Tensionnan ta aumentando den henter Caribe despues cu un investigacion di Reuters a revela un expansion significante di operacionnan militar di Merca den e region, incluyendo e rehabilitacion di un base bandona pa hopi tempo den e era di Guera Friu na Puerto Rico. Lider di fraccion di MEP, Evelyn Wever-Croes a manda pregunta formal na prome minister Mike Eman pidiendo respuesta tocante e posibel instabilidad regional y criticando loke e ta describi como “un silencio preocupante” di Gabinete AVP-FUTURO.

Parlamentario Wever-Croes a entrega 22 pregunta por escrito na prome minister Eman, urgiendo transparencia inmediato riba loke el a yama “un escalacion peligroso di actividad militar Mericano” den lama Caribe.

E desaroyonan aki a lanta alarma den oposicion. Dia 24 di october Wever-Croes a dirigi un carta oficial na presidente di Parlamento di Aruba Marlon Sneek, exigiendo pa prome minister contesta dentro di dos siman e 22 pregunta detaya pa loke ta trata e escalacion militar Mericano

Wever-Croes a critica e gobierno di prome minister Eman pa no a duna ningun informacion na parlamento ni na publico a pesar di reportahe internacional extenso riba e acumulacion di Merca. Den su preguntanan por escrito, e parlamentario señala cu tanto Reuters como Al Jazeera a documenta operacionnan militar intensivo di Merca den Caribe y e parti oost di Pacifico, cu ta concerni directamente Reino Hulandes.

Parlamentario Wever-Croes ta enfatisa cu e silencio di e gobierno ta inaceptabel. El a subraya cu e actividadnan aki ta desaroyando den e vecindario inmediato y lo por tin implicacion pa seguridad y stabilidad di Aruba y Reino en general.

Den su carta, lider di fraccion di oposicion ta cuestiona e transparencia di gobierno, preparacion regional y proteccion civil. Entre e 22 pregunta entrega, varios a sobresali.

Wever-Croes a puntra prome minister Eman ki dia Gabinete AVP-FUTURO a ricibi informacion creibel pa prome biaha tocante e escalacion di actividad militar di Merca den e region, y cual instancia a keda informa; Dicon gobierno no a divulga e informacion aki na parlamento ni na publico; Y si a pone Aruba den alerta, y instancianan di seguridad local—incluyendo Guarda nos Costa y polis—a haya instruccionnan special.

E parlamentario a puntra tambe si ta existi un plan di contingencia pa proteccion civil den caso di incidentenan militar, entrada di refugiado, of hostilidad transfronteriso cerca di awanan di Aruba; Si e embahada di Merca a duna garantia cu operacionnan lo no infringui soberania regional of pone seguridad di e isla na peliger; Y si Gobierno ta prepara pa convoca un debate di urgencia den parlamento di Aruba pa atende e riesgonan aki.

Wever-Croes tambe a exigi claridad riba e coordinacion di gobierno cu Den Haag. El a puntra si ministerionan di Husticia of Asuntonan Exterior na Hulanda a haci evaluacionnan huridico tocante posibel repercusionnan di accionnan militar stranhero cerca di Aruba su teritorio.

Expertonan a adverti cu e cercania di Aruba na Venezuela, un tiki mas cu 25 kilometer for di e costa, ta pone e isla den un posicion potencialmente vulnerabel.

Si operacionnan militar di Merca intensifica, e riesgo di incursionnan den espacio aereo, encuentronan maritimo, of movementonan di refugiado por aumenta drasticamente. Piscadonan local, operadonan di barco y stakeholdernan di turismo a expresa preocupacionnan cu e isla por keda pega den tensionnan geopolitico fuera di su control.

Parlamentario Wever-Croes a ripiti e miedonan ey den su carta. El a puntra prome minister Eman si accionnan Mericano conduci na victima of friccion diplomatico, ki pasonan gobierno lo tuma pa protege e ciudadanonan y interesnan, pidiendo alabes un informacion publico dentro di 48 ora pa informa residentenan tocante riesgonan potencial, medidanan di preparacion, y instruccionnan di emergencia.

Oficina di prome minister Eman no a contesta publicamente riba e preguntanan di e parlamentario lider di MEP. Gobierno tampoco a confirma of nenga si Aruba a ser informa door di autoridadnan Mericano of Hulandes riba e mobilisacion militar cu ta andando.

