Poniendo atencion riba e problematica di plastic riba beach, Aruba Reef Care Foundation ta organisa e di 22 version di su proyecto anual, Aruba Reef Care 2016. E ta tuma luga diadomingo 25 di september awor.
Presidente di e fundacion aki, Castro Perez ta laga sa cu e area cu ta produci mas sushi di plastic ta e beachnan dilanti di e hotelnan na Palm Beach y Eagle Beach. Eventualmente e sushedad aki ta yega lama debi na e biento fuerte. Sitionan unda hopi hende ta bay beach pa recreo of unda hende sa pisca for di tera a bira un fuente di sushedad y desperdicio regularmente ainda. Nan lo tin pensa di pone mas enfoke riba e aspecto aki den futuro. Aunke Aruba Reef Care Foundation tin cu bisa cu orguyo cu e cantidad di sushi colecta a baha.
Sr. Castro Perez a bisa cu plastic a bira un peliger latente pa nos medio ambiente marino. Tambe e cabito di sigaria cu sin duda ta contamina y afecta e fauna marino manera e turtuga.
Sosten
Den e meta aki, sr. Perez a gradici sr. Pierre Rafini di RBC Bank cu semper a brinda nan contribucion no solamente financiero sino di nan personal cu ta uni nan mes den e accion di limpiesa aki. Tambe el a gradici e apoyo di ATA, Santa Rosa y otro instancia cu durante mas cu dos decada a bin sostene e proyecto aki.
Tanto ATA como RBC Bank ta considera e proyecto aki crucial pa sigui conscientisa, specialmente nos generacion futuro, riba importancia di conservacion y proteccion di nos medio ambiente. Tambe nan ta participa den e accion di limpiesa aki.
“Nos aporte no solamente ta monetario, pero tambe nos tin un grupo di boluntario tur aña den banco cu tur aña nos ta yama pa bini hunto y yuda e proyecto di Aruba Reef Care”, el a declara.
Sr. Rafini a bisa cu e tipo di accion aki ta un compromiso corporativo di RBC Bank, ya cu nan trahadonan boluntariamente den nan tempo liber y sin ningun compromiso monetario, nan ta forma parti di e actividad aki. Normalmente un grupo di 40 pa 50 trahado di e banco aki ta participa tur aña, pero nan meta ta pa tur nan 180 trahado por contribui cu e accion d limpiesa aki.
Tambe ATA ta biniendo cu aviso pa lama specificamente den e area di Palm Beach pa conscientisa no solamente nos hendenan local, sino nos bishitantenan pa sea consciente riba e uzo di nos beach. Nan a expresa nan satisfaccion cu hasta turistanan ta participa den e accion di limpiesa pa mantene nos beach y bou lama limpi y bunita. ATA ta evaluando cu unabes e ley contra saco di plastic lo drenta na vigor pa nan forma parti di nan promocion cerca nos bishitantenan di afo.
P’esey durante presentacion cu Aruba Reef Care realisa na scol nan a invita pa cada scol adopta un pida di beach of area cu den futuro nan por mantene periodicamente limpi.
a declara cu e proyecto aki ta busca conscientisa nos comunidad en general riba importancia pa cuida y proteccion di nos lama y beachnan. Sr. Perez ta laga sa cu entrante mañan diaranson te diabierna tur hende y grupo interesa pa participa por tuma contacto cu nan na 586-0820/569-5423/740-0797, ya cu ainda nan ta habri pa registracion.
Nan ta haci un apelacion tambe na e operadornan di watersport, pero tambe organisacion ambiental, club social, scoutnan, scolnan y comunidad den general pa participa. E sitionan cu lo bay cubri ta entre otro, E Faro, Arashi, Boca Catalina, Malmok, Hadicurari, area di Bushiri Hotel, area rond di Neptali Henriquez Park pa cas di Gobernador, Surf Side, Mangel Halto, Baby Beach, Santana di Cacho, Grape Field y Boca Grandi.
