Si lo no exigi di Valero pa limpia, Gobierno lo bira doño di tereno yena cu asbest

6AcuerdoValero (2).JPG
Te ainda no ta sigur si Valero lo bay limpia e tereno banda di Fort Heuvelstraat cu den poco tempo lo traspasa pa gobierno di Aruba. Riba e tereno di e refineria tin hopi sushi, entre otro un gran cantidad di asbest.
 
Un poco luna patras nan a dump mas sushi tambe patras di e cero di santo cu ta tapa e asbest. No ta sigur di kico e sushi nobo ta, pero e habitantenan di e caya cu ta mas cerca, ta preocupa. Nan ta preocupa pa 10 aña caba, momento cu Valero a dump e asbest na e luga. E prome aña e asbest a keda den aire liber, den saconan di plastic warda. “Un aña den e solo y biento cu ta hasta mas duro aki banda, e saconan a keda drumi. Despues nan a tapa nan cu mas plastic y tera. Pero ami cu mi casa tin miedo cu algo a scapa. Y te awor nos tin miedo pasobra segun ami, e no ta warda bon ainda”, un di habitantenan, Jaap de Vries ta bisa.
 
E hunto cu otro bisiñanan cu ta biba hasta mas cerca di dump ta riba un lucha pa 10 aña. El a papia cu diferente instancianan di gobierno. Y te juni e aña aki, Valero oficialmente nunca a sinta cu nan pa papia di posibel efecto pa nan salud y compensacion pa daño. “Wak nos cas ta basta grandi y nos ta hende grandi caba. Pero si dado momento nos kier bende nos cas pa biba mas chikito pa tin menos trabou, esaki a bira imposibel. Ken ta bay cumpra un cas banda di un dump di asbest?”
 
Areglo riba limpieza
Señor De Vries e ora ta exigi pa gobierno of Valero duna nan un chekeo medico y asina determina si e dump a afecta nan salud. Tambe nan kier un forma di compensacion financiero. Na mei habitante De Vries a manda un carta pa Valero, unda ta pone nan responsabel pa tur daño y asina no perde e boto awor cu e compania ta den negociacion cu gobierno di Aruba riba e aspecto di medio ambiente. Den sentido kico Valero lo bay limpia y kico no y cuanto placa lo laga atras pa den futuro lo por limpia e terenonan, ora lo cera e refineria permanente.
 
Gobierno ya caba a indica cu lo bin un areglo pues lo no exigi di Valero pa limpia tur cos. Ambos partido mester a cera e areglo luna pasa caba, pero te ainda no a logra. Segun minister encarga, Mike de Meza, e asbest no ta forma peliger pa e salud di e habitantenan pasobra e ta warda safe den containernan. Segun e Valero tin potretnan cu ta mustra esaki y su team cu ta negocia actualmente e areglo, a mira nan. Sinembargo e lider di e team, Richard Arends ta indica cu e no sa nada di e potretnan.
 
Core den circulo 
Mientrastanto De Vries ta keda lucha y finalmente a ricibi un carta di Valero indicando cu a base di locual el a manda no por constata cu ta trata di asbest. “Pero m’a manda nan un potret so como ehempel, pa mustra nan e situacion cu tur e sushi. Claro cu bo no por wak e asbest riba dje, pasobra e saconan ta bou e santo. Awor nan ta uza mi potret contra mi pa caba e asunto.” Pa colmo el a ricibi contesta di e compania locual cu ta representa Valero na Aruba, mientras el a manda su carta pa e oficina principal na Texas, Merca. “Por ta nan ta kere cu nan no ta responsabel como compania madre, pero mi sa di hurisprudencia cu nan tambe ta responsabel pa tur nan companianan ruman.”
 
Di banda di gobierno nunca el a tende algo directo, ni cuanto instancianan el a bishita. “Mi no tin mucho fe cu awor mi ta bay tende algo for di nan. Porta nan ta bay manda mi e mesun carta cu m’a caba di haya for di Valero Aruba. E ora nos ta sigui core den circulo.”

You May Also Like

Acuerdo pa fortalece relacion cultural y comercial cu Guajira

Dialuna anochi a keda firma un memorandum of understanding (MoU), entre director di Stichting ...

‘Reglamento pa regalo pa politico tambe tin atencion di gabinete’

Mandatario encarga cu cultura Xiomara Ruiz-Maduro (MEP) ta adresa e tema di regalonan pa ...

image.jpeg

KPA: 20 detencion, 6 rijbewijs kita y 1450 na boet, fin di siman

Den cuadro pa por siña e studiantenan na Academia Policial E.J. “Watty” Vos algun ...

unnamed.jpg

Love is in the ads by Janelle Flemming

Hoben Arubiano Janelle Flemming a traha riba un articulo special pa Valentine’s Day, ilustrando ...

mucha cera den auto

Baby cu mucha chikito laga den auto cera pa mayornan landra

Polis a kiebra bentana di un auto cera pa asina por saca un baby di algun ...

“Purba pensa pa dos biaha, ora bo tira algo den bari di sushi kico ta bay pasa cu e”

ORANJESTAD – Reciclahe ta un proceso ora e materia cu ta compone varios material ...