E falta di comunicacion aki ta contrasta fuertemente cu e tono di gobiernonan bisiña. E Gobernador di US Virgen Islands, Albert Bryan Jr., a emiti un declaracion a traves di su oficina confirmando coordinacion cu autoridadnan militar di Merca, aunke el a enfatisa cu su administracion no tabata na altura di detayenan operacional. Bryan a bisa cu e presencia di Merca ta fortalece seguridad regional y ta stroba trafico di droga y arma.

Mientras tanto, na Hulanda, varios miembro di parlamento a busca aclaracion cerca e ministerio di Defensa Hulandes tocante e posibel rol di e base naval Parera di Corsou, cual ta anfitrion di personal Hulandes y Mericano bou di un acuerdo di defensa di hopi tempo.

Di acuerdo cu Reuters, e ehercito Mericano a cuminsa cu mehoracionnan na gran escala na e base naval anterior di Roosevelt Roads na Puerto Rico, cual a cera mas cu 20 aña pasa. Imagennan di satelite y potretnan na e sitio saca mey september ta mustra tripulacionnan ta limpia y drecha e camindanan cu ta conecta na e pista principal—parti di loke analistanan di defensa ta bisa ta un esfuerso di reposicionamento strategico dentro di un distancia impresionante di Venezuela, apenas 500 miya zuid.

E base di Roosevelt Roads un tempo tabata anfitrion di un di e stacionnan naval Mericano mas grandi di mundo, hungando un rol central den operacionnan di Guera Friu. Awendia, su revitalisacion ta señala un posibel cambio den prioridadnan militar di Merca pa Hemisferio Occidental, despues di decadas di enfoke riba Europa y Medio Oriente.

Un oficial di Merca a bisa Reuters cu e base ta ofrece amplio espacio pa logistica y ensamblahe di ekipo, loke ta sugeri cu e por sostene operacionnan den futuro cu ta envolve tanto avionnan di guera como avionnan di carga. Merca tambe a bin ta expande facilidadnan na Aeropuerto Rafael Hernández den e parti west di Puerto Rico y Aeropuerto Henry E. Rohlsen na St. Croix—dos lugar clave pa misionnan di transporte aereo y vigilancia.

E patronchinan di construccion y despliegue ta sugeri cu Washington por ta preparando pa operacionnan sosteni den of rond di Venezuela, segun fuentenan militar Mericano cita pa Reuters. Desde augustus, e Pentagono a despacha 13 barco di guera, cinco barco di sosten, y hasta un submarino di energia nuclear pa Caribe—e despliegue di mas grandi den e region desde “Operacion Sostene Democracia” na Haiti na 1994.

Entre e activonan ta e grupo di atake di portaavion USS Gerald R. Ford, cu mas o menos 10.000 tropa y decenas di avion; tres destructor di misil; y un flota di barconan di recarga y hospital. Avionnan di vigilancia, incluyendo avionnan di spionahe Poseidon P-8A, a bin ta bula rutanan di reconocemento ripiti riba Bahamas y zuid direccion di Venezuela.

E ehercito Mericano tambe a realisa por lo menos 14 atake aereo riba supuesto barconan di contrabanda di droga den Caribe y Pacifico for di comienso di september, matando 61 persona. Oficialnan ta pretende cu e operacionnan ta parti di e campaña priminti pa hopi tempo pa presidente Donald Trump contra rednan di narcotrafico. Sinembargo, e escala y naturalesa di e desplieguenan—incluyendo instalacionnan di radar, torennan di trafico aereo portatil, y almacenamento di municion na aeropuertonan civil—ta sugeri obhetivonan mas amplio.

“E tera ta bay ta siguiente,” segun Trump a bisa su partidarionan siman pasa, alimentando mas ainda e speculacion cu accion militar contra Venezuela por ta inminente.

Pa Aruba, e polemica a evoluciona rapidamente di politica exterior pa responsabilisacion domestico. E carta di parlamentario Wever-Croes ta señala e falta di transparencia y informacion y ta subraya e derecho di no solamente parlamento, pero tambe di pueblo pa sa kico ta pasando den e region.

Segun cu Merca ta restaura su basenan di Guera Friu y e tensionnan ta crece den henter Caribe, e isla ta haya su mes—un biaha mas—na e crusada di strategia di podernan grandi y vulnerabilidad di nacionnan chikito. Ta keda pa mira si gobierno di Aruba lo kibra su silencio y trankilisa ciudadanonan. Te ora esey pasa, Caribe ta vigila, y ta warda.