A pesar cu ministerio di Enseñansa a anuncia cu e proyecto di ley riba implementacion di e “functiehuis” y structura di salario pa sector di enseñansa ta cla pa trata nan den parlamento, ainda pa sindicato di maestronan di Aruba (SIMAR) tin puntonan cu mester di mas claridad.
SIMAR ta cauteloso cu e concepto di ley aki pa want’e un rato; ya cu ora e ta wordo trata den parlamento, dificilmente nan no por bin cu cambio mas.
For di basta aña caba nan ta bin trahado riba e structura di funcion y salario di docente por a bira un realidad; pero segun presidente di SIMAR, Sheila Tromp tin aspecto cu ainda nan kier discuti cu minister di Enseñansa, Michelle Hooyboer-Winklaar.
Mas claridad
Sra. Tromp a informa cu nan a sinta hunto den e grupo pa discuti riba e preguntanan cu a bay den direccion di e mandatario. El a laga sa cu nan a bay caba na minister y nan ta wardando contesta. P’esey den principio e concepto di ley ta un rato “on hold”. Tin cambionan cu a sosode cu den principio, segun presidente di SIMAR- nan no a pasa den e stuurgroep. P’esey nan kier tin mas claridad entre otro riba e cantidad di alumno pa un scol. E ta algo cu a wordo cambia sin tene cuenta cu e stuurgroep y cu nan kier debati riba dje.
Sra. Tromp a splica cu tin scolnan cu tin 6 klas; otro 10 y te hasta mas; y nan kier mas claridad riba unda ta bin e division tocante ki sorto di cabesante nan ta pone pa maneha e scolnan ey, ya sea si bo ta un cabesante A of B. Nan mester wak si e cantidad unda ta wordo haci e division di klas pa scol ta uno realistico. E ta entre otronan un punto pero el a abstene di bay den mas detaye ya cu den principio nan no por divulga mucho cos tampoco pa asina mantene nan loke a keda stipula den nan grupo.
Reunion cu minister
Ainda no tin un reunion programa pa SIMAR trata e asunto aki directamente cu e minister di Enseñansa. E ta haya e situacion aki fastioso ya cu tin biaha ora cu nan ta yega na e fecha e reunion ta wordo cancela. “E ta bayendo un tiki fastioso y nos ta net den un temporada cu nos ta hopi druk tambe. Tin biaha bo no ta haya tur persona di e grupo.” Pero siman pasa e stuurgroep aki sinta hunto; y nan ta wardando contesta awor for di ministerio di Enseñansa.
Nan ta spera cu prome cu parlamento ta bay den receso, e concepto di ley aki lo wordo trata ya cu e ta un prioridad cu ta andando for di basta tempo caba. Sinembargo mirando e cambionan cu a bin dilanti cu den principio e stuurgroep no a aproba, SIMAR ta cauteloso cu e concepto di ley aki y p’esey nan ta prefera pa want’e un rato. Pero nan kier wak esaki cla pasobra naturalmente eleccion ta na caminda; y nan kier cu e concepto di ley aki por cana lihe. “Pero tin biaha bo mester ta sigur di loke bo ta manda dilanti.”
SIMAR kier acerca e presidente di parlamento, drs. Mervin Wyatt-Ras pa con lihe e proceso aki por bay den nos organo legislativo, despues cu ta bin claridad riba e cambionan cu a wordo haci sin tene cuenta cu e stuurgroep.
