SKOA ta den full preparacion pa su congreso grandi cu lo tuma luga dia 29 di october proximo. E dia ey lo tin e Congreso Nacional di Enseñansa di e fundacion aki, cu ta atende cu e scolnan Catolico na Aruba, y e lo tuma luga na Renaissance Confence Center.
Directora di SKOA, Anuesca Baly a relata na Bon Dia Aruba cu nan congreso di anual di enseñansa ta dedica na nan maestronan. Aunke dia 29 di october lo tin e congreso grandi, pero full e siman di fin di october nan lo organisa diferente tayer y clasenan cu e docentenan ta desea di bay.
E congreso aki ta pa tur empleado di SKOA ta gratis ya cu –segun Baly– e ta un forma pa actualisa nan mes. “Di parti di SKOA esaki ta un parti cu nos ta hinca bek den nos maestronan y nos personal,” el a declara. Nan a yega di organisa e congreso aki aña pasa, cu a resulta di ta un exito rotundo.
Actualmente, SKOA tin un poblacion di alrededor di 10 mil studiante cu un cuerpo di 630 docente, y hunto cu demas trahado, nan tin casi 900 persona den servicio di SKOA.
SKOA tin e maneho administrativo di 15 scol preparatorio, 26 scol basico caminda un di nan ta scol special cu ta Scol Caquetio, 5 scol di MAVO, locual ta un presencia notabel riba tereno di enseñansa den nos comunidad. Kier men, un 85% di scolnan na Aruba ta den man di SKOA.
