DOW (1).JPG
– DOW ta instalando sistema nobo di irigacion cu segun director Marlon Croes, esaki lo zorg pa spaar awa y placa pa nan por tin mas luga pa ehecuta mas proyecto.
 
Si bo a pasa banda di Cas di Cultura of Wilhemina Park ultimamente, bo por a ripara tankinan grandi color preto cu ta den proceso di wordo instala. E tankinan aki ta un proyecto nobo di DOW cual ta un sistema di irigacion cu ta spaar awa y placa. Segun director di DOW, nos ta drentando un era unda cu presupuesto ta birando preta anto den 2015 a wordo evalua unda cierto gastonan por wordo baha. Sr. Marlon Croes ta bisa: “Nos a bay analisa nos presupuesto anto bin ripara cu nos ta gastando relativamente hopi placa riba irigacion di awa.” Sr. Croes no por a specifica cuanto placa exactamente pero ta bisa cu Aruba ta produci awa di un calidad halto anto esaki no por wordo malgasta.
“Nos a bisa, conchale, pakico nos ta paga awa di WEB cu ta awa hopi caro anto mescos nos tin ‘zuivering’ di awa na cierto calidad cu nos por uza pa iriga nos parkenan. Nos a haci un analisacion na e parkenan anto nos a bisa si nos pone un tanki, nos ta yen’e cu awa dos pa tres biaha pa siman anto iriga for di dje. Esaki lo spaar nos un suma significante di placa,” Sr. Croes ta splica. DOW ta iriga 21 locacion rond di e isla anto a inicia cu e proyecto nobo aki na e prome tres areanan cual ta Dadelstraat, rotonde di Cas di Cultura anto na Wilhemina Park. E intencion ta pa caba di instala nan prome cu 15 di december anto pa ora otro aña habri nan sigui cu e otronan.
 
Masterplan pa coleccion di yobida
E sistemanan aki ta pa e parkenan so anto no ta pa coleccion di awa di yobida. Pa coleccion di awa di yobida, DOW tin un otro pensamento. “Nos ta trahando un masterplan pa Aruba pa nos traha mas dam of amplifica e damnan cu nos tin pa nos colecta e awa. Inicialmente e pensamento tabata ta pa hiba e awa mas lihe cu ta posibel direccion di lama. E ta un awa di hopi bon calidad y nos ta tir’e afo.” Door di bay construi mas dam pa wanta e awa na halto, segun DOW bo ta evita un ‘downstream’ anto bo tin menos inversion pa haci den infrastructura pa hiba e awa lama.