Pa minister Bikker cambia ley administrativo pa penal pa combati ilegalidad no ta solucion. Tin hopi peticion den pueblo pa cambia Ley di Admision y Expulsion. Principalmente pa motibo cu aworaki, pa motibo cu e no ta un ley penal sino uno administrativo. Na 2007 el a conoce cambio y despues no a pasa den ningun cambio mas sino te na 2018, bou di e actual gobernacion.
Minister di Husticia Andin Bikker, den conferencia di gobierno, a bisa cu personalmente e no ta kere cu mester cambia e ley pa uno penal. Na momentonan aki si un persona trata di drenta di Aruba mas cu un biaha, e ta recidivismo pa cual por persigui’e penalmente.
Di otro banda, el a splica, mester tene cuenta cu e capacidad pa atende cu e hendenan aki. Na Warda Nos Costa tin capacidad pa 43 persona di cual tres di nan a yega di drenta Aruba mas cu un biaha ilegal. Ministerio Publico ta monitor e situacion aki, pero atrobe, el a ripiti, mester tene cuenta cu e capacidad. “Berdad si bo persigui nan penalmente, bo ta manda un señal, pero na mesun momento bo mester di capacidad. Si a sigui cu e vuelonan humanitario (cu no ta depende di Aruba), e lo a trece un alivio tambe.” E mandatario a agrega cu cambiando e ley pa uno penal, no ta soluciona e problema por completo. Of caba cu e retonan cu Aruba ta experenciando door di e situacion social na Venezuela.
E mandatario a splica tambe cu na e momentonan aki e vigilancia di costa ta 24 ora pa dia y hunto cu RADAR ta haciendo un bon trabou. El a enfatisa cu e vuelo humanitario no por a sigui, no ta culpa di Aruba. Pa por manda e hendenan indocumenta bek Venezuela, mester di permiso di autoridadnan di e pais pa e avion drenta nan espacio aereo. Y e permiso aki no a haya. Tin un demanda pa e vuelonan humanitario y e ta kere cu sigur cu cada vuelo lo por tin 140 persona Venezolano aki na Aruba cu lo kier bolbe nan pais.
E problema ta cu antes despues cu un persona caba di sinta su castigo na KIA, e mesun dia ta pone riba un vuelo pa Venezuela. Pero awendia no tin e luho ey y mester want’e den un luga traha pa personanan cu a viola un ley administrativo y no penal. Pero e ta kere cu asina reanuda vuelo, e problema aki en parti ta soluciona.
Di otro banda si haci e ley penal y detene tur esunnan cu drenta Aruba mas cu un biaha ilegal, e lo pone un presion tambe riba e capacidad di KIA. Awo e capacidad ta di 285 pa esunnan cu a comete un delito y si persigui tur ilegalnan recidivista, lo no tin suficiente espacio. E solucion ta pa restaura e fluho di vuelo rapidamente.
