Recientemente Parlamento di Aruba a informa cu un di nan cuentanan di email a keda comprometi y ta ser usa como un strategia di phishing cu ta diseña pa horta informacion sensitivo cu por tin consecuencia serio.
A traves di un publicacion riba nan pagina oficial di Facebook Parlamento di Aruba a informa cu nan a ricibi un notificacion cu e email di phishing aki ta circulando. E organo mas halto di Aruba a pidi tur persona cu ricibi un email sospechoso for di nan pa por fabor no habri esaki.
Caracteristicanan di email di phishing
Si un persona of compania ricibi un email cu e siguiente caracteristanan, ta trata di e email di phishing. E email ta carga como topico: Confidential File Portal sent you ProposalReview_and_Approval for Parlamento di Aruba y e remitente cu ta ser usa ta e email Julie.****@parlamento.aw
E email ta contene un attachment cu tin e mesun nomber cu e topico. Ta pidi pa por fabor no habri e attachment aki ya cu e por contene un virus of un software dañino.
Parlamento ta indica cu si ricibi e email aki, loke mester ta haci ta ignora esaki completamente y elimina e email for di e inbox. Nan ta pidi tambe pa informa e Departamento di IT of tema di seguridad.
Por ultimo Parlamento ta duna algun tip importante cu por yuda evita cu personanan ta cay den e scam aki. Ta importante pa semper paga tino cu email for di remitente no conoci of email cu ta straño y mira si e remitente ta di un fuente legitimo. Nan ta conseha pa usa password fuerte y unico pa tur cuenta y keda alerta.
Parlamento a sigura cu nan ta trahando activamente pa investiga e incidente y restaura seguridad den nan sistema.
Prome Corte y awor Parlamento
Ta poco apenas algun atras cu Corte Comun tambe a informa cu nan sistema di IT a keda afecta pa un virus. Pa motibo di esaki varios audiencia mester a keda posponi. Segun informacion siman pasa nan a detecta e virus, y pa motibonan di seguridad, a pone e computer afecta offline.
Ainda e origen di e virus ta desconoci.
