E aña aki 2020 a nifica uno di hopi reto pa Reclassering en Jeugdbescherming Aruba.

Aña a habri bon pa e fundacion aki cu ta traha pa socialisa nos hobennan cu a cay den problema cu husticia. Den sentido cu den dialogo cu gobierno pa prome biaha den historia di Reclassering, nan a haya mas subsidio pa asina nan por amplia nan proyectonan. Pero tambe pa nan por a haya mas instrumento pa traha cu nan grupo di meta. Asina directora di Reclassering, Seraida Pemberton a declara na Bon Dia Aruba.

Pero Covid a haci su presencia na Aruba treciendo un paro na mayoria di actividad no solamente na Aruba, pero rond mundo. Reclassering a sigui traha durante e pandemia, pero den un forma menos personal. Nan a traha mas tanto via Whatsapp video of call, tambe haciendo uzo di Zoom.

Casonan

Nan ta trahando cu un grupo hopi dificil. Ya cu e ta un grupo cu no ta buscando ayudo y cu di un forma nan a pasa e limitenan di nos sociedad, y nan a cay cera pa un of otro motibo. E hecho cu e pandemia t’ey, e hendenan toch a keda bay cera y casonan a keda bay dilanti. Pero si den un forma menos cu normal.

E no por bisa cu e trabao di Reclassering a bira hopi durante e delaster nuebe luna aki debi na e pandemia. Den sentido cu e cantidad di hobennan cu a cay cera e aña aki a baha considerablemente. “Covid cu e shelter in place y tur e medidanan a pone cu e hoben tambe tabata menos riba caya y menos envolvi,” el a declara.

E cantidad di hoben cu a cay cera pa delitonan serio a baha basta, el a laga sa. Esaki tabata un parti positivo cu tabatin durante e pandemia. Antes e cifra tabata mustra cada bes mas muchanan mas jong envolvi den problema grandi cu husticia. Pero el a splica cu e aña aki tabatin menos caso di crimen severo.

E edad mas jong cu nan a haya tabata di 12 aña e aña aki. Pero tambe tabatin caso basta serio di rekmento of delito contra moral, debi na e temporada di shelter in place, caminda tur hende tabata cera na cas. Tambe casonan relaciona cu bringamento riba caya. Mientras cu ladronicia a baha un tiki. E situacion di e adultonan envolvi den delito a keda casi mesun cos.

Psicosis y agresion

Locual Reclassering a ripara e aña aki tabata un desaroyo cu el a cualifica di straño, caminda hopi hende ta cay cera den un estado di psicosis mental y agresion. E tipo di caso asina a subi basta, el a bisa.

“Esey ta algo cu toch mester pone atencion na dje.” E echo cu tin cantidad di hende cu no ta traha, nan tin hopi stress y tension dor di e situacion financiero. Tambe famianan cu no tin nada di come y cu hopi cabes di famia a perde trabao y logicamente no tin entrada. Tur esaki ta keda refleha den e estado emocional y psicologico di e hendenan aki. Esaki ta e casonan cu Reclassering ta bin atendiendo mas y mas.

Otro situacion cu nan ta ripara mas ta e problema psikiatrico combina cu adiccion cu a sali hopi mas e aña aki casi tras di lomba caba. E ta un problema cu basicamente Reclassering no ta ekipa pa cu esey. “Pasobra e parti di adiccion combina cu psikiatria e ta toch un problema basta serio. Y nos kier take esey tambe otro aña,” Pemberton a bisa. Nan kier tin e recursonan y conocemento necesario pa berdaderamente atende cu e problema aki.

Pa atende cu e tipo di asunto aki, nan mester di personal no solamente pa e hobencitonan aki por haya e guia, pero un guia structura. Un guia cu e ta haya cu nan mes mester ta hopi creativo debi cu nan ta traha cu hendenan cu no kier e ayudo cu nan ta brinda na nan. “Mi ta usa e palabra ayudo, pasobra bo ta yuda nan.”

Igualmente nan ta yuda comunidad dor di traha cu e hendenan aki pa nan no haya nan mes den problema cu husticia y bolbe comete un delito. Pa logra esaki Reclassering mester cambia e mentalidad pa e hoben por busca otro sorto di solucion cu no ta bay contra ley pa atende su problema.

Problema financiero y husticia

Reclassering a sigui traha teniendo cuenta cu tur e medidanan di DVG, pero nan mester busca modo pa sigui eherce nan trabao. Por lo general Reclassering ta bay bishita cas di hende, pero debi na e pandemia e sorto di bishita aki a baha hopi.

Pemberton a bisa cu Reclassering ta consciente cu aworaki nos mester custumbra biba cu un normal nobo. Den e caso aki Reclassering mester ta creativo den su forma pa bay atende e problemanan na 2021. E ta mira cu aworaki Covid ta haci un efecto grandi. Pero e ta kere cu pa 2021, Reclassering di banda di husticia ta bay sinti’e mas.

“Pasobra bo ta bay wak hopi mas pobresa y hopi mas hende den problema financiero.” Aworaki nan ta wak cu e problema socioeconomico aki ta hopi, pero pa 2021 nan ta premira cu nan lo bay crea mas problema riba e area penal, pa motibo cu e placa di spaar cu tur hende tabatin e aña aki y cu ainda nan por a usa, esey ta bay caba.

Entre mas largo nos ta keda den e situacion financiero di crisis dor di e Covid, mas problema nos ta bay wak na Aruba. P’esey otro aña Reclassering ta purba di adresa, con nan ta bay atende cu e problema ey.

E bon ta -segun Seraida Pemberton- cu Reclassering ta bezig ampliando su personal. Pero tambe con nan ta bay structura nan trabaonan pa por atende cu hopi problema cu nan ta premira cu lo bini pa 2021 di hendenan cu lo por haya nan mes den problema cu husticia.

Otro aña Reclassering lo kier bon cu un sitio mas apropia pa e hobencitonan cu ta cay cera. Reclassering ta sondeando, y nan por ripara mas ainda e necesidad urgente, pa un luga di reclusion pa persona menor di edad bini. Nan ta bezig trahando riba e area ey, y nan tin den bista cu pa 2021, nan por habri un cas atrobe pa atende cu e asunto aki.

Na aña 2017 Reclassering mester a cera nan cas, unda nan tabatin hobennan cu a haya nan guia y cu a duna bon resultado, segun Pemberton. “Nos ta purba haciele bek otro aña,” el a bisa.

Nan ta den dialogo caba pa haya un luga cu tin un tereno adecuado pa realisa e proyecto aki. Tambe nan ta dialogando cu gobierno pa wak e posibilidad si e fundacion aki por lanta e institucion aki. Nan tambe ta den combersacion cu un fundacion na Bonaire cu tin un institucion cu e mesun meta aki.

Directora di Reclassering ta haya hopi positivo cu e proyecto di e instituto aki pa tene e hobennan cu a cay cera pa problema cu husticia lo por bira un realidad pa 2021. Eynan e hoben lo participa den diferente proyecto cu nan lo bay traha cune, por ehempel agricultura y criamento di bestia, conhuntamente cu Santa Rosa.

Directora di Reclassering a bisa cu nan ta bezig pa set up un proyecto den e direccion aki, e ta kere cu pa final di 2021, nan ta cla pa pone draai e instituto nobo aki.