(AP)—Segun un hues federal, e Cas Blanco a viola un orden di corte tocante deportacionnan pa tercer pais, relaciona cu vuelonan bayendo Sudan di Sur, un nacion Africano den caos. E declaracion di e hues a sali poco ora despues cu e administracion di Trump a confirma cu ocho inmigrante condena pa crimen violento a ser deporta, pero sin revela unda nan lo bay. E declaracion di e hues ta un critica fuerte contra e esfuersonan di deportacion di e gobierno.
Durante un audiencia urgente cu e mes a convoca, Hues Brian E. Murphy na Boston a bisa cu e ocho migrante den e avion no a ricibi un oportunidad real pa apela cu e deportacion por pone nan den peligro. Algun rato prome cu e audiencia, oficialnan di e administracion a acusa huesnan “activista” di kier libera criminalnan peligroso.
“E accionnan di e departamento den e caso aki ta sin duda den violacion di e orden di e corte,” Hues Murphy a bisa diaranson, splicando cu e deportadonan no a haya un “oportunidad real” pa apela cu nan ta ser manda pa Sudan di Sur. E grupo a sali for di Merca apenas algun ora despues cu nan a haya notificacion, sin un oportunidad pa tuma contacto cu abogado pa protesta den corte.
Abogadonan di gobierno a argumenta cu e hombernan ya tabatin historia den e sistema migratorio, y cu nan a haya e oportunidad anteriormente pa expresa nan preocupacion pa ser deporta na un pais stranhero. Nan a agrega tambe cu e orden di e hues no a specifica cuanto ora mester pasa entre e notificacion y deportacion, cual ta crea espacio pa mal entendimento.
Gobierno ta yama e deportadonan ‘un berdadero menasa pa seguridad nacional’
Segun Todd Lyons, director interino di ICE (Immigration and Customs Enforcement), e paisnan natal di e migrantenan—Cuba, Laos, Mexico, Myanmar, Vietnam y Sudan di Sur—no kier tuma nan back. Den un conferencia di prensa na Washington, el a bisa cu e migrantenan of bin for di paisnan cu regularmente no ta tuma back nan ciudadanonan deporta, of tin situacionnan special cu ta impedi nan pa ser manda back.
“E grupo aki ta representa e berdadero menasa pa seguridad nacional,” Lyons a bisa, cu un display tras dje cu e potret di e hombernan cu a ser condena pa violacion, homicidio, ladronicia arma y otro crimennan serio.
Oficialnan di e administracion, cual a tene varios disputa cu e corte tocante nan intento pa deporta un gran cantidad di inmigrante, a expresa su descontento claramente diaranson.
Presidente Donald Trump y Secretaria di Seguridad Nacional Kristi Noem “ta trahando tur dia pa kita e criminal violento for di e cayanan di Merca—mientras cu huesnan activista ta na otro banda, bringando pa trece nan back riba teritorio Mericano,” vocero Tricia McLaughlin a bisa. El a mustra e potretnan y a yama nan “e monsternan” cu segun e, hues Murphy ta purba proteha.
Destino final di deportadonan ta secreto
Oficialnan di Seguridad Nacional no a publica hopi detaye tocante e vuelo di deportacion. Nan a bisa cu e avion a sali diaranson cu ocho hende abordo, y cu nan tabatin e migrantenan ainda den custodia. Nan no a revela e destino final di e grupo pa motibo di “seguridad operativo y proteccion.”
E caso ta surgi en medio di un ofensiva duro riba inmigracion di parti e administracion Republicano, cual a priminti pa deporta miyones di hende cu ta biba ilegalmente den Merca. E pleito legal aki ta un otro punto di tension entre e administracion y e corte, cu huicionan cu a frena e politicanan di Trump.
