Como un asociacion cu ta percura pa bin cu actividadnan comercial pariba di brug, y muy specialmente na San Nicolas, pero tambe salvaguardia e interes di e sector comercial pariba brug, Presidente di San Nicolas Business Association (SNBA), Andres Hernandez, ta mira ultimo tempo un desaroyo positivo.

Hernandez a laga sa como un primicia cu mañan diamars lo tin e prome Conseho di Minister finalmente na San Nicolas. E Conseho di Minister mayoria di su agenda ta bay ta dirigi na e prome 6 proyectonan cu ta mas avansa, y cu gobierno ta poniendo su mes mas disponibel pa nan por bira un realidad pronto. Esaki apart di e hotel cu ta biniendo na Sero Colorado.

Hernandez a sigura cu tin hopi proyecto, pero di nan tin 5 cu nan lo wordo enfoca riba nan. SNBA lo conseha gobierno pa bin cu un siguiente Conseho di Minister otro luna pariba di brug tambe. E ta spera cu tur cos lo sali bon mañan pariba di brug, cu nan tur keda emociona pa nan por sigui cu e siguiente otro luna.

Proyectonan.
SNBA tabata presente den e acto di entrega di e kiosconan comercial cu a wordo construi riba tereno di Aruba Carnival & Entertainment Village. Hernandez a declara na Bon Dia Aruba cu nan ta contento cu e proyecto aki, y tambe gradici na gobierno y tur envolvi, pasobra nan por mira cu e proyecto aki no a keda na mita. E ta considera esaki como un paso pa tur loke ta bini. Pero ainda e ta un paso chikito pa loke nan wardando pa final di aña y e proximo aña.

“E proyecto ta den su fase final y e prome kiosco a wordo entrega na un persona di pariba di brug,” el a bisa. Un aspecto famoso di pariba di brug ta su cuminda, y presidente di SNBA ta considera ideal y sugeri si nan por huur e mayoria di e kiosconan aki cu hendenan nativo di San Nicolas y bisindario, pa nan bende nan propio cuminda tipico.

Hernandez a premira cu 2019 y 2020 lo ta e aña di San Nicolas. Despues cu nan a organisa e cumbre cu gobierno y otro partnernan, nan por visualisa cu no oficialmente dia 6 di november nan ta bay tin un informacion pa comunidad, caminda nan ta bay duna finalmente un rapport y audiovisual di kico a sosode dia cu nan a tene nan cumbre.

El a bisa cu di e cumbre a sali 28 proyecto. SNBA lo keda satisfecho sikiera cu nan por lo concretisa a lo menos tres proyecto cu por cuminsa cu un bon base. Pero Hernandez por garantisa cu di e 28 proyectonan, un 90% di nan lo ta un realidad.