“Un reto grandi cu e fondo di AZV ta para su dilanti pa 2022 pa asina garantisa cuido medico pa e poblacion di Aruba bou e circunstancianan aki” tabata e palabranan cu Edwin Jacobs, director di AZV, a menciona ayera mainta y na unda tambe a duna di conoce cambionan cu lo tuma luga pa loke ta trata diferente servicionan di seguro medico general.

Den un conferencia di prensa, el a splica cu pa via di un peticion di ayudo financiero di likides cu Aruba a solicita na Hulanda pa por enfrenta e efectonan financiero di pandemia Covid-19, den Conseho di Reino a keda dicidi cu como condicion Aruba tin cu haci reduccion den su gastonan di AZV cu un promedio di cinco miyon pa aña, a base di e decision aki gobierno a encarga AZV cu e tarea pa busca e recortenan aki den tres campo den e cambionan di pakete di beneficio, promove eficiencia den sector di cuido y diseña instrumentonan di maneho pa termino largo.

Pa cu esaki diferente cambionan lo tuma luga e aña aki y cu ademas lo causa un impacto riba aseguradonan na unda nan a splica pakico ta asina importante compronde e reformanan aki pa asina salvaguardia e fondonan di AZV.

Despues cu ayera nan a reuni cu comision fiho di salud na Parlamento di Aruba nan a papia tocante e situacion financiero y tambe Wave 5 model cu AZV a presenta cu e diferente cambionan cu lo wordo introduci manera cu e leynan lo keda cla, segun loke Solange Tchong, PR di AZV a declara na medionan di comunicacion presente.

Den cuadro di e presentacion di e plan 2022 cu ta hiba e nomber ‘Ban reforma pa garantisa’, tambe tin e introduccion di 5 Wave cu ta consisti di cinco parti na unda cu e prome wave tabata trata di posponemento di pago, e cual a tuma luga den prome lunanan di e pandemia pa por mantene AZV, e di dos wave ta limitacion di beneficio di aseguradonan pafo di ley di AZV, di tres wave ta e limitacion di beneficio den e ley, temporisacion di cuido ta di cuater wave y di cinco wave ta e reduccion di tarifa y presupuesto.

Jacobs a menciona cu esaki ta e modelo di cinco ola cu AZV a diseña, na unda cu e implementacion na aña 2020 nan a logra un recorte di 35.4 miyon florin conforme cu e condicion cu Hulanda a pone pa Aruba, pa aña 2021 tabata di 36 miyon florin segun nan ultimo proyeccionnan.

Pa 2022, e condicion ta keda igual unda cu mester recorta e gastonan cu 60 miyon florin cu segun Jacobs a bisa “e ta un tarea inmensamente grandi y dificil, di cual AZV conhuntamente cu Gobierno tin cu bay wak con nos ta bay logra esaki”.

El a trece dilanti un bista riba e posicion financiero di fondo di AZV unda cu a expresa cu 2019 tabata un aña hopi bon pa e fondo caminda cu entradanan a aumenta y a surpasa e gastonan unda cu pais Aruba no mester a duna un contribucion na AZV despues di hopi aña.

Na aña 2020 ora Covid-19 a yega na Aruba e situacion a empeora economicamente cu a trece un reduccion fuerte di entradanan na prima y na BAZV, gastonan a aumenta cu 4 miyon florin y gobierno mester a duna un contribucion di 99.7 miyon florin na e fondo pa por a cubri e gastonan.

Pa loke ta trata 2021, e proyeccion segun Jacobs a sigura ta mustra cu gobierno tambe tin cu duna un contribucion di 58.9 miyon unda cu nan a presupuesta 94.5 miyon, e diferencia ta debi na crecemento economico cu tabata mas fuerte di loke nan a premira na momento di traha presupuesto di 2021 y tambe e gastonan cu a keda den e cuadro cu nan a proyecta pa 2022.

Pa e aña aki, si nan no ta implementa 5 Wave Model, pais Aruba ta proyecta pa duna un contribucion di 64.2 miyon florin a pesar cu entradanan lo crece segun nan ta premira, si nan ta aplica e modelo aki nan ta mira cu e contribucion di e pais lo bay ta di 11.6 miyon florin of e deficit cu fondo AZV lo bay tin ta proyecta na e momentonan aki na e cifra aki.

“Nos mester tene na cuenta cu te momentonan aki na e presupuesto cu gobierno ta trahando riba dje ta sali afo cu no tin contribucion di pais Aruba na e fondo di AZV, lo cual ta pone AZV dilanti un reto inmensamente grandi pa wak con nos ta bay yega y con nos ta bay haci cu e deficit cu na e momentonan aki nos ta proyectando pa 2021, ademas di e implementacion di 5 Wave Model”, Jacobs a enfatisa.

Nan a identifica diferente oportunidad cu nan ta kere cu lo yuda nan yega na e condicion di 60 miyon florin, e wave number dos cu ta trata di limitacion di beneficio di aseguradonan pafo di ley di AZV a ser implementa na aña 2020 cu lo trece 2.5 miyon florin, akinan tambe lo tin e contribucion propio di begeleider cu ta bay cu e asegurado di 300 florin, ademas a reduci e daggeld na mita, banda di dje e transporte interno local tambe ta duna un parti di reduccion.

E tarea cu nan a haya ta pa parti e peso di e recorte riba tur e actornan den cuido medico, esaki ta aseguradonan cu den e wave tres tin riba mesa e proposicion pa introduccion di un contribucion propio pa cierto servicionan medico, pa cu esaki el a declara cu te ainda e decision final no a wordo tuma pero ta importante pa comunidad haya sa kico nan ta trahando riba dje y kico por espera den 2022.

Tin un proposicion pa un contribucion propio di 15 florin na momento cu persona ta haci uso di servicio di prome auxilio na hospital (SEH), un otro contribucion na servicio di dokter di cas den oranan di atardi of anochi (HAP) di 15 florin, pa cada remedi cu un persona ta haya receta di dje pa botica tin un contribucion di 2 florin, pa cada test di laboratorio tin un contribucion di 1 florin y pa cada bishita of consulta cu un dokter specialista tin un contribucion di 5 florin.

Ta importante pa aclaria cu pa bay dokter di cas, personanan no mester duna un contribucion pa asina por tin acceso na dje na tur momento.

E proposicionnan aki a wordo poni riba mesa na unda cu segun Jacobs a sigura, nan mester cana su caminda di formalisacion den ley cu tin cu pasa na gobierno y despues na parlamento ainda.

Banda di dje, nan tin e lista positivo di cambionan den remedi cu aña pasa a keda introduci y despues no a bay door, e aña aki ta poni riba lista pa asina keda introduci unda cu tambe lo yuda trece un recorte den e gastonan.