SKOA a honra 300 peticion di areglo di pago; Cantidad di mucha sin un status legal defini a bira mas grandi

Director di SKOA, Anuesca Baly a laga sa cu nan ta mira e importancia pa tur mucha tin enseñansa. Esaki ta un parti cu SKOA ta pone enfasis riba dje, pa e alumnonan por wordo inscribi pa medio di nan mayornan.

Pa loke ta SKOA, tur mayor ta liber pa inscribi nan yiu cerca nan. Baly a haci e aclaracion cu logicamente esaki ta un tarea di e mayornan, ya cu nan no sa unda e muchanan ta, y naturalmente nan tin cu bini pa registra nan.

Den pasado nan tabatin muchanan di tur credo y denominacion. Pero tambe den e aña escolar aki (2019-2020), ta e prome aña cu nan tin un grupo bastante grandi di muchanan cu ta den nan scolnan sin un status legal defini, pa diferente motibonan. El a splica cu entre nan tin muchanan indocumenta cu a bin for di Venezuela, considerando e situacion interno cu e pais aki ta pasando aden. Ta muchanan cu di parti di SKOA no ta nenga e posibilidad di inscribi y SKOA a tuma nan y nan tin den nan scolnan. Den e caso aki, SKOA a habri dos klas PRISMA.

Igualmente riba e parti di inscripcion pa e muchanan por haya enseñansa, Baly a laga sa cu esaki ta un deber y obligacion di cada mayor pa cumpli cu e parti ey pa cu su yiu, ya cu esaki ta parti di nan responsabilidad. Si un mayor no ta zorg pa su yiu bay scol, tambe ta un parti di negligencia. “Si un mayor no ta zorg pa e alumno por tin tur su cosnan cu e mester pa bay scol, tambe ta un parti di negligencia,” el a bisa.

Hopi biaha e discusion cu por surgi rond di e asunto aki tin di haci cu e pago di scol, cu no solamente ta cobra na SKOA, sino tambe na otro scolnan, ya sea protestant of di gobierno. Na SKOA ta un suma di 175 florin pa aña. Y pa scol cu tin airco e ta bira un tiki mas, ya cu SKOA no ta haya subsidio pa cubri e gasto aki. Pa esaki, SKOA ta cobra 150 florin pa aña y total e ta bira 325 fls.

Den caso cu un mayor no tin e condicion pa pag’e, nan por yega na un areglo di pago. Un mayor por haci esey, y libremente SKOA ta facilita e proceso aki, pero e mayor mester ta responsabel y cumpli cu e compromiso cu el a adkiri.

E aña escolar cu a caba di habri, SKOA tin ariba 300 hende cu a haci un peticion pa areglo, y nan a honra nan peticion di areglo. Por ehempel, si aña escolar ta 10 luna, e mayor tin cu paga 17,50 florin pa luna.