Segun reportahenan local di AHATA, nos por observa cu ya caba e grado di ocupacion na hotel na Aruba ta na e nivel mas abao den varios aña. Tambe nos ta nota cu segun reportahe CBA, cu entrada di gobierno di Aruba ya caba a baha den un manera hopi visibel den e delaster lunanan aki.

Tumando na cuenta varios reportahenan di banconan di inversion manera Bank of America Merril Lynch, UBS, y HSBC, mi persona ta bin na e conclusion cu tur loke ta sucediendo ta solamente un appetizer di loke ta spera nos. E wowo di e tormenta economico segun e banconan di inversion menciona lo ta den prome mita di 2026.

Inflacion ya caba eleva

E tema di mas importante den mi opinion di e decada aki, ta e storia di inflacion. Nos por wak cu na Merca y eigenlijk full rond mundo, cu e nivel di inflacion ainda ta bastante eleva segun analisis di Morgan Stanley.
Esaki ta causando basta sufrimento socio-economico pa mundo henter y siguramente tambe pa isla di Aruba.
Awo debi na e hecho cu “bao hood” economia global ta sumamente mas zwak cu ta desea, Banconan Central rond mundo ta cortando nan nivel di interes na un velocidad enormemente halto, segun banco HSBC. Expectativa ta cu esaki lo un bes mas hisa inflacion cu ya caba ta eleva den e lunanan binidero. Esaki lo cuminsa forma un presion bastante negativo economico mundialmente, incluso Aruba.

Shutdown di gobierno di Merca
 Ademas di inflacion, nos por observa cu dor di tension politico local, cu Merca su gobierno ta den un estado di “Shutdown”. E delaster biaha cu esaki a pasa tabata na 2018, pero e biaha aki e efectonan di e shurtdown por ta mas severo, debi na plan existente di Presidente Donald Trump pa kita varios trahador gubernamental di trabao.

Awo e shutdown ta simplemente haci e tendencia aki mas severo. Si kita varios trahador di nan cupo di trabao gubernamental, den contexto di un economia local bastante fragil caba, esaki siguramente lo tin efecto negativo pa sentimento di consumidor na Merca, cual lo kiermen hopi menos hende lo haci compras di luho, manera un vakantie pa Aruba.

Guera di tarifa cu China

Den henter e contexto di inflacion eleva y un economia bastante zwak caba, nos tin e cuestion di e guera di tarifa entre Merca y China. Esaki lo forma un golpi inflacionario, un bes mas.

Diferente analisis mas neutral ta indica cu prijs na Merca a cuminsa hisa debi na e guera di tarifa. Awo muy probabel cu e 100% tarifa riba China anuncia riba diabierna 10 di october no lo tuma lugar, pero e ta enfatisa si un relacion geopolitico entre e dos economianan mas grandi mundialmente cu ta birando mas y mas zuur & tenso. Tur esaki lo atrobe tin consecuencianan negativo pa economia global.

Manera menciona varios bes, e barometer neutral internacional pa e berdadero estado economico di mundo ta e prijs di oro. Den analisis extensivo, banconan di inversion manera Goldman Sachs, Bank of America Merril Lynch, UBS, y HSBC, tur unanimamente ta indica cu prijs di oro lo sigui hisa, cual no ta un indicacion positivo pa economia global, vooral pa un pais turistico manera Aruba.

Riesgo geopolitico fundamental: China & Taiwan

Pero tur e riesgonan economico inmediato cu nos a bespreek den e delaster alineanan ta keda hopi chikito compara cu e riesgo geopolitico bao superficie, cual ta e relacion entre China cu su pais bisiña Taiwan. E verzuuring di e relacion entre China cu Merca ta hisa e probabilidad cu China lo tuma accion riba Taiwan, mas y mas probabel riba plaso largo strategico.

Aunke e scenario aki no ta uno riba plaso inmediato, si bin un conflicto entre China y Taiwan, e lo ta un conflicto cu lo defini e decada aki, cu tambe lo tin impacto economico te hasta mas grandi cu full e crisis di COVID-19, segun analisis extensivo di Bloomberg. Awo ta imposibel pa sa precies ki dia un conflicto lo por tuma lugar. Pero observando e verzuuring duidelijk entre China cu Merca, gobernantenan mester cuminsa tuma e scenario aki mas y mas na cuenta.

Tumando tur observacion na cuenta, nos ta wak cu un tormenta macro-economico a yega y varios banco di inversion ta indica cu e wowo mes mes di e tormenta aki ta wordo spera na 2026. Dus pa lectornan local, e lo parce cu mas sla lo bin pa economia di Aruba, den lunanan binidero.