Situacion di refineria ta keda delicado y dificil

E situacion pa locual ta e refineria ta keda delicado y dificil. Y asina nos tin cu trat’e tambe cu su cautela”, prome minister Evelyn Wever-Croes (MEP) a expresa ayera, despues di contesta algun pregunta den parlamento relaciona cu status di Citgo, RDA y FMSA.

Prome minister a declara cu apertura di e refineria no ta imposibel ainda anto e posicion di gobierno ta keda cu e plan A den su luga, pues cu e refineria eynan. Gobierno ta considera su mes mara na e contract aki di Citgo y si mester sali afo cu nan no ta mara na e contract, lo bin cu discusion nacional -hunto cu parlamento- riba kico ta bira e futuro di Aruba cu refineria of sin refineria.

Gobierno a haya algun peticion di documentonan cu nan mes no tabata tin. Sra. Wever-Croes: “Gobernacion ta un continuidad y ta straña mi cu un pakete si tabata t’ey y otronan no por ehempel. Referiendo na e quick scan, nos no a haya esaki na Bestuurskantoor ni den e pakete cu a wordo traspasa pa e minister nobo. Ta riba insistencia di buitenlandse zaken nos a haya e quick scan. E ta yena mi cu cierto indignacion cu ora bo drenta gobernacion y bo no tin e documentacion pa bo por goberna. “

Opinion legal
Ayera den parlamento a wordo puntra cua ta e accionnan cu gobierno a tuma den su totalidad, cual ta un pregunta cu a bin for di parlamentario di fraccion di AVP, Robert Candelaria. Gobierno ta bisa cu nan a sinta par di biaha caba cu representantenan di Citgo y ta den proceso ainda di combersacion cu Citgo den preparacion pa reuni cu e presidente di e compania mes. Gobierno awor ta wardando riba un opinion legal pa wak con mara nan ta na e contract anto si por sali lo hinca nos den scenario di un plan B. “Mientras tin contract nos ta sinti mara na dje y no ta mucho relevante kico gobierno kier of no.” A wordo puntra kico ta e siguiente paso awor cu e documentonan a wordo entrega.

Gobierno a haci tur documento di Citgo obtenibel pa tur miembro di parlamento pa nan haya un miho bista. Gobierno ta bisa cu no ta cuestion di cuanto tempo ta duna Citgo pa cumpli cu e contract pasobra den e contract manera el a wordo firma tin fechanan menciona. Pa cada parti di e rehabilitacion mester ta cla of mester haci mas tanto esfuerso posibel pa keda cla cu nan, y cuanto tempo di extension por wordo duna pa Citgo pa cualkier atraso. Y si no cumpli cu terminonan menciona e ora por papia di un ‘Default Situation’. Tanten cu e sancionnan di Merca ta activo, Citgo no por trece e placa y no por duna un tempo tampoco di cuanto lo tarda.

Quickscan
A wordo treci dilanti tambe cu a pesar di puntonan dudoso den e quickscan, toch a keda conseha pa sigui cu e proyecto. Durante un bishita cu tabata tin di minister president anterior Mike Eman y Mike de Meza na Hulanda, lo a topa cu prome minister Rutte, minister Plasterk y minister Koenders. Y prome cu a cuminsa cu negociacionnan pa un MOU y otro acuerdonan di Citgo, a palabra cu e ministerio di asuntonan exterior di Reino lo facilita y financia e experticio di un quickscan riba posibel riesgonan. A bay den consulta cu diferente instancia anto gobierno di Aruba a keda informa cu ministerio di asuntonan exterior di Reino tin un experto disponibel pa haci e quickscan riba termino cortico.
E quickscan lo mester a duna un miho bista riba e posibel riesgonan politico, financiero y huridico.

Tabata tin mas pregunta por ehempel di Alan Howell, parlamentario di fraccion POR, riba ki peso e quickscan aki tabata tin pa gobierno pa dicidi di firma e MOU. E quickscan ta contene un cantidad di punto di riesgo anto identifica esakinan pa duna indicacion si ta prudente of no pa firma e MOU. Pero na final ta yega na e conclusion cu no tabata tin suficiente peso/argumento en contra firma.

“Pa kico no a tuma en cuenta tur e factornan di riesgo na e momento ey, mi no sa. E ta duna mi si impresion cu tabata determina pa firma e contract y cu e quickscan mester a sirbi e proposito”, minister Wever- Croes ta comenta. El a sigui bisa cu tin hopi riesgo den e documento aki cu awor ta birando realidad y cu mester deal cu nan.

Conseho na gobierno
Den e quickscan tin un conseho duna na gobierno pa institui algun comision tecnico/financiero.

Si esaki wordo haci e pregunta ta bira ken ta forma parti di nan y si nan tin experiencia den e materia aki. Sra. Wever-Croes: “Mi por bisa cu te asina leu cu nos sa, ningun di e comisionnan aki a wordo institui. Si nan a wordo instala mes durante e periodo di e gobierno anterior, nos no ta na altura di esaki. Nos no a haya documentacion tampoco al respecto.” Tin un caminda cu gobierno no a caba di busca cual ta na e server na edificio di Cocolishi, pero esaki a wordo totalmente elimina y no por a haya nada eynan tampoco.

Interes grandi pa tuma over refineria
Un otro pregunta lansa por medio di parlamentario Mike de Meza (AVP) tabata si gobierno tin contacto cu otro inversionistanan.

Premier ta bisa cu practicamente tur siman of tur dia tin hende ta yega Bestuurskantoor pa meld cu un solucion pa e refineria y nan por tum’e over. Pero gobierno no por bay den dialogo cu nan pasobra nan tin un contract cu Citgo y no kier ‘perhudica e relacion eynan innecesariamente’. Na e momentonan aki gobierno no tin contacto cu otro inversionista y ta want’e prudentemente pafo di e porta pero si aparentemente tin un interes grandi. Cu ta interesnan realistico gobierno lo tin cu wak segun minister Wever-Croes, pero nan no ta den e fase ey ainda. Otro punto cu a bin dilanti tabata si tin intencion pa entrega e tereno na otro compania priva cual segun premier esey no ta e caso.

Un MOU cu a wordo firma ta mas bien pa mira si banda di e refineria por desaroya cierto otro actividadnan naturalmente pa no perhudica un cu e otro. Pero tin basta tereno rond e refineria cu no ta y no lo wordo uza tampoco, lo ta lastima si bo no probecha di esaki segun gobierno.

You May Also Like

combustibel

Gasoline 14.2 cen mas barata

Awe 14 di october e prijsnan di combustibel a baha. Pa un liter di ...

Votacion pa eligi presidente nobo di Colombia a cuminsa

For di awe y durante e siguiente 6 dianan, alrededor di 5 mil Colombiano ...

DSC_4510.JPG

Homber a maltrata anciano seriamente na San Nicolas

Diahuebs marduga pariba di Centro Medico na Pastoor Hendrikstraat na un cas a sucede ...

Kooyman

“Blokeo di entrada di Kooyman ta inacceptabel y a tuma pasonan lega”

Diaberna 10or di mainta a continua cu negociacion di CAO entre Kooyman y sindicato ...

accident fatal na Hooiberg

Accident fatal, un grave y otro cu cabay

Di diabierna pa diasabra 3 accident a hala atencion. Prome un cabey a los, ...