Recientemente presidente di San Nicolas Business Association (SNBA) Errol de Freitas hunto cu vice presidente, Joseph Brooks, a entrega na Bureau Interne Dienst (BID) nan vision pa 2025 y e futuro di San Nicolas y pariba. Alabes, de Freitas a haci un yamado Gobierno di Aruba pa un reunion pronto pa asina discuti nan plannan pa San Nicolas.

De Freitas a splica cu e motibo pakico nan a entrega nan vision na BID ta cu nan tabata purba haya afspraak cu Conseho di Minister pa entrega e documento eynan, pero ultimamente gobierno ta hopi druk y no a logra.

“Nos ta spera, cu na final di esaki cu nan lo invita nos pa un combersacion pa touch base un rato pasobra idea tras di esaki ta pa pidi gobierno pa organisa un Conseho di Minister pariba na San Nicolas pa nos por ta mas cerca y mira e situacion di mas cerca, y tambe cu e inversionistanan cu nos tin cu ta interesa pa bin inverti of cu ta invertiendo y cumprando edificionan. Nan ta en espera di locual ta bay pasa,” el a remarca.

El a indica cu hopi di e inversionistanan aki cu ya a duna confiansa y a cumpra edificio etc. kier mira participacion di gobierno. Alabes el a splica cu e inversionistanan aki ta en espera di un infrastructura regla y permisologia, entre otro, cu ta aspectonan importante.

De Freitas a trece dilanti cu den luna di november prome cu eleccion SNBA a organisa un forum y den e forum aki tur partido tabata enfoca riba desaroyo di San Nicolas. Despues cu eleccion a pasa durante e proceso di formacion e asociacion a entrega un propuesta di e documento na e formadornan.

E documento ta contene e vision y plannan pa San Nicolas, for di Balashi te na Punta Basora. E ta consisti 104 pagina, 31 punto y ta concentra den tres area mas extra sugerencianan.

De Freitas a enfatisa cu SNBA ta trahando hunto cu diferente organisacion y stakeholder, a tene reunion cu nan miembronan, a organisa reunionnan pa pueblo por yega y haci nan pregunta riba tur e proyectonan cu nan ta haciendo.

El a splica cu den e prome fase di na proyectonan nan kier mehora e caya principal di San Nicolas. Un di e desafionan pa cu esaki, el a menciona, ta con ta bay prepara e caya grandi pa e por haya un embeyecemento total manera mester ta. El a subraya cu pa e motibo ey pa e asociacion ta hopi importante pa gobierno tuma nan sugerencianan cu ta hopi bon hinca den otro y pa nan haya oido cerca gobierno.

“Nos ta dunando gobierno tur e hermentnan aki pa asina nos hunto cu nan por tin inclusion di tur locual ta bay pasa y locual ta pasando na San Nicolas,” el a remarca.

De Freitas a splica cu desde cu refineria a cera districto di San Nicolas a pasa den momentonan hopi dificil y si mira rond di e isla, e ta e distrito di e isla cu mester di mas ayudo actualmente. “Ta importante pa tin un union cu gobierno pa nan por tin vision di loke nos ta haciendo y mira kico ta e low hanging fruit,” el a agrega.

El a sigui splica cu hopi di locual nan kier haci no ta ni rekeri presupuesto, y alabes a enfatisa cu inversionistanan, e e organisacion no ta bin pa pidi gobierno placa, pero kier mas bien duna gobierno proyectonan cu nan por usa y cu lo ta na beneficio di un y tur.

De Freitas a indica cu nan enfoke ta riba caya principal, Carnival Village, beachnan den Colony, Seroe Colorado y refineria. El a sigura cu e vision ta principalmente enfoca riba e pueblo pero e bishitantenan tambe.

“San Nicolas ta e ultimo frontera, nos kier mantene nos herencia y cultura cu ta uni nos pueblo. Semper nos a bisa turistanan no ta bin hopi biaha pa nos perfeccion, nan ta bin pa nos imperfeccion, pero si bo mira e desaroyo na Noord y Palm Beach, un desaroyo masha bunita, pero bo ta mira cu hopi di e bishitantenan kier mira e otro parti di Aruba y eynan nos mester zorg pa nos por tene esaki mas simpel posibel caminda nan por sinti nos musica, cu nan por purba nos cuminda, cu nan por warda nos cultura y disfruta,” el a subraya.

Pa loke ta e prome fase di SNBA su vision pa caya grandi di San Nicolas, de Freitas a splica cu e unico cos cu nan mester ta luz, verf y mata. El a sigui splica cu na Baby Beach y Rodgers Beach ta yega un punto cu mester haci limpiesa di e beachnan, pero tambe e area di santana di cacho.

El a indica cu e hotel Secrets na Seroe Colorado, contrario na otro caminda cu Secrets tin hotel, na Aruba ta safe locual kiermen cu hendenan lo sali, pero ora nan sali nan topa cu un santana di cacho cu no ta un bista bunita.

De Freitas a splica cu nan a yega di trece esaki dilanti caba, y a papia cu DVG y a purba papia cu e departamento di medio ambiente, pero te aworaki nada no a pasa.

El a enfatisa cu e vision di SNBA tin varios fase, pero un punto hopi importante ta cu inversionistanan lo warda riba gobierno pa semper. Segun de Freitas inversionistanan tin peticionnan haci, nan tin negoshinan cu nan kier hinca den otro, nan kier emplea localnan y huur nan edificionan cu localnan. “Nan ta mira e oportunidad y nan manera di duna di nan parti ta pa pone edificionan disponibel,” el a agrega.

De Freitas a remarca cu San Nicolas ta representa 40% di e poblacion di Aruba y nan kier sinti esey. “Nos no ta t’ey pa bringa cu niun gobierno. Gobierno ta un continuidad, gobierno tin cu zorg pa bienestar di tur nos districtonan, pero nos ta para pa San Nicolas y nos kier wak San Nicolas florece y nos kier wak San Nicolas bira e San Nicolas cu tin mester di bira atrobe. Nos mensahe na gobierno y na e Conseho di Ministernan, nos ta spera cu nos telefon lo ser yama, cu nos por yega sinta cu otro y plania un reunion,” el a finalisa.