consulta bo dokter.

E personanan cu ta traha henter dia bou solo of ta traha banda di caminda y tambe na beach, ta importante pa protege nan mes. Nan ta hopi exponi na e rayonan di solo. Ta bon pa nan uza ya sea pechi of sombre no scur y protege bon contra e solo e partinan cu ta mas exhibi di bo curpa pa asina protege e cuero.

Melanoma
E tumor mas maligno cu tin di cuero ta e melanoma. Sra. Vis a bisa cu esaki ta un cancer cu nan tin miedo di dje, pasobra e ta hopi maligno y e ta plama lihe. E influencia di e solo den esaki no ta hopi prominente manera e otro tiponan di cancer. E melanoma ta manifesta mas tanto riba e hendenan cu tin hopi scupi dios.

Ta importante pa bo conoce bo scupi dios bon pa ehempel si nan ta crece lihe of si ta cambia di forma, y e ta bira iregular. Of tambe si el a cambia di color, sangra y/of grawata, ta importante pa bo bay bo dokter mesora. Si bo ta un hende cu tin hopi scupi dios, laga bo dokter wak nan regularmente, ya sea un bes pa mita aña of un bes pa aña, specialmente pa esunnan cu bo mes no por wak bon. Tin diferente tipo di melanoma, pero considerando cu e ta un dokter di cas y no un dermatologo of dokter specialista di cuero, e ta prefera di abstene di papia den profundidad riba e topico aki.

Jurette Croes, kende ta promotor di salud di departamento di Salud Publico, a bisa cu e tipo di recomendacion y informacion aki ta importante, ya cu nos ta biba riba un isla tropical unda nos tin hopi solo, locual ta e causa di influencia principal riba e salud di nos cuero.