Situacion na Venezuela… Y kico awor?

Esnan mas optimista entre e poblacion Venezolano, y den e paisnan bisiña, tambe cerca nos, lo a keda decepciona despues di e sucesonan di diasabra pasa, unda no a logra drenta cu e ayudo humanitario den teritorio Venezolano. Ademas e manera cu e regimen di Nicolas Maduro a haya ta bon pa ataca e manifestantenan ta solamente duna muestra pakico e no por keda na mando den e pais ey. En todo caso, loke a pasa tabata algo di sorpresa, o nos por tabata sa di antemano cu esaki lo a bay tuma lugar?

Cu un tiki conocemento di historia mundial, nos por sa cu un regimen cruel di e caliber aki, no ta cay den otro pasobra na frontera tin poco hende ta acompaña algun truck cu mercancia. Cu nan no por a drenta no tabata di spera, pero si di anticipa. E pregunta cu ta surgi ta si e opositornan a bira demasiado optimista di tanto apoyo internacional cu nan a haya, o tin algo mas tras di esaki. Nos ta kere e ultimo aki. Un gran parti di e apoyo cu e oposicion Venezolano ta haya, ta di pais cu no ta pro violencia, tanto na Europa como na America Latino, y hasta por laga nan apoyo cay si nan ripara cu oposicion, despues di tanto aña di lucha no violento cu e poco arma legal cu nan a keda cune, lo a converti di nochi pa mainta den un movimento politico cu ta recuri na uso di violencia. Esey aunke cu talvez no ta keda otro opcion, sigur no den e situacion actual. Ta logico anto cu, pa cuanto tempo cu e costa y cuanto sufrimento ta e consecuencia, mester tuma tempo pa e conscientisacion tuma lugar cu no tin otro alternativa cu forma un contrapeso militar di suficiente forsa cu por interveni den e pais.

Esey ta implica cu mester dal un par di paso atras y reagrupa pa un miho posicion. Oposicion mester sigui cu e lucha sin cu necesariamente nan ta logra drenta cu e ayudo. E sucesonan a proba cu esey lo ta posible solamente cu un dramamento di sanger mayor y ta di respeta cu nan no ta bay haci esey. Lo tuma tempo pa yega na consenso entre no tur, pero un cantidad suficiente di pais den e region cu ta apoya un intervencion na Venezuela. Y tanten cu esey no yega asina leu e situacion na e pais lo no mehora tampoco, pasobra e regimen no tin e medionan pa drecha nada. Den e sentido aki tempo no ta na fabor di Maduro pasobra cada dia cu pasa e situacion ta birando mas caotico, mientras cu e regimen no tin e medionan ni e strategia pa cambia algo den e maneho economico di e pais. Y den esaki e sancionnan di Merca tin un efecto grandi. E medidanan tuma ta corta acceso na placa di e regimen severamente, pero esey ta solamente e efecto primario. E falta di placa ta resona despues den tur tereno.

Pa cuminsa e problemanan financiero y e sancionnan ta limita e acceso na recurso pa mehora e produccion petrolero cu ta primordial pa sobrevivencia di e pais. Esaki tin un efecto multiple, manera e falta di divisa pa importa tur loke e pais mester, incluyendo e cuminda y medicamento cu tanto enfasis ta haya den medionan. Pero esey no ta e unico cos cu falta, ta tur cos falta. Transporte priva y publico ta birando dia tras dia mas un problema, pasobra banda di escasez di gasolin y diesel tampoco tin tire, azeta y pieza pa vehiculo. Industria Venezolano, banda di esun petrolero, a casi stop di existi. Agricultura y e sector pecuario ta na talvez un tercio di loke e tabata un par di aña pasa, cu consecuencia cu esey tambe lo mester importa, pa por mantene un nivel adecua di nutricion pa henter e poblacion, loke obviamente no ta e caso.

Den e scenario di decadencia aki nada no a cambia. Venezuela, aña pasa a acumula un hiperinflacion di un miyon porciento y e aña aki ta rumbo pa 10 biaha esey, cu e consecuencia cu gran parti di e poblacion no por alimenta nan mes pasobra nan no por cumpra nada. Hasta e Rusonan cu a pasa den nan propio experiencia di e fracaso di e modelo economico socialista sa cu Maduro y su pandiya no por saca e pais di e abismo den cual nan mes a mand’e. Sin embargo, tempo no ta amigo di oposicion tampoco. Nan a lanta hopi expectativa cerca hopi hende, y por a ripara e decepcion riba internet di hende cu ta bisa cu oposicion ta mescos Maduro, ‘puro bla bla.’ Pa nan tambe prolongacion di e actual situacion no ta faborable, pero loke ta bay sucede proximamente ta depende grandemente di tres pais: Merca, Colombia, y Brasil. Merca pa motibonan obvio, manteniendo Guaido unda cu e ta cu nan menasa di caba cu e regimen si nan mishi cune. Brasil y Colombia como e bisiñanan mas afecta directamente, cu no ta bay soporta e situacion aki eternamente. Y nos, como bisiña? Nos lo mester tene cuenta cu un frontera cera pa basta tempo.

LJMADURO – 25-FEB-2019

 

You May Also Like

Venezuela ta keda pidi atencion cu refugiado y Citgo

Venezuela ta keda number un den atencion regional y mundial, y pa nos tambe. ...

Kita bachi y lora manga

Y esey ta bay yuda? No cabe duda cu un mayoria di e gabinete ...

Perspectiva relaciona cu petroleo… Bon noticia ta scars

E siman aki nos bisiñanan na banda pazuid ta keda den noticia. Y noticia ...

Caft ta desenmascara maneho di Avp

Manera ley ta prescribi, colegio di supervision financiero CAft a haya e rapport financiero ...

Diferencia entre Hulanda y Aruba?

Tabatin un trafico intensivo entre Hulanda y Aruba den e dianan aki. Prome secretario ...

editorial

Con ta para cu nos infraestructura? Cuanto caminda falta pa drecha

Den propaganda gubernamental semper ta papia solamente di e proyectonan grandi cu ta na ...