Sino e no bira un proyecto PPP: Gobierno lo explora concepto di ‘perpetual’ pa financia KIA nobo

E proyecto di construccion di un centro penitenciario of KIA nobo ta den proceso di exploracion keto bay. Gobierno kier bin cu e proyecto aki na Barcadera, den un area di 90 mil meter cuadra den e zona industrial aki.

E ta e luga primordial pa ehecuta e proyecto aki, segun Minister di Husticia, Andin Bikker.
E mandatario a bisa cu nan a cuminsa cu un proceso di explora e mercado pa wak si tin interes pa e concepto cu nan ta presenta. E ta spera cu den e transcurso di e prome kwartaal di 2020 lo tin mayor claridad riba e realisacion di e proceso cu ta tumando luga y asina duna inicio na e fase pa bay parlamento. Segun e mandatario e ta un proceso cu ta surpasa 5 aña, y ley di contabilidad ta indica cu no mester pasa 5 aña. Si e ta pasa esey, e mester haya un mandato di parlamento.

Den esaki, Bikker a bisa cu den e proyecto aki nan ta respetando e protocol firma cu Hulanda, di un stop riba proyectonan PPP (Private Public Partnership). Pa atende cu asunto financiero di e proyecto aki, gobierno a bin cu diferente concepto of opcion. Un di nan ta pa medio di benta y compra di accion, caminda e cumprado di e accion ta haya dividend pa cierto periodo, y no capital.

Solamente e ta haya capital a menos cu su accion ta wordo cumpra bek. E ta e concepto di ‘perpetual’, cu gobierno tin speransa cu nan por cumpli debidamente cu e parti di interes den cuadro financiero. Esaki pa medio di crea un fondo special pa spaar pa paga bek e suma cu a inverti. Pues e no ta crea obligacion, ‘esun cu ta inverti tin cu warda te ora e situacion drecha’, Bikker a bisa. E ta kere cu e concepto aki di ‘perpetual’ lo por haya interes p’e.

E mester ta un proyecto posiblemente financiabel, ya cu e reto financiero di pais Aruba ta sumamente grandi. Den cuadro di esaki nan mester atende cu e colegio di supervision financiero CAft, cu tin su observacion riba e tipo di proyecto aki, y Hulanda tambe.

E preocupacion di nan ta si e iniciativa di traha un KIA nobo ta pas cu e cuadro financiero cu gobierno a compromete di cumpli cune. Pa atende cu esaki, ya caba e mandatario a tene un reunion cu CAft na final di october ultimo, unda el a duna un splicacion y despues a manda nan por escrito. Casi dos siman pasa, e mandatario a haya un carta caminda CAft tin mas claridad riba e concepto, pero nan kier ta na haltura di su desaroyo.

E mandatario a mira esaki como un luz berde pa sigui cu e procedura. Como shete compania a expresa nan interes pa e realisa e proyecto, y ya gobierno a cuminsa un screening di e companianan aki, cu a keda cla recientemente.