Oido, un di e sentidonan mas sensitivo y vital pa ser humano, tambe hopi biaha ta un di esnan mas lubida pa loke ta trata cuido diario. Manera ta custumber Quota International of Aruba ta organisa e siman di Conscientisacion di Cuido di Oido, di 22 pa 26 di september, pa trece e topico den comunidad y conscientisa, y alabes encurasha, tur ciudadano pa check nan oido.

Oido no solamente ta conecta nos cu musica, e zonidonan di naturalesa, of combersacionnan di tur dia. E ta esencial tambe pa enseñansa, desaroyo social y integracion den comunidad. Sinembargo, specialistanan ta adverti cu daño na oido ta progresa silenciosamente y, den hopi caso, ta ser detecta solamente ora e ta ireversibel.

Segun Organisacion Mundial di Salud (WHO), mas cu 466 miyon hende rond mundo ta sufri di perdida di oido. Ta calcula cu pa 2050, e cantidad ey por surpasa 900 miyon si no tuma medidanan preventivo y di tratamento na gran escala. E organisacion ta señala cu 60% di casonan den mucha por ser preveni cu intervencionnan simpel, manera vacunacion, control di infeccion, y uso responsabel di antibiotica.

Adultonan, di otro banda, ta enfrenta riesgonan adicional manera exposicion prolonga na ambientenan bruto, uso incorecto di headphones, malesanan cronico manera diabetes y hipertension, y tambe e embehecimento natural di e sistema auditivo.

“E zonido excesivo ta e enemigo silencioso nobo di salud di oido,” un informe di WHO ta enfatisa. “Exposicion constante na zonidonan riba 85 decibel, comun na conciertonan, clubnan nocturno, of hasta cu headphones cu volumen halto, por causa daño permanente.”

Na Aruba, estadisticanan oficial specifico riba perdida di oido ta limita, pero e datonan disponibel ta pinta un cuadro preocupante. Segun e Censo di 2010, mas o menos 6.955 persona, ekivalente na 6.9% di e poblacion, tabata biba cu algun forma di discapacidad. E porcentahe ta aumenta significantemente cu edad: entre 70 y 74 aña di edad, 22.6% di e poblacion a informa limitacionnan, y entre esnan riba 85 aña, e cifra a surpasa 60%.

Aunke e cifranan aki ta inclui diferente tipo di discapacidad y no ta enfoca exclusivamente riba oido, specialistanan ta di acuerdo cu perdida di oido ta un di esnan mas comun, specialmente bou di adultonan di edad avansa y trahadonan den sectornan manera construccion, turismo y entretenimento, caminda exposicion na zonido duro ta constante.

E ta un asunto cu mester di mas visibilidad. Hopi hende ta kere cu perdida di oido ta un parti normal di embehecimento, pero esey no ta tur ora, pues tin factornan cu por ser preveni.

E siman aki, Quota International of Aruba, FEPOH y diferente otro organisacion ta enfatisa cu prevencion ta e miho herment pa proteha oido.

Recomendacionnan ta inclui usa proteccion di oido den ambientenan di trabou of recreacion cu zonidonan duro; modera e volumen di e headphones y limita e tempo cu nan ta ser usa; evita di hinca obhetonan manera swab di catuna of potlood den e canal di oido; seca bo horeanan bon despues di landa of baña pa preveni infeccionnan; consulta un specialista si bo ta experiencia zonido, dolor of perdida di oido diripiente.

Segun expertonan mayoria problema di oido no ta aparece di un dia pa otro, pero ta acumula cu tempo. P’esey ta esencial pa actua trempan, specialmente pa hobennan cu awendia ta bisti headphones casi henter dia.

Un di e retonan mas grandi cu Aruba ta enfrenta ta e falta di datonan recien riba e prevalencia di perdida di oido. Sin informacion actualisa, ta dificil pa diseña politicanan publico specifico pa atende e problema.

Aunke ta asina, expertonan ta señala cu tin oportunidadnan cla manera inclui testnan di oido den controlnan medico di rutina, specialmente pa mucha y adultonan di edad, campañanan educativo na scol, universidad y luganan di trabou tocante e impacto di zonido, regulacion di zonido den espacio publico, clubnan nocturno y reunionnan masal, y programanan di sosten pa personanan cu perdida di oido, incluyendo acceso na aparatonan di oido y terapia.

Siman di Conscientisacion di Cuido di Oido no ta solamente tocante informacion, pero tocante accion. E mensahe ta cla: cuida bo oido awe ta nifica inverti den calidad di bida mañan.

Aruba ta para dilanti e reto di conscientisa pueblo riba un problema cu hopi biaha ta pasa sin ser nota, sinembargo, Siman di Conscientisacion di Cuido di Oido ta ofrece e oportunidad perfecto pa dal e prome paso.

Manera WHO ta adverti di un futuro cu mas di 900 miyon hende mundialmente ta sufri di perdida di oido, Aruba tin e oportunidad pa actua awor door di promove custumbernan saludabel, regula exposicion na zonido, y sigura acceso na cuido medico specialisa.

Prevencion ta den nos man, y conscientisacion ta cuminsa cu algo asina simpel manera baha e volumen, proteha nos mes den ambientenan bruto, y busca ayudo medico na tempo. Scucha bon no ta un luho: e ta un derecho cu nos mester proteha.