Cu e gritonan di “revoca”, e sindicatonan Sada, Simar, Seppa, FTA y SPA a reuni ayera mainta na Wilhelmina Park hunto cu un grupo di trahadonan y miembronan pa asina cana bay Bestuurkantoor y entrega un manifiesto na prome minister Evelyn Wever-Croes, ken a ricibi nan hunto cu minister Ursell Arends.

Den e manifiesto firma pa e sindicatonan aki cu a wordo entrega, nan ta informa cu nan “no ta bay carga e “Landsbesluit PrestatieBeoordeling Overheidspersoneel (AB.2022 no 165). Esaki ta wordo reforsa mas ultimo dianan unda cu bao di trahadonan di gobierno ta reina hopi desconfiansa y insiguridad. Ta un berdadero lastima pa nos tuma nota cu Gobierno di Aruba no ta tene na cuenta real cu e preocupacion di sindicatonan y nan miembronan,” e documento ta indica.

Tambe nan a trece dilanti cu trahadonan di gobierno ta exigi “pa respeta trahadonan di gobierno pa cu nan derecho na stabilidad di trabou y entrada; pa un gobierno cu kier papia di respet berdadero no sigui ta impone pa su trahadonan acepta un sistema asina cu nos sa di antemano cu lo perhudica trahadonan; pa gobierno den su rol como dunado di trabou ta sincero y transparente cu sindicato den representacion di su miembronan den temanan manera esaki, esta Prestatiemanagementsysteem cu tin consecuencianan asina pisa pa cu e posicion huridico di e trahadonan y su futuro.”

Nan ta keda insisti pa gobierno revoca e ley aki y tambe nan a pone un deadline na gobierno pa no mas tarda cu dialuna 20 di maart pa 4or di atardi informa sindicatonan cu e ley a wordo revoca, den caso cu gobierno lo tuma e decision ey.

De lo contrario, si nan no ta haya un reaccion cu nan ta considera positivo pa e fecha menciona, “nos ta informa cu nos lo bolbe convoca un accion di protesta pa diamars 21 di maart pa 8or di mainta y asina exigi un contesta”.

Prome minister Evelyn Wever-Croes a ricibi e manifiesto aki y a bisa nan cu nan ta bay tuma den consideracion esaki pa duna sindicatonan un contesta. “E puntonan cu a wordo treci pa dilanti nos a subraya nan: derecho di trahado y stabilidad di trabou, ta cosnan cu pa nos semper tabata un punto di salida, esey mi kier subraya y mi ta sigur cu na mesa nos ta sali afo,” el a indica.

Ademas e ta trece dilanti cu esaki ta un sistema di evaluacion uniforme pa gobierno: “no ta un cos cu a mi ni minister Arends a bin cune, e ta un peticion cu a bin di empleadonan publico mes e cual a critica cu tin departamento ta evalua y tin otro cu no; un ta aplica un sistema y otro ta aplica otro sistema y trahadonan por wordo perhudica. Tambe otro empleadonan a reclama cu tin trahadonan cu tin hasta tres y cinco aña. Pa e hefe haci un proposicion pa nan wordo promovi anto ta tene como contesta, tres aña so bo por bay back, ta cosnan cu empleado publico ta conoce y p’esey mester bin cu un sistema uniforme y husto cu tin tur e garantianan y proteccion di trahadonan hancra den dje,” prome minister a señala.

Igualmente el a referi na sindicato TOPA e cual a haci un presentacion na ministernan di kico ta e ‘dolornan’ na unda prome minister a pidi pa pone riba papel kico ta e puntonan pa cu nan ta dividi, pa gobierno haya sa e posicion di tur dos partido, pa e motibo aki el a pidi na sindicatonan pa sinta na mesa un biaha mas pa papia di kico ta e preocupacionnan cu nan tin.

Di otro banda, sindicato TOPA, e cual a informa cu despues di un reunion cu bloki sindical na tabatin cierto puntonan di diferencia y di opinion cu e otro sindicatonan, nan a informa cu nan dicidi di sinta y dialoga cu nan dunado di trabou cu ta gobierno pa busca un solucion y no uni na e protesta aki.

Alonso Tromp, presidente di e sindicato aki, a sigura mediante un comunicado dirigi na su trahadonan cu tambe a wordo manda pa redactor di Bon Dia Aruba cu “e punto di trek in e LBHAM no ta un punto di diferencia di opinion. Nos ta kere den informa e puntonan cu si nos ta di acuerdo cune pa e ora trek in e LBHAM. Nos sindicato ta kere cu sintando na mesa cu nos dunado di trabou cu gobierno den forma di dialogo manera ILO y PSI ta indica y conseha, y unda nos ta yega na solucion y acuerdonan pa nos miembronan”.

Den presentacion cu TOPA a duna nan palabra pa institui un comision pa revisa e LBHAM y nota. E comision tecnico aki lo traha un conseho y lo entrega esey na gobierno. Tambe lo presenta e resultado di nan investigacion y recomendacion na gobierno y sindicato.

Riba rednan social tabatin diferente comentario como por ehemplo, un carta di un grupo di funcionarionan publico cu ta pro Prestatiemanagement e cual a bisa cu “pa masha tempo nos tabata spera cu lo bin un cambio den e forma di atende cu Ambtenaar y evalua nos trabao. Despues di a scucha esnan di DRH durante nan seccionnan di informacion nos ta full di acuerdo cu e idea pa introduci un ley pa introduci Prestatie Management, cual por trece mas husticia pa trahadonan, principalmente pa esnan cu ta cumpli cabalmente tur dia.”

“Ta hopi ta esnan cu ta cumpli pero tambe tin esnan cu ta bin trabao pero no ta produci nada. Tambe tin esnan cu ta AO tur siman. Hopi di nos ta frustra na trabao y nos ta acudi na nos hefenan pa solucion. Pero pa bisa e berdad, hopi di nan tambe a frustra y no tin animo pa traha riba solucion pa motibo di un cultura di miedo di pone ordo debi na politica.”

Pa finalisa, nan a destaca cu “nos respeta opinion di algun sindicato, pero tambe nan mester respeta esnan cu ta pro “Effectief dienstverlening”. Si wak e asunto realisticamente, Prestatie Management ta na bienestar di tur departamento, trahadonan y bon pa pais Aruba awor y futuro, cual ta Algemeen Belang.”