Diadomingo atardi a tuma luga un manifestacion interinsular, unda simpatisadornan Pro-Palestina riba islanan independiente den Reino, esta Aruba, Corsou y Sint Maarten hunto cu Hulanda, a reuni pa protesta contra e guera di Israel y Hamas den e Franha di Gaza. Aki na Aruba, tabata un grupo chikito cu a reuni dilanti e edificio di parlamento cu borchinan condenando e accionnan di Israel y purbando di hala atencion di nos gobierno pa e situacion aki.

E manifestacion yama “Draw the Red Line” tabata referi na e hecho cu gobierno di Hulanda ainda no a para cu suministracion di arma pa Israel, a pesar cu e Comision di Nacionnan Uni a declara oficialmente cu e pais den Medio Oriente ta cometiendo genocidio di e poblacion den Gaza. E manifestacion na Hulanda a ser organisa pa pone mas presion riba gobierno Hulandes pa insisti riba un boycott y paro den suministracion di arma pa Israel, ademas di “pidi apoyo pa tur forma di resistencia revolucionario pa sistemanan di opresion rond mundo,” manera e organisacion The Hague for Palestine (THfP) a publica riba nan cuenta di Instagram.

E manifestacion aki, cual a tuma luga na Amsterdam, a bin despues di un mobilisacion na Den Haag contra e “complicidad Hulandes den e genocidio di pueblo Palestino.” Aproximadamente 250.000 manifestante bisti den preto cu borchinan di mensahe condenando e actonan di Israel a reuni riba Museumplein den e capital di Hulanda.

Na Aruba, e organisacion Aruba4Palestine a organisa un manifestacion dilanti parlamento, cual a ser asisti pa al menos 20 persona.

A pesar di a reuni pacificamente, e manifestacion chikito a haya critica riba red social. Un usuario riba Facebook a comenta cu Aruba no mester ta envolvi den e asunto aki, bisando e grupo di manifestantenan cu, “Si boso kier aporta cu esey, Please [coy] un Vuelo y Bay ayanan y bay aporta.” Otronan ta bisa cu no ta bale la pena pa aki na Aruba tambe organisa manifestacion, ya cu segun nan, Aruba no por haci nada toch. Ademas, algun ta nota cu e enfoke riba Palestina ta mal poni, unda en bes di esey mester enfoca riba e problemanan cu Aruba ta experenciando: “Imagina bo Gobierno a entrega Autonomia na Hulanda via HOFA y tin hende ta kere cu nos por Free Palestine,prome nos tin cu Free Aruba.”

Bon Dia Aruba a acerca Aruba4Palestine puntrando di nan banda kico nan mesun mensahe tabata pa gobierno di Aruba. Sinembargo te ciere di edicion aki, no a ricibi contesta.

Desde un manifestacion grandi na Hulanda den luna di mei, gobierno Hulandes a cuminsa cambia nan posicion contra Israel, unda a tuma varios medida contra e gobierno Israeli, incluyendo un prohibicion pa dos minister Israeli ultra-derecha. Ademas, gobierno Hulandes a menciona plan pa prohibi importacion di productonan den asientamentonan Israeli y a apoya e plan di e Comision Europeo pa suspende medidanan comercial cu Israel.

Asina mes, no a mira ningun declaracion di gobierno pa un paro completo den suministro di arma, of un reconocemento publico cu Israel di berdad ta cometiendo genocidio contra e pueblo Palestino, manera e Comision di UN a declara.

Manifestacionnan pa conflictonan den exterior: E tin un proposito?
Un detaye cu a sobresali tocante e manifestacion diadomingo ta cu gran parti di comunidad no ta considera protestanan tocante asuntonan den exterior algo necesario pa Aruba tuma parti di dje. Es mas, globalmente, manifestacionnan sa haya mas critica cu apoyo den media y opinion publico, cual ta laga un pregunta central den mente: Ki proposito manifestacion tin di berdad?

Segun e organisacion Humane League, cual ta para principalmente pa stop abuso di animal, tin varios motibo pakico manifestacion ta importante y con nan por hunga un rol riba nivel gubernamental y societal.

Treciendo e tema den conscientisacion publico
Hopi hende por tin e idea cu manifestacionnan mester trece cambionan inmediato y exclusivamente den legislacion di un nacion. Sinembargo, esaki no ta e unico proposito di manifestacionnan. Segun Humane League, manifestacionnan ta crea espacio den sociedad pa un cierto topico bin den conscientisacion publico. Esaki por crea discusionnan, sea na cas, entre amigonan of hasta den gobierno. Tambe e por pone comunidad para keto y pensa criticamente riba no solamente e topico treci dilanti, pero tambe en general tocante politica, gobernacion of hasta balornan den sociedad cu kisas nunca a considera prome.

