Sindicatonan a uni y a bisa: “Nos no a yega na ningun tipo di conclusion of acuerdo cu gobierno

Den un conferencia di prensa cu a wordo convoca pa diferente sindicatonan como Simar, Seppa, Spa y Sada nan a trece dilanti nan punto di bista pa loke tin di haber cu declaracionnan cu prome minister Evelyn Wever-Croes a haci diaranson ultimo tocante cortamento di salario pa empleado publico.

Prome minister a bisa cu nan a haci un apelacion na tur empleado publico aña pasa ora pandemia di Covid-19 a cuminsa pa nan entrega 12.6% di salario y asina nan por cubri e placa di Fase cu ta dirigi pa esunnan cu a keda sin trabou pa via di Covid-19 y cu na caminda Hulanda a pone esaki como un condicion pa Aruba por haya sosten di likides.

El a menciona cu aworaki Gobierno ta bezig cu sindicatonan pa mira si nan por cambia e cortamento di salario, na e momentonan aki empleado publico ta entrega tur luna 5% di nan salario y e otro 7.6% ta wordo kita for di vakantie uitkering of di loke nan ta haya na fin di aña.

Gobierno kier aplica un modelo cu Corsou a aplica caba na unda no ta corta 5% di e salario di empleado y esey ta wordo compensa di e vakantie uitkering, loke nan ta haya na fin di aña y ATV dagen, loke ta nifica cu nan ta bay haya mas placa neto den su man.

El a menciona cu nan a cuminsa delibera esaki cu sindicatonan, cu nan ta receptivo cu e idea y e siguiente paso lo ta un reunion tecnico caminda profesionalnan lo presenta e diferente scenarionan pa nan hunto por yega na algo.

Di otro banda, Edward Maduro presidente di sindicato Sada a expresa cu nan no ta di acuerdo cu lo cual a wordo bisa y cu esey a trece hopi confusion bou miembronan di aparato gubernamental den su totalidad.

Di loke ta trata reunionnan fructifero y e apelacion cu a wordo haci aña pasa pa empleado publico pa entrega 12.6% cu prome minister a señala den su declaracion, Maduro a menciona cu nan no ta comparti e parti di ‘reunionnan fructifero’ pa motibo cu ora ta papia di esey ta pasobra nan a yega na un solucion “pero di esaki no ta berdad, nos no a yega na ningun tipo di conclusion of acuerdo”.

Pa loke tin di haber cu apelacion pa empleado publico pa 12.6%, Maduro a bisa cu ora Covid-19 a yega na Aruba nan como sindicato na ningun momento a sinta cu gobierno pa wak cua ta e miho manera pa yega na e parti di solidaridad y cu mas bien gobierno a pusha 12.6% aki pa empleado publico sin puntra of haci un apelacion na nan.

“Mas bien e tabata un decision cla caba unilateral di gobierno, akinan nos ta mira cu minister presidente no tabata sincero ayera ora el a bisa e parti di apelacion”, Maduro a expresa.

Ademas, el a afirma cu ora cu prome minister a informa cu Hulanda a pone esaki como un condicion hopi duro pa corta 12.6% nan a tuma nota cu Secretario di Estado pa Asuntonan den Reino, Raymond Knops, a bisa cu ta Aruba a propone e condicion aki y no Hulanda.

“Nos como trahado gubernamental pero tambe como pueblo merece sa e berdad, kende ta esun cu ta bisando e berdad”, Maduro a bisa.

Maduro tambe a menciona cu nan tabata pidi reunion constantemente cu gobierno pa yega na un solucion pero esey no tabata posibel, 8 di april dianan despues cu gobierno a cay nan como sindicato a manda un otro peticion pa sinta cu e gobierno demisionario aki na unda nan a haya un contesta di prome minister cu pa 13 di april nan tur mester a sinta hunto den un reunion.

Di e declaracion cu prome minister a haci diaranson ultimo, Maduro a enfatisa cu esey a trece hopi pregunta y incertidumbre cerca e miembronan di sindicatonan na unda nan tabata puntra kico ta e berdad, pa lo cual nan a yama un conferencia di prensa pa nan por pone claridad riba mesa.

Asina mes, el a declara cu no tin ningun tipo di afspraak concreto na mesa, lo cual nan ta bin vocifera for di aña pasa nan ta ripiti un biaha mas for di dia 13 di april di 2020 na unda nan a bisa cu nan kier haya participacion y nan kier negocia e parti di cortamento e cual a keda anuncia cu lo keda ‘tot nader order’.

“Esaki no ta algo na unda nos ta bisando cu nos no kier entrega, no, nos kier haci’e discutibel mesun cos cu nos ruman isla di Corsou y Sint Marteen a haci esaki den un nivel di discusion habri y transparente”, el a afirma.

Den dos siman nan lo tin un otro reunion cu gobierno pa asina nan lo haya den detaye y parti tecnico con Corsou a haciel’e.

Asina mes, Josephine Albertus presidente di sindicato di maestro Simar a trece dilanti cu nan tambe como sindicato a tuma nota di loke minister di Labor y Asuntonan Social Glenbert Croes a splica di e programa di ayudo Fase cu lo sigui bao e nomber di TIO, den ora aki nan como sindicato tambe ta haya preguntanan di nan miembro unda nan ta bisa cu loke a wordo splica for di principio ta cu nan ta entrega 12.6% pa yuda cu Fase.

Ora nan a scucha di loke e programa TIO lo ta na unda lo subi e suma pa por yuda e ciudadanonan na Aruba, Albertus ta puntra con esaki lo wordo carga? Si esey tambe ta e parti di 12.6%.

Tambe, el a menciona cu di parti di enseñansa tambe nan a trece dilanti diferente puntonan, cu tin di haber cu problemanan social cu Covid-19 a trece cune, na unda na final muchanan ta esun cu ta wordo afecta mas pa via cu algun di nan no tin awa, coriente of cuminda na nan cas cu ta afecta e mucha na e ora di siña y cu gobierno tabata bezig cu un plan pa utilities pa soluciona esaki.

“Esaki no tabata un reunion cu a wordo yama no solamente pa 12,6%” Albertus a indica.

Tambe, el a expresa cu prome minister a papia di cinco scenario cu nan ta trahando riba dje pero cu ta mucho tecnico y cu segun Albertus el a bisa cu e no kier duna pa sindicatonan informacion cu no ta cuadra, e ora ey Departamento di Recurso Humano lo duna nan informacion detaya y e ora ey nan como sindicato por informa di un miho manera.

Pa finalisa, el a comenta cu nan no tabatin ningun negociacion, ni nan a firma nada, nan a bay na un reunion cu nan a pidi for di basta tempo caba nan unda nan a haya informacion di diferente punto, no solamente riba 12.6%.