(AP)—Simpatisantenan di lider opositor Venezolano María Corina Machado a manifesta diasabra den hopi ciudad rond mundo pa conmemora su Premio Nobel di Paz, un siman prome cu e ceremonia di e prestigioso premio lo tuma luga.
Miles di hende a marcha den Madrid, Utrecht, Buenos Aires, Lima y otro ciudadnan pa duna sosten na Machado, ken su organisacion kier usa e atencion cu e premio ta atraendo pa sigui enfatisa e aspiracion democratico di Venezuela. E organisacion tabata anticipa manifestacionnan den mas cu 80 ciudad rond mundo diasabra.
Na Colombia, un grupo di Venezolanonan a reuni den Bogotá, e capital. Nan a bisti camisa blanco y a carga blaasnan como parti di un ceremonia religioso caminda simpatisantenan a pidi pa e Premio Nobel di Paz “sirbi como un simbolo di speransa” pa e pueblo Venezolano.
Algun di e simpatisantenan a bisa cu intervencion Mericano den Venezuela ta “necesario.”
E manifestacionnan a tuma luga na un momento crucial pa e crisis prolonga den e pais, mientras cu e administracion di presidente Mericano Donald Trump ta ampliando un despliegue militar masivo den Caribe, menasando repetidamente pa ataca e teritorio Venezolano. Presidente di Venezuela Nicolás Maduro ta considera esaki como un intento pa kita su poder, y e oposicion, cual a afirma su promesa pa goberna e pais pronto, ta reforsando e percepcion aki.
“Nos ta biba den un tempo unda nos calmo, nos conviccion y nos organisacion ta ser poni na prueba,” Machado a bisa den un mensahe di video comparti diamars siman pasa riba red social. “Un tempo unda nos pais mester di mas dedicacion pasobra awor tur añanan di lucha, dignidad di pueblo Venezolano, a ser reconoci cu e Premio Nobel di Paz.”
Machado a gana e premio dia 10 di october pa su lucha pa logra un transicion democratico den e nacion Sur Americano, ricibiendo reconocemento como un muhe “cu ta mantene e vlam di democracia briya den un scuridad cu ta crece.”
Machado, 58, a gana e eleccion primario di e oposicion y tabatin intencion pa participa contra Maduro den eleccion presidencial di aña pasa, pero gobierno a prohibi su candidatura. Ex-diplomatico Edmundo González, ken nunca a postula pa un puesto politico den pasado, a tuma su luga.
E periodo prome cu e eleccion di 28 di juli 2024 a mira hopi represion, entre nan descualificacion, detencion y violacionnan di derecho humano. Tur esaki a crece despues cu e Conseho Nacional Electoral, cu ta consisti gran parti di lealistanan di Maduro, a declar’e como ganador a pesar di evidencia creible cu ta bisa lo contrario.
González a busca asilo na Spaña aña pasa despues cu un corte Venezolano a emiti un orden di detencion contra dje.
Mientras tanto, Machado a huy y desde 9 di januari no a mir’e mas den publico, ora cu a deten’e un rato despues di reuni cu simpatisantenan den un manifestacion cu no a mira gran participacion den Caracas, e capital Venezolano. E dia siguiente, Maduro a tuma huramenta pa un tercer termino di seis aña.
