Diaranson atardi SKOA a tene un reunion cu tur nan trahadonan di limpieza ‘werkster’ di scolnan, pa duna informacion ariba e situacion cu SKOA ta enfrentando pa locual ta trata e fondonan cu mester pa por paga e werksternan.

Desde januari 2020 SKOA ta bezig cu e caso aki, caminda directora di SKOA, señora Anuesca Baly ta informa cu placa no ta yega pa paga e werksternan di SKOA. “For di 2020 te cu aworaki, un aña y mey literalmente, nos ta bezig cu e caso akinan. Y pa saca e werksternan for di incertidumbre nos a organisa awe un atardi pa duna tur e informacion cu nos tin pa cu nan”, señora Baly a bisa. “Nos a sinta cu tur e gremionan, nos a sinta cu belastingkantoor, nos a sinta cu Minister President, nos a sinta cu minister di Finanzas, nos a sinta cu minister Lampe tambe, nos a sinta cu mediador y aworaki tin un propuesta riba mesa. E propuesta eynan nos no a haya un contesta ariba dje, pero manera tur hende sa nos tin cu tuma medidanan, nos tin cu tuma accion pa wak nos wak e ora ey con nos ta sigui, pasobra nos no por sigui asina”.

SKOA ta ricibi for di Aruba 970 mil florin cu mester cubri pago di casi 90 werkster y e suma aki no ta yega pa paga e werksternan ni sikiera minimumloon pa luna, locual señora Baly ta bisa no ta husto. “Nos tin casi 90 werkster aworaki, nos tin 46 scol, y si nos haci un calculacion di 970 mil dividi na tur e werksternan pa luna, cuanto esey lo sali? Nos sa cu nan no lo bay yega ni na e salario minimo pa luna, y nan merece di haya un salario mesun cos cu e otro werksternan di e otro instancianan di gobierno”, e la bisa.

Señora Baly ta sigura cu si e decision ariba e propuesta riba mesa di parti di mediador no wordo acepta pa minister di enseñansa, SKOA lo mester tuma un decision drastico pa siguiente aña escolar. “Si e decision no ta faborece e werksternan, anto e ora ey nos lo tin cu tuma un decision pa locual ta nos werksternan den SKOA inmediatamente. Y e ora ey pa aña escolar nobo, sea scolnan ta keda cera of lo mester bay corta, pasobra bo ta haya e tanto placa como subsidio, anto e placa ey lo mester bay yega. Esey ta un manera, of lo mester subi schoolgeld pa tur mucha. Y esey nos a trece dilanti awe y nos tur ta di acuerdo cu esey no ta un posibilidad cu ta den nos vision aworaki”, señora Baly a bisa. “Si nos bay cont’e pa mantene cada un di e werksternan, mi a haci e conteo un par di siman atras, e ta sali aproximadamente pa aña pa cada alumno cu ta bay un scol di SKOA – pa keda cu e werksternan pa nan haya nan salario manera debe ser – e ta bira casi 600 florin pa cada alumno”.

Desde januari di e aña aki SKOA conhuntamente cu e mediador, SEPPA, departamento di Labor y un representante di minister di Enseñansa ta den discusion pa por yega na un punto caminda tur persona envolvi por sali exitoso di e situacion actual. Señora Baly ta spera cu e decision tuma por ta uno concreto, despues cu e mediador a entrega e propuesta na Conseho di Minister, cu no lo bay stroba enseñansa. “Esey ta nos meta, nos no kier stroba enseñansa di Aruba pasobra enseñansa ta e pilar y un scol mester ta algo normal”, e la bisa.

 

LEAVE A REPLY

Please enter your comment!
Please enter your name here