Simon Waslander: Segun data oficial: Turismo, sector hotelero a slow, menos confiansa den florin y expectativa pa inflacion mas halto

E siman cu a pasa, nos a wak ambos Centrale Bank van Aruba y Aruba Tourism Authority publica nan datasets oficial manera debe ser. Pero cu cada luna cu ta pasa, mi ta haya e reportahe di hechonan cu pa tur claridad ta basa riba datasets oficial di institutonan menciona, mas y mas “niet kloppend”. Mi ta hay’e personalmente hopi fastioso, cu ami mester tuma e rol di un sorto di “boeman”, pero un hende mester tuma e rol aki p’e, pa alerta pueblo di hechonan. Cu un bes mas ta basa riba data oficial di institutonan menciona.

Segun data di ATA Stopover “Visitor Nights” y segun data di AHATA RevPAR a baha.

Analisando e data di ATA, nos por wak cu den Juni 2025, compara cu Juni 2024, cu e total cantidad di anochi keda na Aruba a baha cu 0.4%. Segun data di AHATA, esaki ta e di dos luna sigui cu RevPAR a demostra un caida chikito.

Segun data di CBA: Business Perception bao comerciante a cay drasticamente.

Laga mi bisa sumamente duidelijk cu e siguiente grafieknan ta di Centrale Bank van Aruba mes. Riba pagina 4 di e “Business Perception Survey Report 2025-I” di July 17, 2025, nos por wak cu e index a cay drasticamente.

Segun data di CBA: Segun comerciante, inflacion pa hisa mas cu 3%.

Riba pagina 8 di e Business Perception Survey Report 2025-I” di CBA nos por nota cu mayoria di comerciante encuesta ta pensa cu inflacion lo ta mas halto cu 3%. Atrobe esaki ta data oficial di Centrale Bank van Aruba.

Segun data di CBA: Confiansa den Florin Arubiano Cayendo.

Den e publicacion “Consumer Confidence Survey Report 2025-I” tambe di Juli 17, 2025. Nos por wak cu bao consumidor den e prome kwartaal di 2025, cu confiansa den e Florin Arubiano a cay significantemente.

E hecho cu mi ta haya mas y mas opmerkelijk cu cada luna cu pasando ta cu ATA y CBA ta obviamente “cherry pecking” e data cu nan ta kies pa menciona den nan press release pa publico. Pero e mesun publicacionnan di institutonan menciona ta pinta un bista bastante diferente for di e titulonan di nan press releases.

Nota di redaccion: E articulo aki ta opinion di e autor y no ta refleha opinion di Bon Dia Aruba.