Manifesta pa protege humanidad y democracia
Bao ley humanitario di e Organisacion di Nacionnan Uni (UN), ciudadanonan mester ser protegi durante tempo di guera. Esaki ta inclui tambe institutonan publico cu ta esencial pa bienestar di ciudadanonan, manera hospital y scolnan, como tambe centronan di ayudo humanitario.

Durante e guera na Gaza, Israel a haya hopi critica internacionalmente pa nan bombardeo di areanan sobrepobla cu ciudadanonan inocente, incluyendo scol y hospitalnan. Desde mei 2025, e Organisacion Mundial di Salud (WHO) a reporta cu apenas 19 di Gaza su 36 hospital a keda den operacion despues cu mas cu mita a cay victima di bombardeonan aereo di Israel. Israel a acusa repetidamente cu e grupo militante Hamas ta operando den hospitalnan y ta usando institutonan civil como proteccion. Sinembargo, no a haya ningun evidencia concreto pa sostene e declaracionnan aki.

Israel su violacion di leynan internacional (E Convencion di Ginebra cual Israel a firma na 1951) a causa hopi preocupacion rond mundo, y te dia di awe paisnan influyente manera Merca y Hulanda no a tuma un posicion estricto pa stop esaki. Nan inaccion ta trece un dilema dilanti den comunidad global, unda hende ta puntra nan mes con por ta cu violacionnan di leynan internacional di derecho humano ta sigui sin intervencion adecua.

Manifestacionnan global tocante e situacion na Gaza y tocante otro conflictonan (Sudan, Congo, Ucrania etc.) ta tuma un posicion critico pa e falta di proteccion pa derecho humano pa miyones cu ta biba den condicionnan hororoso. Na mesun momento, manifestacionnan ta sirbi pa protege derechonan di ciudadanonan den cada pais, y pues ta un marcador di libertad den paisnan democratico. Ora esaki ser viola sin consecuencia, e ta habri porta pa mas violacion tuma luga sin ser persigui, den cualkier parti di mundo.

Ta p’esey manifestacionnan global, y hasta aki na Aruba, ta esencial pa protege derechonan democratico y/of humano. Para pa un grupo di hende di cual nan derechonan ta wordo viola (hasta si ta den exterior) ta para pa bo mesun derechonan.

E critica pa manifestacion
 Un argumento frecuentemente treci dilanti ta e disturbionan cu manifestacionnan sa trece na comunidad local. Na Hulanda, manifestacionnan ambiental ta notorio pa blokia careteranan principal den varios parti di e pais, causando strobacion masivo den trafico. Esaki a laga e publico general cu duda of disgusto pa manifestacionnan.

Segun Humane League, manifestacionnan por causa rabia den comunidad y media, pero cu aki, popularidad no ta importa. Organisacionnan bringando pa derechonan humano no tin e meta pa tin fabor di opinion publico, sino ta eynan pa trece cambio. Den Reino Uni, e organisacion investigatorio Social Change Labs a conduci un encuesta di opinion tocante e grupo ambiental Just Stop Oil na 2022. E resultado a mustra cu a pesar cu hende no tabata gusta nan tactico, no tabatin ningun consecuencia negativo significante pa comunidad.

Pues esaki ta subraya cu a pesar cu manifestacionnan por ta inconveniente pa hende, esey so e ta, un inconveniencia. En general, manifestacionnan pacifico manera esun cu a tuma luga diadomingo dilanti parlamento, no tin un impacto negativo riba pueblo.

Aruba tin conexion cu e asunto Palestino?
 Algun usuario riba Facebook a cuestiona si Aruba mester ta envolvi den e movemento global pa Palestina, ya cu nos ta un isla chikito na otro banda di mundo y sin influencia significativo pa asuntonan politico global.

Como contesta riba e pregunta aki, otro usuarionan a yama e situacion na Gaza colonialismo, argumentando cu Aruba tabata victima di esaki den pasado y pues mester por para pa colonisacion no ser normalisa atrobe: “Colonialism didn’t disappear, it just learned to wear a friendlier mask. The same powers that keep islands like ours dependent and voiceless are the ones enabling genocide elsewhere.”

Otronan ta subraya cu e ta un cuestion di empatia y solidaridad pa esnan sufriendo den e franha completamente destrui pa bombardeo: “Yen hende na Aruba ta yama nan mes yiu di Dios pero boso no tin ni empat[ia] pa muchanan inocente cu ta wordo bombardia laga na pida pida. Arubianonan tambe mag di show na sympathie [y] sol[idari]dad cu a Palestin[o]nan.”

Manera a menciona, Bon Dia Aruba a acerca e organisador di e manifestacion diadomingo cu varios pregunta tocante nan meta, nan mensahe y tocante nan perspectiva riba e movemento global pa Palestina. Bon Dia Aruba lo keda pendiente riba nan contesta y lo informa mas tocante esaki den un otro edicion.

Potret di Aruba4Palestine.