(BBC) – Cuater housekeeper anonimo ta demandando e leyenda di Motown, Smokey Robinson pa 50 miyon dollar, acusando e di agresion sexual.

Un keho entrega na corte superior di Los Angeles ta acusa e homber di 85 aña di maltrato sexual, encarcelacion falso, negligencia y violencia di genero, ademas di un cantidad di violacion laboral relaciona cu salario, break, ora di come y pago di overtime.

E demanda tambe ta nombra e casa di Robinson, Frances Robinson, acusando cu el a contribui na un ambiente di trabao hostil, y a usa “palabranan y idioma etnicamente ofensivo”.

Representantenan di e famia Robinson no a responde mesora na peticionnan pa comentario, y e acusacionnan no por a ser verifica independientemente.

Robinson tabata e prome ‘hitmaker’ di Motown, skirbiendo exitonan number 1 manera My Guy di Mary Wells y My Girl di Temptations.

William Robinson Jr naci na Michigan, tabata tanto un buscador di talento pa e compania di disco como un di su artistanan di grabacion mas prominente, conoci pa cancionnan manera Tracks of My Tears, Shop Around y Tears of a Clown.

E tin lugar den tanto e Rock and Roll Hall of Fame, como e Hall of Fame di Compositornan, y ta asumi di tin credito riba mas cu 4.000 cancion.

Robinson su reputacion y estatura tabata un factor intimidante pa su acusadornan, cu a ser haci sinti “impotente”, nan abogado a bisa den un conferencia di prensa na Los Angeles. “Nan ta hende muher Hispano cu tabata emplea pa e pareha Robinson, ganando menos cu e salario minimo,” John Harris a bisa.

“Como hende muher di salario abao den posicionnan vulnerabel, nan tabata falta e recursonan y opcionnan necesario pa proteha nan mes di asaltonan sexual.”

E muhernan ta demandando bao di e nomber di Jane Doe 1, 2, 3 y 4, debi na e acusacionnan di mal conducta sexual, incluyendo violacion, cu ta ser lanta contra musico.

Tres tabata housekeeper y uno tabata assistent personal di e cantante, chef y peluquero, segun documentonan di Corte. Den e demanda, tur cuater hende muher ta acusa cu Robinson lo a yama nan na varios area di su propiedad na Chatsworth, Bell Canyon y Las Vegas, na momentonan cu su casa tabata afor. Tin biaha saliendo sunu for di baño, el a forsa nan pa tene varios tipo di relacion sexual durante un cantidad di aña, cuminsando na 2006, e demanda ta acusa.

Jane Does 1, 3 y 4 tur ta acusa cu Robinson a agredi nan sexualmente den e “camber blauw” di su residencia di Chatsworth, acusando cu e lo a pone un serbete pa proteha e laken di cama prome cu e agresion a tuma luga.

E acusacionnan di Jane Doe 2 ta bisa cu Robinson a viol’e den e camber di laba paña y garashi di su residencia di Chatsworth, caminda camaranan di circuito cera no por a mira.

E muhernan ta bisa cu durante e supuesto asaltonan, Robinson a uza bareranan fisico y menasa di forsa pa evita cu nan lo huy. E demanda ta inclui tambe varios acusacion di violacion na pia di trabao.

Tur cuater hende muher ta bisa cu nan a traha 10 ora pa dia, seis dia pa siman sin cu nan a ricibi salario minimo of overtime. Tambe nan ta declara di a traha dianan di fiesta sin haya un tarifa di vakantie.

Di acuerdo cu nan demanda, e empleadonan tur a bandona pa motibo di e supuesto mal conducta sexual y ambiente hostil di trabao.

No a presenta ningun denuncia policial ni acusacion penal contra di e musico.

Un vocero di Fiscal di Districto di Los Angeles a bisa cu e demandanan di e muhernan no tabata bao di revision pasobra e autoridadnan di ley no a presenta un caso.

Polis di Los Angeles a bisa cu nan no tin ningun declaracion riba e asunto aki.