Directiva di Sindicato di Maestro di Aruba a tuma nota di un articulo(entre otro) cu a wordo publica cu titulo “SIMAR planeando welga riba prome dia di scol”.
E titulo no ta wordo trata mes den e articulo pero mas bien ta contene informacion cu ya a wordo publica cu e mesun tono y cifranan. Lastimamente esunnan cu a publica e articulo no por menciona cu nan titulo ta basa riba informacion ricibi di dirigentenan di SIMAR. Por cierto na ningun momento SIMAR a duna declaracion cu docentenan di EPI lo ta den welga.
Den e articulo ta menciona cu SIMAR kier welga y no solucion pa su miembronan, mientras cu SIMAR ta negociando cu Minister Hooyboer-Winklaar y a declara publicamente cu ta desea di bin na un solucion mas pronto cu ta posibel. Incluso SIMAR a anuncia cu docentenan di EPI lo a cuminsa traha dialuna cu e rooster cu nan a ricibi.
Loke mas a asombra Directiva di SIMAR ta e detayenan cu a wordo publica, cual ta regarda e contenido di e prome reunion cu a wordo teni cu Minister na inicio di e welga di Managernan di EPI, mientras cu un “gentlemen agreement” a wordo cera cu lo no divulga nada, ni trece nada di e contenido di e reunion na prensa mientras cu partidonan ta den negociacion.
Esaki a trece un sabor amargo cerca tanto dirigentenan como Managernan y miembronan di SIMAR ya cu SIMAR si a cumpli cu e palabracion aki. Esunnan cu a publica e articulo ta duna un impresion cu kier difama e Managernan cu simplemente ta para pa nan derecho, pa principio y ta pidiendo balor pa nan trabou y nan responsabilidad y tambe kier difama SIMAR pa e perde confiansa di su miembronan y docentenan di EPI. Mester remarca cu esaki no a stroba ningun desaroyo y no a kibra e union cu tin actualmente pa yega na solucion y bienestar di Colegio EPI y su funcionamento.
SIMAR ta spera cu partidonan por yega na un solucion pronto y cu tur empleado por reanuda trabou e siman aki. Mientrastanto e welga ta sigui spera di reaccion di Minister riba SIMAR y Managernan ultimo proposicion y docentenan, cu nan managernan ausente, ta cumpliendo cu studiantenan pendiente di e desaroyonan.
Ta haci un apelacion na docentenan pa ta pendiente pa medio di e contactonan di SIMAR.
