Despues di e sucesonan agresivo di inicio di januari na Venezuela, ta parce cu tin un situacion mas tranquil awor. Gobierno di Venezuela ta colaborando cu gobierno di presidente Trump, den un forma peculiar di ‘co-gobierno’ Mericano mientras e regimen Chavista ta sigui goberna. Esaki di biaha ta un desilusion grandi pa tur esnan na e pais y den exterior, cu a kere cu gobierno di Trump lo a pone como prioridad un regreso na un regimen democratico. Aki por conclui cu esey tabata demasiado speranza pa un gobierno Mericano, cu ta mustra mas y mas cu nan tambe tin tendencia di move den un direccion autocratico, cu talvez no lo mustra tanto diferencia cu e regimen Chavista. Di ambos banda e gobiernonan a declara cu eleccion lo ta algo cu por tuma lugar ora cu e situacion tranquiliza mas. Esey ta parce un punto di vista straño, pasobra no ta existi un situacion di emergencia, pasobra di tur manera loke a keda di oposicion den e pais no ta capaz di reta e regimen. A introduci un propuesta di ley di amnistia y mientras tanto a libera un cierto cantidad di preso politico, como ‘muestra di bon voluntad’.

Sin embargo, represion politico no a termina y prueba di esaki tabata e detencion di un lider politico recientemente, riba mesun dia di su liberacion. Esaki ta e tipo di accion cu por spera di un regimen cu kier mustra cu nan keto bay ta e dirigentenan indiscutible di e pais, a pesar di nan concesionnan na e vgilancia cu gobierno Mericano a impone riba nan. Gobierno di Trump ta primeramente interesa den e recursonan natural di e pais, especialmente petroleo. Esey a resulta den e reforma di e ley encuanto hidrocarburo, cu a keda aproba recientemente. E cambio principal tabata e posibilidadnobo di empresa priva di tin propiedad den e sector aki, algo cu tabata imposible pa varios decada despues di e nacionalizacion di tur activo den e sector. E reforma di ley, aproba recientemente, ta contene tambe e reconocimento di arbitrahe na nivel internacional. Esaki tin relacion cu e casonan hiba den corte na Merca pa ConocoPhillips, cu a conduci na compensacion den forma di perdida di e grupo di empresa Citgo, cu tabata propiedad di Pdvsa. E acuerdo ta parce un solucion negocia, ya cu ambos banda normalmente no gusta arbitrahe internacional. En todo caso, esaki ta duna empresa di exterior cu ta opera na Venezuela mas seguridad legal. Por mira e reforma como un concesion grandi di Chavismo, cu a opta pa habri porta pa capital Mericano den e sector aki, algo logico tambe den sentido di acceso na tecnologia. Den ultimo dos decada e industria completo a sufri un deterioro grandi, pasobra hunto cu e empresanan petrolero grandi tambe e empresanan cu ta domina e tecnologia mas avanza den e sector, manera Haliburton, tambe a termina nan presencia na Venezuela. Esaki a contribui enormemente na deterioro di e infrastructura petrolero, incluyendo e refinerianan di e pais.

E pregunta clave cu a keda ta: con rapido por spera un reactivacion di industria petrolero y kico esaki lo encera den sentido di aumento di produccion di crudo? Varios experto ta anticipa un aumento pronto, di actualmente 1 miyon bari pa dia(bpd), te 1,3 miyon bpd. Yega atrobe na 2 o 3 miyon bpd manera den pasado, lo ta a largo plazo, despues di inversion di cerca di 100 biyon dollar.

Perspectiva pa Aruba?

Nos a tuma nota di e intentonan local pa reactiva e almacenahe di petroleo na nos isla, loke en berdad por ta un actividad cu perspectiva, pero unda tin mas pregunta cu contesta te awor. Pa cuminza, henter Aruba lo tin gana di sa den ki estado e tankinan na Zeewijk ta. Gobierno ta bay, otro gobierno ta bin, pero nunca tin claridad den ki estado e supuesto ‘patrimonio nacional’ aki ta. Un posible negoshi di almacena crudo ta depende grandemente di e capacidad na Venezuela mes pa maneha e crudo saliente. Aki ta importante analiza unda e crudo ta bay. Manera e perspectiva ta awor, gran parti di e crudo lo bay costa di Golfo Mericano, unda e refinerianan di entre otro Citgo y Valero tabata maneha e crudo Venezolano caba. Esaki por continua si e produccion aumenta, ya cu Merca lo ta tene cuenta cu menos suministro di crudo pisa di e otro proveedor grandi, cu ta Canada. Y hustamente den e dianan aki ta surgi un confrontacion economico fuerte entre Merca y Canada, cu por tin consecuencia tambe pa suministro di crudo Canades. Di e desaroyo aki un eventual deposito di crudo na Aruba por depende, ademas cu lo mester contempla un perspectiva a largo plazo, pa por hustifica e inversion necesario den e tankinan y e pier, cu tambe ta exigi mantencion. Resumiendo, na e momento aki ta parce nos dificil pa mira un ‘business case’ di suficiente claridad pa hustifica e inversion. Ademas, mester tene na cuenta cu gobierno Mericano ta rifando su suerte cu petroleo, pero otronan, manera China, India, Union Europeo y hopi otro, ta desaroyando den direccion di menos petroleoy mas energia renovable. Cu un produccion mundial di petroleo, actualmente na 86 miyon bpd, proyecta pa 94 miyon bpd na 2050, mas capacidad di almacenaheta keda un pregunta.Di tur manera, nos ta mira hopi factor desconoci ainda, impidiendo un perspectiva cla pa e actividad economico señala. Mientras ta warda esey yega, gobierno por cuminza cu duna mas claridad riba estado di e instalacionnan, pa nos por sa kico ta realistico of no.