Aruba ta prepara pa mas plataforma di petroleo por bin para den nos awanan. Esey ta motibo pakico tin sondeo di fondo di lama. Asina vocero di Minister di Transporte y Sector Primario Alexa Werleman a informa.

Manera Bon Dia Aruba a bisa ayera, Sulmara Subsea hunto cu XOCEAN a haci un sondeo grandi di fondo di lama rond di Aruba. Ta trata di un analisis cu a haci riba peticion di SeaDrill, un compania petrolero basa na Houston y Bermuda. E investigacion riba fondo di lama a bay te na un profundidad di 70 meter di awa y e espacio tabata di 26 kilometer cuadra. A uza un USV, cu ta para pa Unmanned Surface vessel, e tipo XO-450.

E forma con e submarino ta traha ta  pa medio di multiple rayonan di resolucion halto. E obhetivo ta pa identifica cualkier particularidad di e fondo di lama y asina clasifica si e ta adecuado pa instalacion sigur pa luganan pa mara boto of otro construccion marino.

E trabou di SeaDrill ta basa riba un encargo di Directie Scheepsvaart , pa asina determina  e miho areanan unda por ancra e plataformanan petrolero a termino largo. E parkeo aki ta conoci como ‘coldstacking.’  Kier percura cu tin espacio, particularmente den un forma sigur y sostenibel, pa laga e plataformanan di bora petroleo, of asina yama, Rigs, keda den nos awanan teritorial. E plataformanan aki, debi na e mercado petrolero actual, no tin hopi trabou. Y ta den buskeda di zonanan cu ta brinda siguridad fisico.

E awanan di Aruba ta crea e oportunidad ey. No solamente tin stabilidad politico na Aruba, pero nos condicion climatico tambe ta contribui cu e plataformanan aki ta core menos risico cu cualkier otro caminda. E hecho cu ta pafo di e ruta di horcan tambe ta un beneficio.

Los cu e plataformanan aki ta paga Aruba pa haci uzo di nos teritorio, tambe nan personal ta haci uzo di infrastructura di Aruba y ta contribui na economia di Aruba.

1 COMMENT

LEAVE A REPLY

Please enter your comment!
Please enter your name here